ສູນກາງແນວລາວສ້າງຊາດ

Lao Front For National Development

ກອງປະຊຸມໃຫຍ່ຜູ້ແທນພຣະສົ່ງທົ່ວແຂວງຜົ້ງສາລີ ຄັ້ງທີ II

ກອງປະຊຸມໃຫຍ່ຜູ້ແທນພຣະສົງທົ່ວແຂວງຜົ້ງສາລີ ຄັ້ງທີ II ໄດ້ຂຶ້ນຢ່າງເປັນທາງການ ໃນວັນທີ 5 ເມສາ 2021, ໂດຍພາຍໃຕ້ການເປັນປະທານຂອງພຣະປຣີຊາສູນທະຣະທັມທັກຂິນາຈານ ( ວຽງທອງ ທັດທະໂນ ) ເຈົ້າຄະນະອົງການພຸດທະສາສະນາສຳພັນລາວແຂວງຜົ້ງສາລີ, ເປັນກຽດເຂົ້າຮ່ວມຂອງ ພຣະຍອດຄຳພັດທະຣະເກສີ (ປອ. ດໍາຣົງ ພິມມະຈັກ) ຫົວໜ້າຫ້ອງການບໍລິຫານງານສູນກາງ ອພສ ແລະ ທັງເປັນຫົວໜ້າ ກັມມະທິການຕ່າງປະເທດ ສູນກາງອົງການພຸດທະສາສະໜາສັມພັນ ແຫ່ງ ສ ປ ປ ລາວ,  ທ່ານ ຄຳເຫຼັກ ໃຈອິສານ ຮອງເຈົ້າແຂວງໆຜົ້ງສາລີ, ທ່ານ ທອງສະຫວັນ ທຳມະວົງ ປະທານແນວລາວສ້າງຊາດແຂວງ, ທ່ານ ຄະນອງລິດ ສີສົມບູນ ຄະນະປະຈຳ, ຫົວໜ້າກົມສາສະໜາ ສູນກາງແນວລາວສ້າງຊາດ, ມີບັນດາທ່ານຜູ້ແທນຈາກສູນກາງ ແລະ ອ້ອມຂ້າງແຂວງ, ພຣະເຖຣານຸເຖຣະ, ເຈົ້າຄະນະເມືອງ 7 ເມືອງ, ພຣະສົງ, ສາມະເນນ, ເຈົ້າອະທິການວັດ, ພະແນກການທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມຄັ້ງນີ້, ພຣະປຣີຊາສູນທະຣະທັມທັກຂິນາຈານ ໄດ້ຂື້ນຜ່ານບົດລາຍງານການຈັດຕັ້ງປະຕິບັດວຽກງານ ຂອງອົງການພຸທະສາສະໜາສຳພັນລາວ(ອພສ) ແຂວງຜົ້ງສາລີໃນໄລຍະ 5 ປີທີ່ຜ່ານມາ ແລະ ທິດທາງແຜນການ 5 ປີຕໍ່ໜ້າ. ເຊີ່ງທ່ານກ່າວວ່າ:  ອພສ ເປັນອົງກອນໜຶ່ງທີ່ມີຄວາມສໍາຄັນຕໍ່ປະເທດຊາດບ້ານເມືອງຂອງພວກເຮົາ, ມີສາຍໃຍການຈັດຕັ້ງ ແລະ ບໍລິຫານງານ 5 ກໍາມາທິການ 1 ຫ້ອງ ການບໍລິຫານງານຄື: ກໍາມາທິການປົກຄອງສົງ, ກຳມາທິການສຶກສາສົງ, ກຳມາທິການເຜີຍແຜ່ສິນທັມແລະປະຕິບັດກັມມະຖານ, ກຳມາທິການສາທາລະນຸປະການ ແລະ ກຳມາທິການການຕ່າງປະເທດ, ຫ້ອງການບໍລິຫານງານ ອພສ. ເຊິ່ງແຕ່ລະກຳມາທິການມີໜ້າທີ່ຮັບຜິດຊອບວຽກງານຂອງໃຜລາວ ພາຍໃຕ້ການຊີ້ນໍາຂອງປະທານສູນກາງ ອພສ. ແຕ່ປີ 2016 – 2021 ທົ່ວແຂວງ ມີພຣະສົງ ທັງໝົດ 208 ອົງ, ພຣະພິຂຸກ 60 ອົງ, ສຳມະເນນ 148 ຕົນ ແລະ ທົ່ວແຂວງມີ 146 ວັດ. ກອງປະຊຸມຜູ້ແທນ ໄດ້ພ້ອມກັນປະກອບຄຳຄິດຄຳເຫັນໃສ່ບົດສະຫຼູບ ແລະ ທິດທາງແຜນການໃນຕໍ່ໜ້າ ຢ່າງກົງໄປກົງມາດ້ວຍຄວາມຮັບຜິດຊອບ ແລະ ເປັນເອກະພາບເພື່ອໃຫ້ບົດສະຫຼຼບດັ່ງກ່າວມີຄວາມອຸດົມສົມບູນ.

ກອງປະຊຸມຄັ້ງນີ້ໄດ້ຜ່ານຂໍ້ຕົກລົງວ່າດ້ວຍການຮັບຮອງເອົາ ຄະນະບໍລິຫານງານ ອພສ ແຂວງ ສະໄໜທີ 2 ແຕ່ປີ 2021 – 2025 ປະກອບມີ 7 ອົງ, ຮັບຮອງເອົາຄະນະກຳມະການບໍລິຫານ ອພສ ແຂວງ ປະກອບມີ 16 ອົງ, ເຫັນດີຮັບຮອງເອົາພຣະຫຼັກຄໍາອຸດຕະລະທິດວິຈິດຕະທັມເມທີ (ດວງຈັນ ວົງພາສີ) ເປັນເຈົ້າຄະນະ ອສພ ແຂວງ, ຮັບຮອງເອົາພຣະປຣີຊາສູນທະຣະທັມທັກຂິນາຈານ (ວຽງທອງ ທັດທະໂນ), ພຣະປຣີຊາ ສະຫັດສະຄຸນທັມມະຈານ ( ຄຳພັນ ແສນຄຸນນາ ), ພຣະປຣີຊາສິຣິມັງຄະລະຍານບັນດິດ ( ສົມສີ ສີລິມຸງຄຸນ ) ແລະ ພຣະປຣີລັດຕະນະປັນຍານັນທິ ( ສີກັນດາ ແແກ້ວກ່ອນທີບພະພອນ ) ເປັນຮອງເຈົ້າຄະນະ ອສພ ແຂວງຜົ້ງສາລີ.

ໃນກອງປະຊຸມ ໄດ້ຮັບຟັງການໂອ້ລົມ ຂອງພຣະຍອດຄຳພັດທະຣະເກສີ (ປອ. ດຳຣົງ ພິມມະຈັກ) ຫົວໜ້າຫ້ອງການບໍລິຫານງານສູນກາງ ອພສ ແລະ ຫົວໜ້າກັມມະທິການຕ່າງປະເທດ ສູນກາງ ອພສ,  ທ່ານ ຄຳເຫຼັກ ໃຈອິສານ ເຊີ່ງທັງສອງທ່ານ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ ອພສ ແຂວງ ທີ່ຍາດຜົນງານໄດ້ໃນໄລຍະທີ່ຜ່ານມາ ພ້ອມນັ້ນຍັງໄດ້ຮຽກຮ້ອງໃຫ້ຄະນະ ອສພ ແຕ່ລະອົງຕະຫຼອດຮອດພຣະສົງສຳມະເນນ, ປະຊາຊົນບັນດາເຜົ່າ ຈົ່ງພ້ອມກັນສືບຕໍ່ສາມັກຄີໃຫ້ເປັນປືກແຜ່ນ ແໜ້ນໜາ  ແລະ ນຳເອົາເນື້ອໃນມະຕິກອງປະຊຸມຄັ້ງນີ້ນຳໄປຜັນຂະຫຍາຍ ແລະ ຈັດຕັ້ງປະຕິບັດໃຫ້ໄດ້ຮັບຜົນສຳເລັດຢ່າງຈົບງາມ.

 

info@lfnd.org.la | 021 213754 | (856-21) 453191