ສູນກາງແນວລາວສ້າງຊາດ

Lao Front For National Development

ການເຄື່ອນໄຫວວຽກງານແນວລາວສ້າງຊາດແຂວງຫຼວງພະບາງ

ສຳ​ເລັດ​ກອງ​ປະຊຸມ​ຝຶກ​ອົບຮົ​ມວຽກ​ງານ​ສາສະໜາ ຢູ່​ເມືອງ​ພູ​ຄູນ ​ແຂວງ​ຫຼວງ​ພະ​ບາງ

ລະຫວ່າງ​ວັນ​ທີ 18-19 ຕຸລາ 2016 ນີ້ ສູນ​ກາງ​ແນວ​ລາວ​ສ້າງ​ຊາດ​ຮ່ວມ​ກັບ​ແນວ​ລາວ​ສ້າງ​ຊາດ​ແຂວງ ​ແລະ ​ແນວ​ລາວ​ສ້າງ​ຊາດ​ເມື​ອງພູ​ຄູນ ​ໄດ້​ຈັດ​ກອງ​ປະຊຸມ​ຝຶກ​ອົບຮົມ​ວຽກ​ງານ​ສາສະໜາ​ຂຶ້ນ ຢູ່​ທີ່​ສະ​ໂມ​ສອນ​ໃຫຍ່​ຂອງ​ເມືອງພູ​ຄູນ (​ເຊິ່ງ​ໄດ້​ຮັບ​ການ​ອຸປະຖຳ​ຈາກ​ສະ​ຖາ​ບັນ​ຮ່ວມ​ມື​ສາກົນ IGE.)

​​ເປັນ​ກຽດ​ເຂົ້າ​ຮ່ວມ​ກອງ​ປະຊຸມ​ມີ​ທ່ານ ຄຳ​ກາງ ຮ່ວງ​ທະ​ຈັນ, ຮອງ​ເລຂາ​ພັກ​ເມືອງ; ທ່ານ ຄຳ​ຢາດ ລາດ​ສະ​ດາ​ວົງ, ຮອງ​ຫົວໜ້າ​ກົມ​ສາສະໜາ ສູນ​ກາງ​ແນວ​ລາວ​ສ້າງ​ຊາດ, ທ່ານ​ ບຸນ​ທັນ ​ດວງ​ວິ​ໄລ​​ແກ້ວ, ຮອງ​ປະທານ​ແນວ​ລາວ​ສ້າງ​ຊາດ​ແຂວງຫຼວງ​ພະ​ບາງ, ຕາງ​ໜາ​ພະ​ແນ​ກພາຍ​ໃນ​ແຂວງ, ​ບັນດາ​ຫົວໜ້າ​ຫ້ອງການ ກົມ​ກອງ​ທີ່​ກ່ຽວຂ້ອງ​ຂອງ​ເມືອງ, ນາຍບ້ານ, ​ປະທານ​ແນວ​ລາວ​ສ້າງ​ຊາດ​ບ້ານ​ອ້ອມ​ຂ້າງ​ເທດສະບານ​ເມືອງ ​ແລະ ຜູ້​ສອນ​ສາສະໜາ​ຕ່າງໆ​ພາຍ​ໃນ​ເມືອງ​ເຂົ້າ​ຮ່ວມ​ລວມທັງ​ໜົດ 58 ທ່ານ ຍິງ 8 ທ່ານ. ​ໃນ​ວາລະ​ກອງ​ປະຊຸມ ທ່ານ ຄຳ​ຜຸຍ ກິນ​ດາ​ວົງ, ຄະນະ​ປະຈຳ​ພັກ​​ເມືອງ, ປະທານ​ແນວ​ລາວ​ສ້າງຊາດ​ເມືອງ​ພູ​ຄູນ ​ໄດ້​ຂຶ້ນ​ລາຍ​ງານ​ສະພາບ​ສະພາບ​ການຈັດ​ຕັ້ງ​ປະຕິບັດ​ວຽກ​ງານ​ສາສະໜາ​ຂອງ​ເມືອງ​ໃນ​ໄລຍະ​ຜ່ານ​ມາ​ໃຫ້​ທີ່​ປະຊຸມ​ໄດ້​ຮັບ​ຊາບ. ຈາກ​ນັ້ນ, ສຳ​ມະ​ນາກ​ອນກໍ່ໄດ້​ເຊື່ອມ​ຊຶມບັນດາ​ເນື້ອ​​ໃນ​ເອກະສານ​ຫຼັກ​ທີ່​ກ່ຽວຂ້ອງ​ກັບ​ການ​ປົກ​ປ້ອງ ​ແລະ ຄຸ້ມ​ຄອງ​ການ​ເຄື່ອນ​ໄຫວສາສະໜາ​ເຊັ່ນ: ໜຶ່ງ ສະພາບ​ການ​ເຄື່ອນ​ໄຫວ​ວຽກງານ​ສາສະໜາຢູ່​ແຂວງ​ຫຼວງ​ພະ​ບາງ, ດ້ານ​ດີ, ດ້ານ​ຄົງ​ຄ້າງ​ໃນ​ການ​ເຄື່ອນ​ໄຫວ​ຂອງ​ສາ​ສະໜາ, ສອງ ກົນອຸບາຍ​ຂອງ​ອິດ​ທິກຳລັງ​ປໍ​ລະ​ປັກທີ່​ສວຍ​ໃຊ້​ບັນຫາ​ສາສະໜາ, ສາມ ຄວາມ​ຮູ້​ພື້ນຖານ​ກ່ຽວ​ກັບ​ສາສະໜາຕ່າງໆຢູ່​ ສປປລາວ, ສີ່ ທັດສະນະ ​ແລະ ນະ​ໂຍບາຍ​ຂອງ​ພັກ​ຕໍ່​ວຽກ​ງານ​ສາ​ສະໜາ​, ຫ້າ ການ​ຄຸ້ມ​ຄອງ​ລັດ​ຕໍ່​ວຽກ​ງານ​ສາສະໜາ. ​ໂອກາດ​ເຂົ້າ​ຮ່ວມ​ກອງ​ປະຊຸມ​ສຳ​ມາ​ນາກ​ອນ​ຍັງ​ໄດ້​ປະກອບ​ຄຳ​ຄິດ​ຄຳ​ເຫັນ, ຂໍ້​ຂັດຂ້ອງ​ໝອງ​ໃຈ ​ແລະ ຄຳ​ສະ​ເໜີ​ແລກປ່ຽນຕໍ່​ທີ່​ປະຊຸມ​ຢ່າງ​ກົງ​ໄປ​ກົງ​ມາ ​ເພື່ອ​ຍາດ​ແຍ່ງ​ເອົາ​ບົດຮຽນ​ໃນ​ການ​ຄຸ້ມ​ຄອງ​ວຽກ​ງານ​ສາສະໜາ​ໃນ​ຂອບ​ເຂ​ດທ້ອງ​ຖິ່ນຮາກ​ຖານ​​ຕົນຮັບຜິດ ຊອບ​ໃຫ້​ຖືກຕ້ອງ​ຕາມ​ແນວທາງ​ຂອງ​ພັກ ​ແລະ ລະບຽບ​ກົດ​ໝາຍ​ຂອງ​ລັດ​ໃຫ້​ໄດ້​ຮັບ​ໝາກຜົນ​ດີກ​ວ່າ​ເກົ່າ.

ຕອນ​ທ້າ​ຍພິທີທ່ານ ວຽງ​ທອງ ຫັດສະ​ຈັນ, ກຳມະການ​ພັກ​ແຂວງ, ​ເລຂາ​ພັກ​ເມືອງ, ​ເຈົ້າ​ເມືອງ​ພູ​ຄູນ​ກໍ່​ໄດ້​ໃຫ້​ກຽດ​ເຂົ້າ​ຮ່ວມ​ກອງ​ປະຊຸມ ​ແລະ ມີ​ຄຳ​ເຫັນ​ໂອ້​ລົມຕໍ່​ພິທີ​ ​ເຊິ່ງ​ເນື້ອ​ໃນ​ບາງ​ຕອນ​ທ່ານ​ໄດ້​ເນັ້ນ​ໜັກ​ໃຫ້​ຜູ້​ແທນ​ກອງ​ປະຊຸມ ​ໂດຍ​ສະ​ເພາະ​ແມ່ນ​ພະນັກງານ​ທີ່​ກ່ຽວຂ້ອງ​ຂອງ​ເມືອງ, ອົງການ​ປົກຄອງ​ບ້ານ ​ແລະ ຜູ້​ສອນ​ສາສະໜາ​ຕ່າງໆ​ຈົ່ງ​ນຳ​ເອົາ​ເນື້ອ​ໃນ​ຈິດ​ໃຈ​ບົດຮຽນອັນ​ສຳ​ຄັນ​ໃນ​ການ​ຝຶກ​ອົບຮົມ​ຄັ້ງ​ນີ້​ໄປຈັດ​ຕັ້ງ​ປະຕິບັດ​ຢູ່ກົມ​ກອງ ​ແລະ ​ທ້ອງ​ຖິ່ນ​ຮາກ​ຖານ​ຂອງ​ຕົນ​ໃຫ້​ໄດ້​ຮັບ​ຜົນ​ດີ, ຮັບປະກັນ​ໄດ້​ຄວາມ​ສາມັກຄີ​ປອງ​ດອງ​ລະຫວ່າງ​ຊົນ​ເຜົ່າ, ສາສະໜາຕ່າງໆ​ພາຍ​ໃນ​ເມືອງ, ​ພ້ອມ​ກັນປະກອບສ່ວນ​​ໃນ​ພາລະກິດ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ເມືອງ​ພູ​ຄູນ​ໃຫ້​ຈະ​ເລີ​ນກ້າວໜ້າ​ຍິ່ງໆ​ຂຶ້ນ.

info@lfnd.org.la | 021 213754 | (856-21) 453191