ສູນກາງແນວລາວສ້າງຊາດ

Lao Front For National Development

ກອງປະຊຸມໃຫ່ຍ ຄັ້ງທີ VII ຂອງແນວລາວສ້າງຊາດ ເມືອງສີໂຄດຕະບອງ

ວັນທີ 4 ທັນວາ 2020 ນີ້, ກອງປະຊຸມໃຫຍ່ ຜູ້ແທນແນວລາວສ້າງຊາດເມືອງສີໂຄດຕະບອງ ຄັ້ງທີ VII ໄດ້ໄຂຂຶ້ນທີ່ຫ້ອງປະຊຸມໃຫຍ່ຂອງເມືອງ ໂດຍເປັນປະທານຂອງ ທ່ານ ບຸນເຖິງ ວັນນາມະຫາໄຊ ຄະນະປະຈໍາພັກເມືອງ, ປະທານແນວລາວສ້າງຊາດເມືອງສີໂຄດຕະບອງ, ເປັນກຽດເຂົ້າຮ່ວມມີ ທ່ານ ຖະໜອມ ທຳທອງ ຄະນະປະຈຳພັກນະຄອນຫຼວງ, ປະທານແນວລາວສ້າງຊາດນະຄອນຫຼວງວຽງຈັນ, ທ່ານ ວິລະສັກ ນາມມຸນຕີ ຄະນະປະຈຳພັກນະຄອນຫຼວງ,  ເຈົ້າເມືອງສີໂຄດຕະບອງ, ມີຄະນະປະຈໍາພັກເມືອງ, ກໍາມະການພັກເມືອງ, ຜູ້ຊົງຄຸນວຸດທິ, ພະນັກງານອາວຸໂສບໍານານ, ພະສົງສາມະເນນ, ຕາງໜ້າອົງການຈັດຕັ້ງມະຫາຊົນ, ກໍາມະການແນວລາວສ້າງຊາດເມືອງ ແລະ ແຂກຖືກເຊີນເຂັ້າຮ່ວມ.

ທ່ານ ບຸນເຖິງ ວັນນາມະຫາໄຊ ໄດ້ຜ່ານບົດລາຍງານການເມືອງຂອງຄະນະກຳມະການແນວລາວສ້າງຊາດເມືອງ ຊຸດທີ VI, ທິດທາງແຜນການ ແລະ ວຽກງານຈຸດສຸມໃນຕໍ່ໜ້າ ເຊິ່ງທ່ານໄດ້ຍົກໃຫ້ເຫັນວ່າ ຕະຫຼອດໄລຍະ 5 ປີຜ່ານມາ ແນວລາວສ້າງຊາດເມືອງ ໄດ້ເຜີຍແຜ່ມະຕິກອງປະຊຸມໃຫຍ່ຂອງພັກ, ຂອງແນວລາວສ້າງຊາດ ຂັ້ນສູນກາງ, ຂັ້ນນະຄອນຫຼວງ ແລະ ຂັ້ນເມືອງໃຫ້ປະຊາຊົນໄດ້ຮັບຮູ້ເຊື່ອມຊຶມ, ກຳແໜ້ນໄດ້ຢ່າງເລີກເຊິ່ງ; ຈັດຕັ້ງປະຕິບັດຂະບວນການສາ້ງຄອບຄົວ ແລະ ບ້ານສາມັກຄີປອງດອງ ເຊິ່ງເປັນການເຕົ້າໂຮມຄວາມສາມັກຄີປະຊາຊົນລາວບັນດາເຜົ່າ ໂດຍຫັນເອົາຫົວໜ່ວຍຄອບຄົວ ແລະ ບ້ານເປັນໃຈກາງສຳຄັນ, ໄດ້ເຂົ້າຮ່ວມໄກ່ເກ່ຍຂໍ້ຂັດແຍ່ງຂັ້ນບ້ານຈຳນວນໜຶ່ງທີ່ເກີດຂຶ້ນ ເຮັດໃຫ້ປະຊາຊົນມີຄວາມສາມັກຄີ ແລະ ຮັກແພງກັນ; ໄດ້ນຳພາປະຊາຊົນປົກປັກຮັກສາ ແລະ ເສີມຂະຫຍາຍຮີດຄອງປະເພນີ ອັນດີງາມຂອງຊາດ ຂອງເຜົ່າ, ໄດ້ເກັບກຳຄຳຄິດຄຳເຫັນ ຄວາມຂັດຂ້ອງໝອງໃຈ ຂອງປະຊາຊົນ ສະເໜີຕໍ່ສະມາຊິກສະພາ ແລະ ລາຍງານໃຫ້ແນວລາວສາ້ງຊາດ ນະຄອນຫຼວງວຽງຈັນ. ພ້ອມນີ້ໄດ້ຮັບຮອງເອົາຄະນະກໍາມະການແນວລາວສ້າງຊາດເມືອງ ຊຸດໃໝ່ ຈໍານວນ 53 ທ່ານ, ພຣະສົງ 7 ອົງ, ຍິງ 8 ທ່ານ; ໃນນັ້ນຮັບຮອງເອົາ ທ່ານ ບຸນເຖິງ ວັນນາມະຫາໄຊ ເປັນປະທານແນວລາວສ້າງຊາດເມືອງ, ທ່ານ ສົງກາ ອໍລະສິນ ແລະ ທ່ານ ນາງ ດວງພະໄທ ແກ້ວປະເສີດ ເປັນຮອງປະທານແນວລາວສ້າງຊາດເມືອງ ແລະ ຮັບຮອງຄະນະປະຈຳ ຂອງແນວລາວສ້າງຊາດເມືອງ ຈຳນວນ 5 ທ່ານ.

ໂອກາດນີ້ ທ່ານ ປະທານແນວລາວສ້າງຊາດ ນະຄອນຫຼວງວຽງຈັນ ໄດ້ມີຄໍາເຫັນໂອ້ລົມຕໍ່ກອງປະຊຸມ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວຂອງແນວລາວສ້າງຊາດເມືອງ ທີ່ຍາດມາໄດ້ໃນໄລຍະຜ່ານມາ ແລະ ທ່ານໄດ້ເນັ້ນຕື່ມວ່າ: ໃຫ້ຄະນະກໍາມະການແນວລາວສ້າງຊາດເມືອງຊຸດໃໝ່ ຈົ່ງສືບຕໍ່ສຶກສາອົບຮົມການເມືອງແນວຄິດໃຫ້ຖັນແຖວສະມາຊິກພັກ-ພະນັກງານ ແລະ ໃຫ້ປະຊາຊົນບັນດາເຜົ່າ, ປຸກລະດົມປະຊາຊົນຮັກສາມູນເຊື້ອຄວາມສາມັກຄີປອງດອງ, ປົກປັກຮັກສາ ແລະ ເສີມຂະຫຍາຍຮີດຄອງປະເພນີຂອງປະຊາຊົນລາວບັນດາເຜົ່າ; ພ້ອມດຽວກັນນັ້ນໃຫ້ຄະນະກຳມະການແນວລາວສ້າງຊາດເມືອງ ຊຸດໃໝ່ ຈົ່ງສຶບຕໍ່ສຶກສາຄົ້ນຄວ້າແນວທາງນະໂຍບາຍຂອງພັກ-ລະບຽບກົດໝາຍຂອງລັດ; ພາລະບົດບາດ, ສິດ ແລະ ໜ້າທີ່ຂອງແນວລາວສ້າງຊາດ ໃຫ້ສາມາດກຳແໜ້ນ ແລະ ເຂົ້າໃຈໄດ້ຢ່າງເລິກເຊິ່ງ ເພື່ອເປັນບ່ອນອີງໃນການເຄື່ອນໄຫວວຽກງານແນວລາວສ້າງຊາດ ໃຫ້ໄດ້ຮັບຜົນສຳເລັດ, ຄຽງຄູ່ກັນນັ້ນໃຫ້ມີສະຕິລະວັງຕົວຕໍ່ກຸ່ມຄົນບໍ່ຫວັງດີ ທີ່ສວຍໃຊ້ວຽກງານສາສະໜາ ແລະ ຊົນເຜົ່າ ເພື່ອແບ່ງແຍກຄວາມສາມັກຄີພາຍໃນ;  ສືບຕໍ່ຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຕາມມາດຖານເງື່ອນໄຂ ເພື່ອເຮັດໃຫ້ເມືອງສີໂຄດຕະບອງໄດ້ຮັບຮອງເປັນເມືອງສາມັກຄີປອງດອງ ຂອງແນວລາວສ້າງຊາດ ແລະ ໃຫ້ນຳເອົາມະຕິກອງປະຊຸມຄັ້ງນີ້ ໄປຈັດຕັ້ງຜັນຂະຫຍາຍເປັນໂຄງການ, ແຜນງານ ແລະ ກິດຈະກຳລະອຽດ ເພື່ອເປັນບ່ອນອີງໃນເຄື່ອນໄຫວວຽກງານ ໃຫ້ມີປະສິດທິພາບ ແລະ ປະສິດທິຜົນ.

info@lfnd.org.la | 021 213754 | (856-21) 453191