ສູນກາງແນວລາວສ້າງຊາດ

Lao Front For National Development

ກອງປະຊຸມເຜີຍແຜ່ເຊື່ອມຊືມເອກະສານສໍາຄັນຂອງພັກ

ໃນວັນທີ 15 ມິຖຸນາ 2021 ຜ່ານມານີ້,  ທີ່ຫ້ອງປະຊຸມແນວລາວສ້າງຊາດແຂວງ ອຸດົມໄຊ ອົງການແນວລາວສ້າງຊາດແຂວງໄດ້ຈັດກອງປະຊຸມເຜີຍແຜ່ເຊື່ອມຊືມ ແລະ ຜັນຂະຫຍາຍມະຕິກອງປະຊຸມໃຫ່ຍຜູ້ແທນທົ່ວປະເທດ ຄັ້ງທີ XI ຂອງພັກ ແລະ ມະຕິ IX ຂອງອົງຄະນະພັກແຂວງ; ໂດຍການເປັນປະທານຂອງ ສະຫາຍ ວັນນາ ແກ້ວສັນຕິ ກໍາມະການປະຈໍາພັກແຂວງ, ປະທານແນວລາວສ້າງຊາດແຂວງອຸດົມໄຊ; ມີຮອງປະທານ, ຫົວໜ້າຂະແໜງ ພ້ອມດ້ວຍພະ ນັກງານ-ລັດຖະກອນພາຍໃນແນວລາວສ້າງຊາດແຂວງເຂົ້າຮ່ວມ.

ໃນກອງປະຊຸມສະຫາຍ ນາງ ຈັນທະຈອນ ດວງສຸກ ເລຂາໜ່ວຍພັກ, ຮອງປະທານແນວລາວສ້າງຊາດແຂວງ ກໍ່ໄດ້ເຜີຍແຜ່ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ອົງຄະນະພັກແຂວງອຸດົມໄຊ ຄັ້ງທີ IX. ຈາກນັ້ນ, ຮອງປະທານແນວລາວສ້າງຊາດແຂວງ ໄດ້ເຜີຍແຜ່ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025) ຂອງສູນກາງ ແລະ ຂອງແຂວງ ແລະ ເອກະສານຕ່າງໆທີ່ສໍາຄັນອີກຈໍານວນໜຶ່ງ. ພ້ອມດຽວກັນນັ້ນ, ຜູ້ເຂົ້າຮ່ວມກອງປະຊຸມໄດ້ປະກອບຄໍາຄິດຄໍາເຫັນຕໍ່ບັນດາເອກະສານທີ່ນໍາມາເຜີຍແຜ່ໃນຄັ້ງນີ້ອີກດ້ວຍ.

ສະຫາຍ ວັນນາ ແກ້ວສັນຕິ ໄດ້ເນັ້ນໃຫ້ແຕ່ລະຂະແໜງການ ຈົ່ງພ້ອມກັນນໍາເອົາບັນດາເນື້ອໃນຈິດໃຈຂອງມະຕິ ຕ່າງໆທີ່ໄດ້ເຜີຍແຜ່ໃນຄັ້ງນີ້ ນໍາໄປຄົ້ນຄ້ວາເຊື່ອມຊຶມໃຫ້ເລິກເຊິ່ງ, ໃຫ້ກໍາໄດ້ບັນດາເນື້ອໃນສໍາຄັນ ເພື່ອນໍາໄປຜັນຂະ ຫຍາຍເປັນແຜນວຽກ, ເປັນແຜນລະອຽດ ແລະ ເຄື່ອນໄຫວຈັດຕັ້ງປະຕິບັດໃຫ້ແທດເໝາະ ກັບໜ້າທີ່ວຽກງານໃນຂະແໜງການຂອງຕົນ ໃຫ້ມີຜົນສຳເລັດຕາມຄາດໝາຍທີ່ວາງໄວ້.

 

info@lfnd.org.la | 021 213754 | (856-21) 453191