ສູນກາງແນວລາວສ້າງຊາດ

Lao Front For National Development

ກອງປະຊຸມໃຫຍ່ ຄັ້ງທີ VII ຂອງສະມາຄົມຜູ້ອາຍຸສູງ

ໃນວັນທີ 5 ມີນາ 2024 ທີ່ນະຄອນຫຼວງວຽງຈັນ ສະມາຄົມຜູ້ອາຍຸສູງ ນະຄອນຫຼວງວຽງຈັນ ໄດ້ຈັດກອງປະຊຸມໃຫຍ່ ຄັ້ງທີ VII ຂຶ້ນ ໂດຍການເປັນປະທານ ຂອງທ່ານ ສົມພົງ ມົງຄຸນວິໄລ ປະທານສະມາຄົມຜູ້ອາຍຸສູງ ນະຄອນຫຼວງວຽງຈັນ, ເປັນກຽດເຂົ້າຮ່ວມຂອງທ່ານ ດຣ ນາງ ອິນລາວັນ ແກ້ວບຸນພັນ ກຳມະການສູນກາງພັກ, ຮອງປະທານສູນກາງແນວລາວສ້າງຊາດ, ທ່ານ ອາດສະພັງທອງ ສີພັນດອນ ກຳມະການສູນກາງພັກ, ເຈົ້າຄອງນະຄອນຫຼວງວຽງຈັນ, ມີບັນດາທ່ານການນຳຕາງໜ້າຈາກກະຊວງ-ອົງການ, ອົງການພາຄີ, ອະດີດການນຳພັກ-ລັດ ພ້ອມດ້ວຍຜູ້ແທນກອງປະຊຸມ ແລະ ແຂກຖືກເຊີນເຂົ້າຮ່ວມ.

ກອງປະຊຸມ, ໄດ້ສະຫຼຸບຕີລາຄາຄືນຜົນງານການຈັດຕັ້ງປະຕິບັດວຽກງານ ຂອງສະມາຄົມຜູ້ອາຍຸສູງ ສະໄໝທີ VI ຜ່ານມາ ເຊິ່ງໄດ້ສັງລວມຜົນງານ, ດ້ານດີ, ດ້ານອ່ອນ-ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ໃນໄລຍະຜ່ານມາ ແລະ ວຽກງານຈຸດສຸມ 5 ປີໃນຕໍ່ໜ້າ ເຊິ່ງໄດ້ຍົກໃຫ້ເຫັນວ່າມາຮອດປັດຈຸບັນສະມາຄົນຜູ້ອາຍຸສູງ ນະຄອນຫຼວງວຽງຈັນ ປະກອບມີສະມາຊິກທັງໝົດ 894 ຄົນ ຍິງ 520 ຄົນ. ໃນກອງປະຊຸມ, ຍັງໄດ້ປະດັບຫຼຽນໄຊແຮງງານຊັ້ນ 2, ຫຼຽນໄຊແຮງງານຊັ້ນ 3 ແລະ ມອບໃບຍ້ອງຍໍໃຫ້ຜູ້ທີ່ມີຜົນງານດີເດັ່ນໃນການປະກອບສ່ວນເຂົ້າໃນວຽກງານຕ່າງໆ ຂອງສະມາຄົມ. ພ້ອມກັນນັ້ນ, ກໍໄດ້ຮັບຮອງເອົາກົດລະບຽບ ຂອງສະມາຄົມ ສະບັບປັບປຸງ ປີ 2024, ໄດ້ຮັບຮອງການແຕ່ງຕັ້ງເອົາຄະນະບໍລິຫານງານຊຸດໃໝ່ ສະໄໝທີ VII ຂອງສະມາຄົມ ຈຳນວນ 22 ທ່ານ ໂດຍແຕ່ງຕັ້ງ ທ່ານ ສົມພົງ ມົງຄຸນວິໄລ ເປັນປະທານ ແລະ ຮອງປະທານ 5 ທ່ານ. ພ້ອມກັນນັ້ນ, ຜູ້ແທນກອງປະຊຸມຍັງໄດ້ປະກອບຄໍາຄິດເຫັນຕໍ່ກອງປະຊຸມເພື່ອແລກປ່ຽນບົດຮຽນປະສົບການນຳກັນຢ່າງກົງໄປກົງມາ.

ທ່ານ ຮອງປະທານສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ທີ່ສະມາຄົມສາມາດຍາດໄດ້ໃນໄລຍະຜ່ານມາ ແລະ ທ່ານໄດ້ຮຽກຮ້ອງຕື່ມວ່າ: ໃຫ້ສືບຕໍ່ຮັກສາມູນເຊື້ອ ແລະ ຜົນງານຂອງສະມາຄົມ, ສືບຕໍ່ເຕົ້າໂຮມ-ປຸກລະດົມ ແລະ ຮັກສາຄວາມສາມັກຄີພາຍໃນ ພ້ອມກັນແກ້ໄຂບັນດາວຽກງານທີ່ຍັງຄົງຄ້າງ ແລະ ເອົາໃຈໃສ່ຈັດຕັ້ງປະຕິບັດບັນດາວຽກງານຈຸດສຸມໃນຕໍ່ໜ້າໃຫ້ໄດ້ຮັບຜົນສຳເລັດຕາມຄາດໝາຍທີ່ວາງໄວ້ ແລະ ປີນີ້ເປັນປີທ່ອງທ່ຽວ ພ້ອມທັງເປັນປີທີ່ ສປປ ລາວ ເຮົາເປັນເຈົ້າພາບຈັດກອງປະຊຸມອາຊຽນ ສະນັ້ນໃຫ້ສະມາຊິກ ຂອງສະມາຄົມຜູ້ອາຍຸສູງ ນະຄອນຫຼວງວຽງຈັນ ຈົ່ງສືບຕໍ່ປຸກລະດົມຂົນຂວາຍລູກຫຼານ ແລະ ພໍ່ແມ່ປະຊາຊົນຊາວນະຄອນຫຼວງວຽງຈັນ ໃຫ້ປະກອບສ່ວນເປັນເຈົ້າພາບທີ່ດີ ເພື່ອເຮັດໃຫ້ນັກທ່ອງທ່ຽວຕ່າງປະເທດເຂົ້າມາທ່ອງທ່ຽວຢູ່ ສປປ ລາວ ຂອງພວກເຮົາເປັນຂະບວນການຟົດຟື້ນ.

ຂ່າວ+ພາບ: ເຢ

ບກ: ສຊ ຈື້ໄຊ

info@lfnd.org.la | 021 213754 | (856-21) 453191