ໃນວັນທີ 2 ມິຖຸນາ 2022, ແນວລາວສ້າງຊາດເມືອງປາກງື່ມ ຮ່ວມກັບອົງການປົກຄອງເມືອງປາກງື່ມ ແລະ ກອງພັນ 512 ໄດ້ຈັດກິດຈະກໍາ ວັນປູກຕົ້ນໄມ້ແຫ່ງຊາດ ຂື້ນທີ່ກອງພັນ 512 ແລະ ໂຮງຮຽນວິຊາຊີບ ເມືອງປາກງື່ມ, ໂດຍການເປັນກຽດເຂົ້າຮ່ວມຂອງ ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ; ມີທ່ານຫົວໜ້າກອງພັນ 512, ທ່ານຮອງເຈົ້າເມືອງໆປາກງື່ມ, ອ້າຍນ້ອງທະຫານກອງພັນ 512, ກໍາມະການແນວເມືອງ, ແນວບ້ານ, ນາຍບ້ານອ້ອມຂ້າງ ພ້ອມດ້ວຍຄູອາຈານ ແລະ ນ້ອງນັກຮຽນ-ເຍົາວະຊົນ ເຂົ້າຮ່ວມ.

ໃນພິທີ ທ່ານ ກອງມີ ສີສະໝຸດ ຮອງເຈົ້າເມືອງ-ເມືອງປາກງື່ມ ໄດ້ລາຍງານໃຫ້ຮູ້ວ່າ ເບ້ຍໄມ້ທີ່ນໍາມາປູກໃນຄັ້ງນີ້ ມີຈໍານວນ 100 ກວ່າຕົ້ນ, ຊື່ງມີທັງປະເພດໄມ້ໃຫ້ໝາກ ແລະ ປະເພດໄມ້ອຸດສະຫະກໍາ.

ໃນໂອກາດນີ້ ສນຊ ໄດ້ນໍາເອົາເຄື່ອງຊ່ວຍເຫຼືອຈໍານວນໜຶ່ງມາມອບໃຫ້ເມືອງ, ບ້ານ ແລະ ກອງພັນ 512 ເປັນຕົ້ນ: ຜ້າອັດປາກ, ເຈວລ້າງມື, ນໍ້າດື່ມ, ແນວພັນໝາກເດືອຍ ແລະ ເບ້ຍໄມ້; ນອກຈາກນັ້ນ, ທ່ານ ບົວລະພາ ສັນຕິຄົງຄາ ກໍາມະການ ສນຊ ໄດ້ມອບເງິນສົດຈໍານວນ 5 ລ້ານກີບໃຫ້ກອງພັນ 512 ແລະ ອົງການປົກຄອງບ້ານພ້າວອີກດ້ວຍ.