ສູນກາງແນວລາວສ້າງຊາດ

Lao Front For National Development

ກອງປະຊຸມໃຫຍ່ຄັ້ງທີ VII ຂອງແນວລາວສ້າງຊາດ ເມືອງໄຊທານີ

ກອງປະຊຸມໃຫຍ່ ຄັ້ງທີ VII ແນວລາວສ້າງຊາດ ເມືອງໄຊທານີ ນະຄອນຫຼວງວຽງຈັນ ຈັດຂຶ້ນທີ່ສະໂມສອນເມືອງ ໃນວັນທີ 9 ກັນຍາ 2020 ນີ້, ໂດຍການເປັນປະທານ ຂອງທ່ານ ສີວິໄລ ຫຼວງລາດ ຄະນະປະຈຳພັກເມືອງ, ປະທານແນວລາວສ້າງຊາດເມືອງ, ເປັນກຽດເຂົ້າຮ່ວມມີທ່ານ ຖະໜອມ ທຳທອງ ກຳມະການສູນກາງແນວລາວສ້າງຊາດ, ປະທານແນວລາວສ້າງຊາດນະຄອນຫຼວງວຽງຈັນ, ທ່ານ ຄຳປະດິດ ເຂັມມານິດ ເລຂາພັກເມືອງ, ເຈົ້າເມືອງໄຊທານີ, ມີບັນດາທ່ານການນຳຈາກຫ້ອງການ, ອົງການຈັດຕັ້ງມະຫາຊົນຂອງເມືອງ ແລະ ກຳມະການແນວລາວສ້າງຊາດ ຈາກບັນດາບ້ານອ້ອມຂ້າງເມືອງເຂົ້າຮ່ວມ.

ໃນກອງປະຊຸມ, ທ່ານ ສີວິໄລ ຫຼວງລາດ ໄດ້ຜ່ານບົດລາຍງານການເມືອງຂອງຄະນະກຳມະການແນວລາວສ້າງຊາດເມືອງ ສະໄໝທີ VI ເຊິ່ງໄດ້ຍົກໃຫ້ເຫັນຜົນງານການເຄື່ອນໄຫວຕະຫຼອດໄລຍະ 5 ປີຜ່ານມາ. ພ້ອມກັນນີ້ ໄດ້ມອບຫຼຽນກາລະນຶກ 70 ປີ ວັນສ້າງຕັ້ງແນວລາວສ້າງຊາດ ໃຫ້ແກ່ບຸກຄົນທີ່ມີຜົນງານດີເດັ່ນເຂົ້າໃນການປະກອບສ່ວນເຄື່ອນໄຫວວຽກງານແນວລາວສ້າງຊາດ; ກອງປະຊຸມໄດ້ຮັບຮອງຄະນະກຳມະການແນວລາວສ້າງຊາດ ຊຸດໃໝ່ ຈຳນວນ 35 ທ່ານ ແລະ ຮັບຮອງ ທ່ານ ສີວິໄລ ຫຼວງລາດ ເປັນປະທານແນວລາວສ້າງຊາດ ເມືອງ, ທ່ານ ສົມຈິດ ອາສິດນິພາບ ແລະ ທ່ານ ຈັນສະຫວ່າງ ຂຽວເພັດ ເປັນຮອງປະທານແນວລາວສ້າງຊາດ ເມືອງໄຊທານີ.

ທ່ານ ຖະໜອມ ທຳທອງ ໄດ້ສະແດງຄວາມຍ້ອງຍໍຊົມເຊີຍຕໍ່ບົດລາຍງານການເມືອງຂອງຄະນະກຳມະການແນວລາວສ້າງຊາດເມືອງ ສະໄໝທີ VI ແລະ ມີຄຳເຫັນໂອ້ລົມຕໍ່ກອງປະຊຸມ.

info@lfnd.org.la | 021 213754 | (856-21) 453191