ສູນກາງແນວລາວສ້າງຊາດ

Lao Front For National Development

ກອງປະຊຸມເຜີຍແຜ່ເອກະສານ ຄູ່ມືໂຄສະນາການເສຍພາສີ-ອາກອນໃຫ້ລັດ

ເພື່ອຈັດຕັ້ງປະຕິບັດບົດບັນທຶກ ລະຫວ່າງ ຄະນະປະຈຳສູນກາງແນວລາວສ້າງຊາດ ແລະ ກະຊວງການເງີນ ຄັ້ງວັນທີ 25 ຕຸລາ 2022; ສະນັ້ນ, ວັນທີ 15-16 ກຸມພາ 2024 ນີ້ ຄະນະຮັບຜິດຊອບ ສູນກາງແນວລາວສ້າງຊາດ ຮ່ວມກັບກະຊວງການເງິນ ໄດ້ຈັດກອງປະຊຸມເຜີຍແຜ່ເອກະສານຄູ່ມືໂຄສະນາການເສຍພາສີ-ອາກອນໃຫ້ລັດ ໂດຍໃຫ້ກຽດເປັນປະທານກອງປະຊຸມ ຂອງທ່ານ ເຍ່ຍເກີຢ່າ ໜໍຈໍຈົງຕົວ ຄະນະປະຈຳພັກ, ຮອງປະທານສູນກາງແນວລາວສ້າງຊາດ, ມີຄະນະປະຈໍາ ສູນກາງແນວລາວສ້າງຊາດ, ທ່ານ ຄໍາພັນ ພັນທຸລັກ ຮອງຫົວໜ້າກົມສ່ວຍສາອາກອນ ກະຊວງການເງິນ, ມີຫົວໜ້າກົມ, ຮອງຫົວໜ້າກົມ, ຫ້ອງການ, ສູນຄົ້ນຄວ້າ-ຝຶກອົບຮົມ ສູນກາງແນວລາວສ້າງຊາດ; ມີປະທານ, ຮອງປະທານແນວລາວສ້າງຊາດບັນດາແຂວງທົ່ວປະເທດ ແລະ ນະຄອນຫຼວງວຽງຈັນ ພ້ອມດ້ວຍຫົວໜ້າ-ຮອງຫົວໜ້າພະແນກການເງີນແຂວງ ແລະ ນະຄອນຫຼວງວຽງຈັນ ເຂົ້າຮ່ວມ ທີ່ສູນກາງແນວລາວສ້າງຊາດ.

ໃນກອງປະຊຸມຜູ້ເຂົ້າຮ່ວມໄດ້ຮັບຟັງການເຜີຍແຜ່ເອກະສານທີ່ສໍາຄັນ ຄື: ເອກະສານກ່ຽວກັບວຽກງານພາສີ, ເອກະສານວຽກງານສ່ວຍສາອາກອນ ແລະ ເອກະສານກ່ຽວກັບການກະກຽມເນື້ອໃນປື້ມຄູ່ມືໂຄສະນາການເກັບລາຍຮັບຈາກການເສຍພາສີ, ສ່ວຍສາອາກອນ ແລະ ວຽກງານແນວໂຮມ ໃນຫົວຂໍ້ “ປະເທດລາວຄົນລາວເປັນເຈົ້າຂອງ” ພາຍຫຼັງໄດ້ຮັບຟັງບັນດາເອກະສານດັ່ງກ່າວແລ້ວ ຜູ້ເຂົ້າຮ່ວມກອງປະຊຸມໄດ້ປະກອບຄຳຄິດຄຳເຫັນຢ່າງກົງໄປກົງມາເພື່ອໃຫ້ການກະກຽມເນື້ອໃນປື້ມຄູ່ມືໂຄສະນາການເກັບລາຍຮັບພາສີ ແລະ ສ່ວຍສາອາກອນ. ພ້ອມກັນນັ້ນ, ຍັງໄດ້ພ້ອມກັນຄົ້ນຄວ້າຮູບແບບວິທີການລົງໂຄສະນາປຸກລະດົມ, ການປັບປຸງເນື້ອໃນ ແລະ ສ້າງຄູ່ມື ແລະ ອື່ນໆທີ່ກ່ຽວຂ້ອງ.

ທ່ານ ເຍ່ຍເກີຢ່າ ໜໍຈໍຈົງຕົວ ໄດ້ມີຄໍາເຫັນຕໍ່ທີ່ປະຊຸມເຊິ່ງກ່ອນອື່ນທ່ານໄດ້ສະແດງຄວາມຊົມເຊີຍຕໍ່ການປະກອບຄຳເຫັນຂອງທຸກໆທ່ານ ທີ່ໄດ້ສຸມສະຕິປັນຍາປະກອບຄຳເຫັນຢ່າງສ້າງສັນຕໍ່ກອງປະຊຸມໃນເທື່ອນີ້ ເຊິ່ງສາມາດສະແດງໃຫ້ເຫັນເຖີງຂໍ້ສະດວກ-ຂໍ້ຫຍຸ້ງຍາກໃນການເກັບພາສີ, ສ່ວຍອາກອນຕະຫຼອດໄລຍະຜ່ານມາ ແລະ ກ່າວອິກວ່າ: ກ່ອນອື່ນໝົດຕ້ອງປຸກລະດົມ, ຂົນຂວາຍຜູ້ປະກອບການ, ບຸກຄົນ, ນິຕິບຸນຄົນ ແລະ ໃຫ້ປະຊາຊົນລາວບັນດາເຜົ່າ ມີຄວາມເປັນເຈົ້າການ ສະແດງຄວາມເປັນເຈົ້າຂອງປະເທດຊາດຢ່າງມີສະຕິ ໃນການປະຕິບັດພັນທະການເສຍພາສີ, ສ່ວຍສາອາກອນໃຫ້ລັດ ເພື່ອໃຫ້ປະເທດຊາດມີຄວາມເຂັ້ມແຂງໃນການພັດທະນາເສດຖະກິດ-ສັງຄົມ ແລະ ມີຄວາມມັ່ງຄັ່ງເທື່ອລະກ້າວ. ພ້ອມກັນນີ້, ທ່ານຍັງໄດ້ກ່າວຕື່ມກ່ຽວກັບ 9 ຂໍ້ແຂ່ງຂັນຂອງແນວລາວສ້າງຊາດ ໂດຍແນໃສ່ໃຫ້ແນວລາວສ້າງຊາດ ຂັ້ນທ້ອງຖິ່ນສ້າງເງື່ອນໄຂໃຫ້ຂະແໜງການເງິນຂັ້ນຕົນ ໄດ້ມີການເຄື່ອນໄຫວຮ່ວມກັນເພື່ອສາມາດຈັດຕັ້ງປະຕິບັດວຽກງານການເສຍພາສີ, ສ່ວຍສາອາກອນ ແລະ ທ່ານ ໄດ້ວາງຄາດໝາຍສູ້ຊົນໃນການຈັດຕັ້ງປະຕິບັດ. ແຜນການດັ່ງກ່າວນີ້ແມ່ນໜຶ່ງໃນບັນດາກິດຈະກຳທີ່ຜັນຂະຫຍາຍ 2 ວາລະແຫ່ງຊາດ ໂດຍສະເພາະແມ່ນວາລະວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ.

ບກ: ພ.ບຸບຜາ

ພາບ+ຂ່າວ: ເລົ່າລໍ, ແສງຫຼ້າ

info@lfnd.org.la | 021 213754 | (856-21) 453191