ກົມຊັ້ນຄົນ-ອົງການຈັດຕັ້ງສັງຄົມ ສູນກາງແນວລາວສ້າງຊາດ ໄດ້ຈັດກອງປະຊຸມແລກປ່ຽນຄໍາເຫັນໃສ່ຮ່າງຄົ້ນຄວ້າ ຈັດວາງ, ສັບຊ້ອນຊັ້ນຄົນ ແລະ ຊື່ເອີ້ນກົມຊັ້ນຄົນ-ອົງການຈັດຕັ້ງສັງຄົມ ຂຶ້ນ ໂດຍການເປັນປະທານຂອງ ທ່ານ ຮສ.ດຣ ສົມອົກ ກິ່ງສະດາ ຮອງປະທານ ສນຊ,

​ເປັນ​ກຽດ​ເຂົ້າ​ຮ່ວມມີ ທ່ານ ຄໍາໃບ ດໍາລັດ ກໍາມະການສູນກາງພັກ, ບັນດາທ່ານຮອງປະທານ ສູນກາງແນວລາວສ້າງຊາດ, ຫົວໜ້າກົມ, ຮອງຫົວໜ້າກົມ, ຫົວໜ້າສູນຝຶກອົບຮົມ, ຫົວໜ້າພະແນກ ແລະ ຮອງຫົວໜ້າພະແນກ ສູນກາງແນວລາວສ້າງຊາດເຂົ້າ ຮ່ວມ ທີ່ຫ້ອງປະຊຸມໃຫຍ່ (ຊັ້ນ 2) ສນຊ ໃນວັນທີ 31 ພຶດສະພາ 2017 ນີ້,

ກອງປະຊຸມຄັ້ງນີ້ ເພື່ອເປັນການແລກປ່ຽນຄໍາຄິດຄໍາເຫັນ ກ່ຽວກັບວຽກງານກົມຊັ້ນຄົນ-ອົງການຈັດຕັ້ງສັງຄົມ ແລະ ການຊັບຊ້ອນຊັ້ນຄົນ, ຮັບຮູ້ ແລະ ເຂົ້າໃຈເປັນເອກະພາບກ່ຽວກັບຊັ້ນຄົນ ທີ່ມີຢູ່ໃນ ສປປ ລາວ ຊັ້ນຄົນຕ່າງໆ ໄດ້ມີບົດບາດສໍາຄັນໃຫຍ່ ຫຼວງ ແລະ ເປັນກໍາລັງແຮງທີ່ສໍາຄັນໃນການຊ່ວຍແບ່ງເບົາພາລະຂອງພັກ-ລັດ, ສູນກາງແນວລາວສ້າງຊາດ ໃນວຽກງານປຸກລະ ດົມ, ສຶກສາອົບຮົມ ແລະ ເຕົ້າໂຮມຄວາມສາມັກຄີທົ່ວປວງຊົນລາວບັນດາເຜົ່າ ເປັນກໍາລັງແຮງສັງລວມຢູ່ອ້ອມຂ້າງພັກ, ລວມທັງໄດ້ປະກອບສ່ວນເຂົ້າຮ່ວມໃນຂະບວນການຕໍ່ສູ້ກູ້ຊາດໃນເມື່ອກ່ອນ ກໍ່ຄືພາລະກິດປົກປັກຮັກສາ ແລະ ສ້າງສາພັດທະນາປະເທດ ຊາດໃນປັດຈຸບັນ.

ໃນພິທີໄດ້ຮັບຟັງການສະເໜີບົດສັງລວມຫຍໍ້ສາມາດຈັດຕັ້ງປະຕິບັດວຽກງານຊັ້ນຄົນ ໃນໄລຍະຜ່ານມາ; ບົດອະທິບາຍເຫດຜົນ ແລະ ຄວາມຈໍາເປັນໃນການຄົ້ນຄ້ວາ ຈັດວາງ, ຊັບຊ້ອນປະເພດຊັ້ນຄົນ ແລະ ຄວາມສໍານຶກໃນການນິຍາມຊັ້ນຄົນ. ຈາກນັ້ນ, ຜູ້ເຂົ້າຮ່ວມໄດ້ພ້ອມກັນປະກອບຄໍາຄິດຄໍາເຫັນຢ່າງຟົດຟື້ນ ຕາມຄໍາຖາມເຈາະຈີ້ມທີ່ປະທານກອງປະຊຸມໄດ້ວາງອອກແນໃສ່ໃຫ້ໄດ້ຄໍາເຫັນທີ່ຖຶກກັບຈຸດປະສົງ ແລະ ເປົ້າໝາຍໃນການຄົ້ນຄວ້າ, ຈັດວາງ ແລະ ຊັບຊ້ອນຊັ້ນຄົນ ແລະ ສຸດທ້າຍຍັງໄດ້ແລກປ່ຽນຄໍາເຫັນຕໍ່ການເອີ້ນຊື່ກົມ ທີ່ເໝາະສົມກັບສະພາບປັດຈຸບັນການນໍາພາຂອງພັກເຮົາອີກດ້ວຍ.

ໃນໂອກາດດັ່ງກ່າວນີ້ ທ່ານ ຮສ. ດຣ ສົມອົກ ກິ່ງສະດາ ໄດ້ໃຫ້ກຽດມີຄໍາເຫັນໂອລົມ ເຊິ່ງກ່ອນອື່ນໝົດທ່ານໄດ້ສະແດງຄວາມຂອບໃຈ ແລະ ຊົມເຊີຍຕໍ່ ຄະນະຮັບຜິດຊອບ ທີ່ໄດ້ພ້ອມກັນກະກຽມ ແລະ ຊົມເຊີຍທຸກທ່ານ ທີ່ໄດ້ເອົາໃຈໃສ່ມີຄໍາເຫັນແລກປ່ຽນບົດຮຽນ, ຂໍ້ມູນທີ່ກ່ຽວຂ້ອງ ແລະ ໄດ້ປະຕິບັດຕາມເນື້ອໃນຈິດໃຈ, ວາລະໄດ້ຕາມຄາດໝາຍທີ່ວາງໄວ້.