ໃນວັນທີ 30 ສິງຫາ 2022 ນີ້, ສູນກາງແນວລາວສ້າງຊາດ ຮ່ວມກັບແນວລາວສ້າງຊາດແຂວງສະຫວັນນະເຂດ ຈັດກອງ​ປະຊຸມແລກປ່ຽນຫຼັກຄໍາສອນ ແລະ ພິທີກໍາ ຂອງສາສະໜາຕ່າງໆ ໃນ ສປປ ລາວ ຢູ່ແຂວງ ສະຫວັນນະເຂດ, ໂດຍການເປັນປະທານ ຂອງທ່ານ ດຣ ຈັນເພັງ ສຸດທິວົງ ຮອງປະທານສູນກາງແນວລາວສ້າງຊາດ, ມີທ່ານ ຄຳແພງ ເພັດທຸມພອນ ຄະນະປະຈຳພັກແຂວງ, ປະທານແນວລາວສ້າງຊາດແຂວງສະຫວັນນະເຂດ, ມີບັນດາທ່ານຈາກສູນກາງແນວລາວສ້າງຊາດ, ແນວລາວສ້າງຊາດແຂວງສະຫວັນນະເຂດ, ພາກສ່ວນທີ່ກ່ຽວຂ້ອງ ແລະ ຕາງໜ້າຈາກບັນດາສາສະໜາ ຕ່າງໆ ເຂົ້າຮ່ວມ.

ກອງປະຊຸມໄດ້ມີການແລກປ່ຽນເອກະສານໃນຫົວຂໍ້: ຫຼັກຄວາມເຊື່ອພື້ນຖານຂອງສາສະໜາຄຣິສຕຽນ ຄຣິສຕະຈັກຂ່າວປະເສີດ, ຫຼັກຄວາມເຊື່ອພື້ນຖານຂອງສາສະໜາ ຄຣິສຕະຈັກຄະນະວັນເສົາ, ຫຼັກຄວາມເຊື່ອພື້ນຖານຂອງສາສະໜາ ກາໂທລິກ, ຫຼັກຄວາມເຊື່ອພື້ນຖານຂອງສາສະໜາບາຮາຍ ແລະ ຫຼັກຄວາມເຊື່ອພື້ນຖານຂອງສາສະໜາ ອິດສະລາມ. ພ້ອມກັນນັ້ນ, ໄດ້ມີການປະກອບຄໍາເຫັນແລກປ່ຽນຕໍ່ບັນດາເນື້ອໃນເອກະສານດັ່ງກ່າວຢ່າງກົງໄປກົງມາ ເພື່ອເຮັດໃຫ້ຜູ້ເຊື່ອຖືມີຄວາມເຂົ້າໃຈຢ່າງເລິກເຊິ່ງຕໍ່ກັບບັນດາຫຼັກຄຳສອນ ຂອງບັນດາສາສະໜາຕ່າງໆ.

ທ່ານ ຮອງປະທານ ສູນກາງແນວລາວສ້າງຊາດ ໄດ້ມີຄຳເຫັນເນັ້ນຕໍ່ກອງປະຊຸມວ່າ: ໃຫ້ຄະນະຮັບຜິດຊອບກ່ຽວກັບວຽກງານສາສະໜາ, ພະແນກທີ່ກ່ຽວຂ້ອງ ແລະ ການຈັດຕັ້ງສາສະໜາ ຕ້ອງໄດ້ເອົາໃຈໃສ່ເພີ່ມທະວີປະສານສົມທົບກັນ ໃຫ້ເລິກເຊິ່ງກວ້າງຂວາງ ແລະ ເປັນປົກກະຕິກວ່າເກົ່າ; ຕ້ອງບຳລຸງ, ສ້າງພະນັກງານທີ່ເຮັດວຽກງານສາສະໜາ ໃຫ້ໄດ້ສຶກສາຄົ້ນຄວ້າແນວທາງນະໂຍບາຍຂອງພັກ-ລັດ ຕໍ່ກັບວຽກງານສາສະໜາ, ຄົ້ນຄວ້າຮ່ຳຮຽນກ່ຽວກັບຫຼັກຄຳສອນ ແລະ ພິທີກຳ ຂອງສາສະໜາ ເພື່ອຮັບປະກັນໃນການຈັດຕັ້ງປະຕິບັດວຽກງານ ໃຫ້ມີປະສິດພາບສູງ; ບັນດາອາຈານສອນສາສະໜາ ກໍຕ້ອງເອົາໃຈໃສ່ສຶກສາຄົ້ນຄວ້າແນວທາງນະໂຍບາຍຂອງພັກ-ລັດ, ຫຼັກຄຳສອນ ແລະ ພິທີກຳຕ່າງໆ ຂອງສາສະໜາ ເພື່ອເຮັດໃຫ້ສາມາດຮັບຮູ້ ແລະ ເຂົ້າໃຈໄດ້ຢ່າງເລິກເຊິ່ງຈະແຈ້ງກ່ຽວກັບເນື້ອແທ້ຂອງຫຼັກຄຳສອນ.

ຂ່າວ: ເຢ້

ບກ: ສືເຊັ່ງ ຈື້ໄຊ