ກໍາມະທິການບັນດາເຜົ່າສະພາແຫ່ງຊາດ ຮ່ວມກັບ ສູນກາງແນວລາວສ້າງຊາດ, ກະຊວງພາຍໃນ ແລະ ສະຖາບັນວິທະຍາສາດສັງຄົມແຫ່ງຊາດ ໄດ້ຈັດກອງປະຊຸມເປີດກວ້າງ ກ່ຽວກັບຊົນເຜົ່າ ທີ່ມີຊື່ເອີ້ນວ່າ “ບຮູ” ໃນຫວ່າງອາທິດຜ່ານມານີ້ ທີ່ສູນຝຶກອົບຮົມ ສູນກາງແນວລາວສ້າງຊາດ.ພາຍໃຕ້ການເປັນປະທານຂອງ ທ່ານ ແສງນວນ ໄຊຍະລາດ ຮອງປະທານສະພາ, ມີ ທ່ານ ຄໍາໃບ ດໍາລັດ ກຳມະການສູນກາງພັກ ຮອງປະທານສູນກາງແນວລາວສ້າງຊາດ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ແສງນວນ ໄຊຍະລາດ ໄດ້ກ່າວບາງຕອນວ່າ: ປະເທດລາວປະກອບດ້ວຍຫຼາຍຊົນເຜົ່າທີ່ມີພາສາປາກເວົ້າ ຮີດຄອງປະ ເພນີ ແລະ ການເຊື່ອຖືທີ່ແຕກຕ່າງກັນ ເຊິ່ງຍາມໃດພັກ-ລັດ ກໍໄດ້ເອົາໃຈໃສ່ ແລະ ຖືສໍາຄັນຕໍ່ວຽກງານຊົນເຜົ່າ ໂດຍສະເພາະແມ່ນຊື່ເອີ້ນ ຂອງແຕ່ລະຊົນເຜົ່າ ໃຫ້ຖືກກັບຈຸດພິເສດຂອງຊົນເຜົ່າຢູ່ໃນລາວ, ຖືກກັບຊື່ຕົວຈິງຂອງເຂົາເຈົ້າມັກ. ພ້ອມກັນນີ້, ກໍເພື່ອກໍາຈັດ, ແກ້ໄຂ ແລະ ກ້າວໄປເຖິງການລຶບລ້າງຊື່ຊົນເຜົ່າ ທີ່ມີລັກສະນະສຽດສີ, ດູຖູກໝິ່ນປະໝາດ ແລະ ພາໃຫ້ເກີດມີການອາຄາດບາດໝາງກັນ. ສະນັ້ນ, ກອງປະຊຸມໃນຄັ້ງນີ້ ຈະໄດ້ຮັບຟັງການລາຍງານການຈັດກອງປະຊຸມຄົ້ນຄວ້າປະກອບຄໍາຄິດເຫັນກ່ຽວກັບຊົນເຜົ່າ ທີ່ມີຊື່ເອີ້ນວ່າ “ບຮູ” ຢູ່ແຂວງສະຫວັນນະເຂດ ຈາກ ທ່ານ ຄໍາໃບ ດໍາລັດ ກຳມະການສູນ ກາງພັກ ຮອງປະທານສູນກາງແນວລາວສ້າງຊາດ ເພື່ອໃຫ້ຜູ້ເຂົ້າຮ່ວມປະຊຸມໄດ້ຮັບຊາບ ແລະ ຮຽກຮ້ອງໃຫ້ບັນດາຜູ້ເຂົ້າ ຮ່ວມສຸມສະຕິປັນຍາປະກອບຄໍາຄິດເຫັນໃຫ້ກອງປະຊຸມໄດ້ຮັບຜົນສໍາເລັດ ເພື່ອນໍາເຂົ້າພິຈາລະນາໃນກອງປະຊຸມສະໄໝສາ ມັນ ເທື່ອທີ່ 6 ຂອງສະພາແຫ່ງຊາດຊຸດ ທີ VIII ທີ່ຈະຈັດຂຶ້ນໃນທ້າຍປີ 2018.