ສູນກາງແນວລາວສ້າງຊາດ

Lao Front For National Development

ກອງປະຊຸມເປີດບັ້ນດຳເນີນຊີວິດການເມືອງທ້າຍສະໄໝ ຂອງຄະນະໜ່ວຍພັກຮາກຖານ ແນວລາວສ້າງຊາດແຂວງສະຫວັນນະເຂດ

ກອງປະຊຸມເປີດບັ້ນດຳເນີນຊີວິດການເມືອງ ທ້າຍສະໄໝ ຂອງຄະນະໜ່ວຍພັກຮາກຖານ ແນວລາວສ້າງຊາດແຂວງສະຫວັນນະເຂດ ໄດ້ເປີດຂຶ້ນ ແລະ ສໍາເລັດລົງໃນຄັ້ງວັນທີ 5 ສິງ 2021 ນີ້ ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງ. ໃຫ້ກຽດເຂົ້າຮ່ວມຂອງ ສະຫາຍ ພູວັງ ເກດແກ້ວພົມພອນ ຮອງເລຂາພັກແຂວງ ຜູ້ຊີ້ນຳວຽກງານການເມືອງ- ແນວຄິດ, ສະຫາຍ ຄຳແພງ ເພັດທຸມພອນ ກຳມະການປະຈຳພັກແຂວງ ປະທານແນວລາວສ້າງຊາດແຂວງ, ສະຫາຍຜູ້ຕາງໜ້າຈາກຄະນະຈັດຕັ້ງແຂວງ, ກວດກາພັກ-ລັດແຂວງ ພ້ອມດ້ວຍບັນດາສະຫາຍສະມາຊິກພັກພາຍໃນໜ່ວຍພັກຮາກຖານເຂົ້າຮ່ວມ.

ໂອກາດນີ້ ສະຫາຍ ແກ້ວມະນີວອນ ຕານລະມະນີ ຄະນະໜ່ວຍພັກຮາກຖານແນວລາວສ້າງຊາດແຂວງ ໄດ້ ຜ່ານຮ່າງບົດລາຍງານການເມືອງ, ບົດສຳຫຼວດການນຳພາລວມຂອງໜ່ວຍພັກຮາກຖານແນວລາວສ້າງຊາດແຂວງ ຄັ້ງທີ VIII ເຊິ່ງຍົກໃຫ້ຮູ້ວ່າ: ໄດ້ປະຕິບັດພາລະບົດບາດເປັນເສນາທິການໃຫ້ແກ່ອົງຄະນະພັກແຂວງ ໃນການສຶກສາອົບຮົມການເມືອງ-ແນວຄິດ, ເຜີຍແຜ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດໃຫ້ແກ່ສະມາຊິກພັກ,ພະນັກງານ ແລະ ປະຊາຊົນບັນດາເຜົ່າ ໄດ້ຮັບຮູ້ ແລະ ເຂົ້າໃຈ. ຄະນະໜ່ວຍພັກ ເວລາໃດກໍ່ມີສະຕິ ແລະ ຍຶດໝັ້ນໃນ 5 ຫຼັກການ 3 ທິດນຳເວົ້າລວມ ເວົ້າສະເພາະແມ່ນການກໍ່ສ້າງພັກ ໂດຍເລັ່ງໃສ່ສ້າງສະມາຊິກພັກໃຫ້ມີຄວາມເຂັ້ມແຂງທັງສາມດ້ານຄື: ດ້ານການເມືອງ – ແນວຄິດ, ການຈັດຕັ້ງ, ດ້ານແບບແຜນການນຳພາຂອງພັກ ແລະ ການນຳພາປະຕິບັດວຽກງານວິຊາສະເພາະ ໂດຍຖືເອົາຄຸນະພາບເປັນກົກ ໃນນັ້ນບັນຫາການປັບປຸງພາຍໃນພັກເປັນບັນຫາຕົ້ນຕໍ ແລະ ການຂະຫຍາຍພັກເປັນບັນຫາສຳຄັນ. ໃນກອງປະຊຸມຄັ້ງນີ້ບັນດາສະຫາຍສະມາຊິກພັກສົມບູນ ກໍ່ໄດ້ໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະໜ່ວຍພັກຮາກຖານຊຸດໃໝ່ ໂດຍມີຜູ້ຮັບສະໝັກຈຳນວນ 7 ສະຫາຍ, ເລືອກເອົາ 5 ສະຫາຍ ເພື່ອລົງສະໝັກຄະນະພັກຊຸດໃໝ່ທີ່ກອງປະຊຸມຈະໄດ້ຈັດຂຶ້ນໃນມໍ່ໆນີ້.

ກອງປະຊຸມຄັ້ງນີ້ ສະຫາຍ ພູວັງ ເກດແກ້ວພົມພອນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດທີ່ຄະນະໜ່ວຍພັກ, ສະມາຊິກພັກ ສາມາດຍາດມາໄດ້ໃນຕະຫຼອດໄລຍະຜ່ານມາ ແລະ ຍັງໄດ້ເນັ້ນໃຫ້ຄະນະພັກຊຸດໃໝ່ຈົ່ງໄດ້ພ້ອມກັນສືບຕໍ່ເອົາໃຈໃສ່ຜັນຂະຫຍາຍສິດ, ໜ້າທີ່ຂອງໜ່ວຍພັກຮາກຖານ, ຄົ້ນຄວ້າເຊື່ອມຊຶມແນວທາງປ່ຽນແປງໃໝ່ຂອງພັກ, ປັບປຸງ ແລະ ກໍ່ສ້າງໜ່ວຍພັກ ໃຫ້ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນຢ່າງຕໍ່ເນື່ອງ, ຕ້ອງນຳພາປັບປຸງການຈັດຕັ້ງໃຫ້ມີຄວາມເໝາະສົມ ແລະ ເອົາໃຈໃສ່ຕິດຕາມການເຄື່ອນໄຫວຂອງສະມາຊິກພັກ ພ້ອມທັງສຶກສາອົບຮົມທາງດ້ານວຽກງານການເມືອງ-ແນວຄິດ ໃຫ້ກັບຖັນແຖວສະມາຊິກພັກ, ພະນັກງານ, ເຕົ້າໂຮມຄວາມສາມັກຄີພາຍໃນໃຫ້ເປັນປຶກແຜ່ນ, ປະຕິບັດຕາມຫຼັກການລວມສູນປະຊາທິປະໄຕ ເຮັດວຽກເປັນໝູ່ຄະນະ ແບ່ງວຽກງານໃຫ້ບຸກຄົນຮັບຜິດຊອບ ເອົາໃຈໃສ່ປະຕິບັດວຽກງານວິຊາສະເພາະໃຫ້ມີຜົນສຳເລັດສູງ.

info@lfnd.org.la | 021 213754 | (856-21) 453191