ສູນກາງແນວລາວສ້າງຊາດ

Lao Front For National Development

ກອງປະຊຸມ ນໍາສະເໜີວິທີການຈັດຕັ້ງປະຕິບັດວຽກງານຮ່ວມກັນ ລະຫວ່າງ ສູນກາງແນວລາວສ້າງຊາດ ແລະ ອົງການອາຫານໂລກ

ເພື່ອຈັດຕັ້ງປະຕິບັດແຜນການຮ່ວມມື ລະຫວ່າງ ສູນກາງແນວລາວສ້າງຊາດ ແລະ ອົງການອາຫານໂລກ ປະຈໍາ ສປປ ລາວ; ສະນັ້ນ ສູນກາງແນວລາວສ້າງຊາດ ແລະ ອົງການອາຫານໂລກ ຈຶ່ງໄດ້ຈັດກອງປະຊຸມນໍາສະເໜີວິທີການຈັດຕັ້ງປະຕິບັດວຽກງານຮ່ວມກັນຂຶ້ນ ໃນລະຫວ່າງວັນທີ 7-8 ພຶດສະພາ 2018 ທີ່ສູນຝຶກອົບຮົມ ສູນກາງແນວລາວສ້າງຊາດ;

ໂດຍເປັນກຽດເຂົ້າຮ່ວມຂອງທ່ານ ຮສ ດຣ. ສົມອົກ ກິ່ງສະດາ ຮອງປະທານສູນກາງແນວລາວສ້າງຊາດ, ທ່ານ ຮາການ ຮອງອໍານວຍການ, ຜູ້ຕາງໜ້າອົງການອາຫານໂລກ ປະຈໍາ ສປປ ລາວ, ທ່ານ ດຣ ຈັນເພັງ ສຸດທິວົງ ຫົວໜ້າຫ້ອງການ ສນຊ, ບັນດາທ່ານຄະນະກົມອ້ອມຂ້າງ, ມີບັນດາທ່ານປະທານ-ຮອງປະທານ ແນວລາວສ້າງຊາດ ແຂວງ 7 ແຂວງເປົ້າໝາຍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ;

ທ່ານ ຮສ.ດຣ ສົມອົກ ກິ່ງສະດາ ຮອງປະທານສູນກາງແນວລາວສ້າງຊາດ ໄດ້ກ່າວວ່າ: ​ໃນ​ວັນ​ທີ 4 ເມ​ສາ 2018 ​​ໄດ້​ຈັດ​ພິ​ທີ​ເຊັນ​ສັນ​ຍາ​ຮ່ວມ​ມື​ ລະ​ຫວ່າງ ສູນ​ກາງ​ແນວ​ລາວ​ສ້າງ​ຊາດ ແລະ ອົງ​ການ​ອາ​ຫານ​ໂລກ ເພື່ອ​ຈັດ​ຕັ້ງ​ປະ​ຕິ​ບັດ​ໂຄງ​ການ​ຮ່ວມ​ມື​ໃນ​ການ​ປຸກ​ລະ​ດົມ​ຂົນ​ຂວາຍ​ປະ​ຊາ​ຊົນ ​ໃຫ້​ເຂົ້າ​ຮ່ວມ​ກິດ​ຈະ​ກຳ​ການ​ສະ​ໜອງ​ອາ​ຫານ​ທ່ຽງ​ໃນ​ໂຮງ​ຮຽນ​ໃຫ້​ແກ່​ບັນ​ດາ​ໂຮງ​ຮຽນ​ເປົ້າ​ໝາຍ​ຂອງ​ໂຄງ​ການ ​ເພື່​ອ​ໃຫ້​ມີຄວາມ​ຍືນ​ຍົງ, ຕິດ​ຕາມ, ລາຍ​ງານ​ຄວາມ​ຄືບ​ໜ້າ​ໃນ​ແຕ່​ລະ​ໄລ​ຍະ, ການ​ຈັດ​ຕັ້ງ​ປະ​ຕິ​ບັດ​ໂຄງ​ການ​ຮ່ວມ​ມື​ດັ່ງ​ກ່າວນີ້ ເປັນ​ໄລ​ຍະ 4 ປີ ແຕ່ 2017-2021 ຢູ່ 7 ແຂວງເປົ້າໝາຍ ຄື: ຫຼວງ​ນ້ຳ​ທາ, ອຸ​ດົມ​ໄຊ, ຜົ້ງ​ສາ​ລີ, ຫຼວງ​ພະ​ບາງ, ສາ​ລະ​ວັນ, ເຊກອງ ແລະ ອັດ​ຕະ​ປື. ການ​ຮ່ວມ​ມື​ດັ່ງ​ກ່າວ​ມີ​ຈຸດ​ປະ​ສົງ​ເພື່ອ​ໂຄ​ສະ​ນາ, ​ເຜີຍ​ແຜ່, ອະ​ທິ​ບາຍ ແລະ ປຸກ​ລະ​ດົມ​ຂົນ​ຂວາຍ​ພໍ່​ແມ່​ປະ​ຊາ​ຊົນ​ບັນ​ດາ​ເຜົ່າ​, ຄູ​ອາ​ຈານ​ໃນ​ໂຮງ​ຮຽນໃຫ້​ເຂົ້າ​ໃຈ​ ແລະ ຕື່ນ​ຕົວ​ປະ​ກອບ​ສ່ວນ​ເຂົ້າ​ໃນ​ການ​ປະ​ຕິ​ບັດ​ໂຄງ​ການ​ອາ​ຫານ​ທ່ຽງ​ໃນ​ໂຮງ​ຮຽນ, ຕິດ​ຕາມ, ຊຸກ​ຍູ້, ເກັບ​ກຳ​ຂໍ້​ມູນ, ລາຍງານ​ການ​ຈັດ​ຕັ້ງ​ປະ​ຕິ​ບັດ​ໂຄງ​ການ​ດັ່ງ​ກ່າວ​ຕາມ​ແບບ​ຟອມ​ຂອງ​ໂຄງ​ການ, ​ເຫັນ​ໄດ້​ຄວາມ​ສຳ​ຄັນ ແລະ ຄວາມ​ຈຳ​ເປັນ​ຂອງ​ການ​ສະ​ໜອງ​ອາ​ຫານ​ທ່ຽງ​ໃນ​ໂຮງ​ຮຽນ​ໃຫ້​ແກ່​ເດັກ​ນັກ​ຮຽນ. ພິ​ເສດ​ແມ່ນ​ການ​ປຸກ​ລະ​ດົມ​ຂົນ​ຂວາຍ​ ໂດຍ​ອີງ​ໃສ່​ທ່າ​ແຮງ​ຂອງ​ທ້ອງ​ຖິ່ນ​ເປັນ​ຕົ້ນ​ແມ່ນການ​ປູກ​ພືດ, ຜັກ​ສວນ​ຄົວ, ລ້ຽງ​ສັດ​ນ້ຳ ແລະ ສັດ​ປີກ ເພື່ອ​ໃຫ້​ເດັກ​ໄດ້​ຮັບ​ປະ​ທານ​ອາ​ຫານ​ທີ່​ມີ​ຄຸນ​ປະ​ໂຫຍດ ແລະ ມີ​ອາ​ຫານ​ສະ​ໜອງ​ໃຫ້​ເດັກ​ໃນ​ໂຮງ​ຮຽນ​ຕະຫຼອດ​ໄປ​ແບບ​ຍືນ​ຍົງ;

ກອງປະຊຸມໃນຄັ້ງນີ້ ຈະໄດ້ນໍາສະເໜີວິທີການຈັດຕັ້ງປະຕິບັດວຽກງານຮ່ວມກັນ ລະຫວ່າງ ສູນກາງແນວລາວສ້າງຊາດ ກັບ ອົງການອາຫານໂລກປະຈໍາ ສປປ ລາວ ໂດຍສະເພາະ ແມ່ນການປຸກລະດົມຊຸມຊົນ, ​ການຕິດຕາມ ແລະ ລາຍງານການຈັດຕັ້ງປະຕິບັດບັນດາກິດຈະກໍາ ແລະ ມາດຕະການກ່ຽວກັບໂຄງການອາຫານທ່ຽງໃນໂຮງຮຽນ ແລະ ວຽກງານໂພຊະນາການ ທີ່ສະໜັບສະໜູນໂດຍອົງການອາຫານໂລກໃນ 7 ແຂວງເປົ້າໝາຍ, ປຶກສາຫາລືກ່ຽວກັບວິທີການເຮັດວຽກຮ່ວມກັນ ລະຫວ່າງ ຄະນະຮັບຜິດຊອບໂຄງການຢູ່ຂັ້ນສູນກາງ ແລະ ຂັ້ນແຂວງຂອງສອງຝ່າຍ, ເປັນການສ້າງຄູຝຶກຂັ້ນສູນກາງ ແລະ ຂັ້ນແຂວງ ເພື່ອນໍາໄປຊີ້ນໍາ-ນໍາພາຈັດຕັ້ງປະຕິບັດຢູ່ຂັ້ນແຂວງ, ຂັ້ນເມືອງ ແລະ ບ້ານ ຢູ່ໃນ 7 ແຂວງເປົ້າໝາຍ; ພ້ອມກັນນັ້ນ ຍັງມີການສົນທະນາ ຖາມ-ຕອບ ຂໍ້ຂ້ອງໃຈ, ແລກປ່ຽນຄຳຄິຄຳເຫັນ ແລະ ຖອດຖອນບົດຮຽນວຽກງານດັ່ງກ່າວ ກັບ ບັນດາກະຊວງ-ອົງການ ກໍຄືບັນດາຂະແໜງການທີ່ກ່ຽວຂ້ອງແຕ່ລະຂັ້ນ ໃນການຈັດຕັ້ງປະຕິບັດ ຮ່ວມກັບ ອົງການອາຫານ ໂລກໃນໄລຍະຜ່ານມາ ເພື່ອເຮັດໃຫ້ອົງການແນວລາວສ້າງຊາດ ນັບຂັ້ນສູນກາງລົງຮອດທ້ອງຖິ່ນໄດ້ຮັບຮູ້, ເຂົ້າໃຈ ແລະ ນຳໄປຈັດຕັ້ງປະຕິບັດຕາມແຜນການຮ່ວມມື ໃຫ້ໄດ້ຮັບຜົນດີ.

info@lfnd.org.la | 021 213754 | (856-21) 453191