ສູນກາງແນວລາວສ້າງຊາດ

Lao Front For National Development

ກອງປະຊຸມໃຫຍ່ຜູ້ແທນແນວລາວສ້າງຊາດແຂວງໄຊສົມບູນ ຄັ້ງທີ I

ກອງປະຊຸມໃຫຍ່ຜູ້ແທນແນວລາວສ້າງຊາດແຂວງໄຊສົມບູນ ຄັ້ງທີ I ໄດ້ໄຂຂື້ນຢ່າງເປັນທາງການ ໃນວັນທີ 17 ພະຈິກ 2020 ຢູ່ທີ່ສະໂມສອນໃຫຍ່ເມືອງອະນຸວົງ ແຂວງໄຊສົມບູນ ໂດຍການເປັນປະທານຂອງທ່ານ ເລັ່ງຊົ່ງ ຕົ່ງສີ ຄະນະປະຈຳພັກແຂວງ, ກຳມະການສູນກາງແນວລາວສ້າງຊາດ, ປະທານແນວລາວສ້າງຊາດແຂວງໄຊສົມບູນ; ໃຫ້ກຽດເຂົ້າຮ່ວມມີ ທ່ານ ພົຕ ຄຳລຽງ ອຸທະໄກສອນ ເລຂາຄະນະບໍລິຫານງານພັກແຂວງ, ເຈົ້າແຂວງໄຊສົມບູນ; ທ່ານ ເຍ່ຍເກີຢ່າ ໜໍຈໍຈົງຕົວ ຮອງປະທານສູນກາງແນວລາວສ້າງຊາດເຂົ້າຮ່ວມ, ບັນດາຄະນະປະຈຳພັກແຂວງ, ກຳມະການພັກແຂວງ, ກຳມະການແນວລາວສ້າງຊາດແຂວງ, ເລຂາພັກເມືອງ, ບັນດາພະແນກການອ້ອມຂ້າງແຂວງ, ຕາງໜ້າອົງການຈັດຕັ້ງພາຄີ, ພະນັກງານອາວຸໂສບໍານານ ແລະ ຜູ້ຊົງຄຸນວຸດທິ ເຂົ້າຮ່ວມ.

ກອງປະຊຸມ ທ່ານ ເລັ່ງຊົ່ງ ຕົ່ງສີ ໄດ້ໃຫ້ກຽດກ່າວໄຂກອງປະຊຸມຢ່າງເປັນທາງການພ້ອມທັງຜ່ານຮ່າງບົດລາຍງານການ ເມືອງທັງສອງພາກ ເຊິ່ງໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ທິດທາງແຜນການໃນຕໍ່ໜ້າ ໂດຍຫຍໍ້ ເຊິ່ງທ່ານໄດ້ກ່າວວ່າ: ຕະຫຼອດໄລຍະ 5 ປີຜ່ານມາ ແນວລາວສ້າງຊາດແຂວງ ໄດ້ເປັນຄັນທຸງແຫ່ງການເຕົ້າໂຮມຄວາມສາມັກຄີປອງດອງທົ່ວປວງຊົນລາວບັນດາເຜົ່າ, ເສີມຂະຫຍາຍສິດເປັນເຈົ້າຂອງປະຊາຊົນ, ອານຸລັກຮັກສາຮິດຄອງປະເພນີອັນດີງາມຂອງຊາດ, ຂອງເຜົ່າ ພ້ອມທັງປຸກລະດົມພໍ່ແມ່ປະຊາຊົນ ເຂົ້າຮ່ວມຂະບວນການແຂ່ງຂັນຮັກຊາດ ແລະ ພັດທະນາ ເຊີ່ງສະແດງອອກໃນຂະບວນການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກຂອງປະຊາຊົນລາວບັນດາເຜົ່າ ທົ່ວແຂວງ ໄດ້ 55 ບ້ານ, 8,970 ຄອບຄົວ.

ກອງປະຊຸມໄດ້ ຮັບຮອງທ່ານ ເລັ່ງຊົ່ງ ຕົ່ງສີ ເປັນປະທານແນວລາວສ້າງຊາດແຂວງ, ທ່ານ ສີລັດ ພານຸວົງ ແລະ ທ່ານ ທູນ ເພັດສະໝອນ ຮອງປະທານ; ຮັບຮອງຄະນະປະຈຳແນວລາວສາ້ງຊາດແຂວງ 5 ທ່ານ ແລະ ກຳມະການແນວລາວສ້າງຊາດແຂວງ ຈຳນວນ 49 ທ່ານ.

info@lfnd.org.la | 021 213754 | (856-21) 453191