ເພື່ອເປັນການສ້າງຂະບວນການຂ່ຳນັບຮັບຕ້ອນ 3 ວັນປະຫວັດສາດ ຄື: ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ, ສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 105 ປີ ໃຫ້ເປັນຂະບວນການຟົດຟື້ນ. ໃນວັນທີ 13 ກັນຍາ 2024 ທີ່ສູນກາງແນວລາວສ້າງຊາດ ອະນຸກຳມະການຂະບວນການ, ແຂ່ງຂັນ ແລະ ຍ້ອງຍໍ ເພື່ອສະເຫຼີມສະຫຼອງ 3 ວັນປະຫວັດສາດ ປີ 2025 ໄດ້ຈັດກອງປະຊຸມປຶກສາຫາລື ກ່ຽວກັບການກະກຽມຄວາມພ້ອມໃນດ້ານຕ່າງໆ ພາຍໃນອະນຸກໍາມະການ; ໂດຍການເປັນປະທານ ຂອງ ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ຫົວໜ້າອະນຸກຳມະການຂະບວນການ, ແຂ່ງຂັນ ແລະ ຍ້ອງຍໍ; ມີທ່ານ ວິໄລວົງ ບຸດດາຄໍາ ກຳມະການສູນກາງພັກ, ລັດຖະມົນຕີກະຊວງພາຍໃນ ຜູ້ປະຈໍາການອະນຸກໍາມະການຂະບວນການ, ແຂ່ງຂັນ ແລະ ຍ້ອງຍໍ; ທ່ານ ດຣ ນາງ ອິນລາວັນ ແກ້ວບຸນພັນ ກຳມະການສູນກາງພັກ, ຮອງປະທານສູນກາງແນວລາວສ້າງຊາດ ພ້ອມດ້ວຍຄະນະຮັບຜິດຊອບ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມ, ໄດ້ຮັບຟັງການລາຍງານຄວາມຄຶບໜ້າ ໃນການກະກຽມຄວາມພ້ອມໃນດ້ານຕ່າງໆ ໄລຍະຜ່ານມາ ຂອງອະນຸກຳມະການ ເປັນຕົ້ນແມ່ນ: ແຜນການເຄື່ອນໄຫວ ຂອງອະນຸກໍາມະການ ເປັນຕົ້ນແມ່ນ: ວຽກງານຂະບວນການ, ເປົ້າໝາຍ, ມາດຕະຖານ ແລະ ເງື່ອນໄຂ ທີ່ຈະຍ້ອງຍໍ ແລະ ແຜນການທີ່ຈະປະດັບຫຼຽນປະເພດຕ່າງໆ ໃຫ້ຜູ້ທີ່ມີຄຸນງາມຄວາມດີໃນການເຄື່ອນໄຫວວຽກງານການປະຕິວັດ ແລະ ວຽກງານການຊ່ວຍເຫຼືອສັງຄົມ ໃນໄລຍະຜ່ານມາ. ກອງປະຊຸມຜູ້ເຂົ້າຮ່ວມຍັງໄດ້ພ້ອມກັນປະກອບຄໍາເຫັນປຶກສາຫາລືແລກປ່ຽນ ຕໍ່ແຜນວຽກ ແລະ ບັນດາກິດຈະກຳຕ່າງໆ ຢ່າງສ້າງສັນ ແລະ ກົງໄປກົງມາ.

ໂອກາດນີ້, ທ່ານ ປະທານສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຊົມເຊີຍ ແລະ ໄດ້ມີຄຳເຫັນຊີ້ນໍາຕໍ່ຄະນະຮັບຜິດຊອບ ຕື່ມວ່າ ໃຫ້ສຶບຕໍ່ນຳເອົາຄຳຄິດເຫັນຂອງກອງປະຊຸມໄປສຶກສາຄົ້ນຄວ້າ ແລະ ປັບປຸງບັນດາແຜນງານ ແລະ ກິດຈະກຳຕ່າງໆ ຕາມທີ່ກອງປະຊຸມເຫັນດີ ເພື່ອລາຍງານຕໍ່ໃຫ້ຂັ້ນເທິງ.

ຂ່າວ: ຢຢ

ບກ: ພ. ບຸບຜາ