ໃນຕອນເຊົ້າຂອງວັນທີ 18 ມິຖຸນາ​ 2021 ນີ້, ທີ່ຫ້ອງປະຊຸມໃຫຍ່ສູນກາງແນວລາວສ້າງຊາດໄດ້ເປີດກອງປະຊຸມຄະນະປະຈໍາສູນກາງແນວລາວສ້າງຊາດຂື້ນ ພາຍໃຕ້ການເປັນປະທານ ຂອງ ທ່ານ ປອ. ສິນລະວົງ ຄຸດໄພທູນ  ກຳມະການກົມການເມືອງສູນກາງພັກ ປະທານ ສູນກາງ​ແນວ​ລາວ​ສ້າງ​ຊາດ,​ ມີບັນດາ​ທ່ານ ຮອງປະທານ​ສູນກາງແນວລາວ​ສ້າງຊາດ, ບັນດາ​ທ່ານຫົວຫນ້າກົມ,​ ສູນຝືກອົບຮົມ,​ຫົວ​ໜ້າ​ຫ້ອງ​ການ​ສູນກາງ​ແນວ​ລາວ​ສ້າງ​ເຂົ້າ​ຮ່ວມ.

ໃນກອງປະຊຸມໄດ້ຮັບຟັງການລາຍງານການເຄື່ອນໄຫວຂອງສູນກາງແນວລາວສ້າງຊາດທີ່ຜ່ານມາ ແລະ ແຜນການປະຈໍາເດືອນ ກໍລະກົດ,​ ລາຍງານການກະກຽມສ້າງແຜນງົບປະມານແຫ່ງລັດປະຈໍາປີ 2022, ວຽກງານ​ຊົນເຜົ່າ,​ ວຽກງານຈັດຕັ້ງພະນັກງານ,​ ວຽກງານພົວພັນຄົນເຊື້ອຊາດລາວຢູ່ຕ່າງປະເທດ,​ ຮ່າງລາຍງານການເມືອງ ແລະ ແຜນພັດທະນາອົງການແນວລາວສ້າງຊາດ 5 ປີຕໍ່ຫນ້າ (2021​-2025), ລາຍງານຜົນສໍາເລັດວຽກງານຂົນຂວາຍປະຊາຊົນ 5 ປີຜ່ານມາ ແລະ ທິດທາງແຜນການ 5 ປີຕໍ່ຫນ້າ,​ ວຽກງານສູນຝືກອົບຮົມ ສູນກາງແນວລາວ​ສ້າງຊາດ.​ ຜູ້ເຂົ້າຮ່ວມໄດ້ພ້ອມກັນປະກອບຄໍາເຫັນຢ່າງກົງໄປກົງມາຕໍ່ຫົວຂໍ້ຕ່າງໆ.

ໃນຕອນທ້າຍກອງປະຊຸມ ທ່ານ ປະທານ​ ສນຊ ໄດ້ສະຫລຸບ ແລະ ມີທິດຊີ້ນໍາກ່ຽວກັບວຽກງານດ້ານຕ່າງໆເພື່ອຈັດຕັ້ງປະຕິບັດໃຫ້ ແທດເຫມາະກັບສະພາບການ ແລະ ທ່ວງທັນຕາມກຳນົດເວລາ.​

ຂ່າວ ແລະ ພາບໂດຍ: ສຸລິສາ