ເນື່ອງໃນໂອກາດວັນສ້າງຕັ້ງສະຫະພັນແມ່ຍິງລາວ ຄົບຮອບ 66 ປີ(20 ກໍລະກົດ 2021) ແລະເປັນການສ້າງຂະບວນການຕ້ອນຮັບວັນສໍາຄັນຂອງພັກຂອງຊາດ ໃນເດືອນ ສິງຫາ ທີ່ຈະມາເຖິງນີ້ເປັນຕົ້ນ: ວັນສ້າງຕັ້ງແນວລາວສ້າງຊາດ ແລະວັນສ້າງຕັ້ງສື່ມວນຊົນລາວ ຄົບຮອບ 71 ປີ, ວັນປະກາດໃຊ້ລັດຖະທໍາມະນູນແຫ່ງຊາດ ຄົບຮອບ 30 ປີ (15 ສິງຫາ) ແລະວັນຢຶດອໍານາດ 23 ສິງຫາ ຄົບຮອບ 46 ປີ ສະຫະພັນແມ່ຍິງ ສູນກາງແນວລາວສ້າງຊາດ (ສນຊ) ນໍາໂດຍທ່ານ ນາງ ແພງພັນ ບຸບຜາພອນ ຫົວໜ້າກົມໂຄສະນາ, ປະທານສະຫະພັນແມ່ຍິງ ສນຊ ໄດ້ຈັດກິດຈະກໍາຕອບບຸນແທນຄຸນ ຕໍ່ພະນັກງານການນໍາອາວຸໂສບໍານານ, ອະດີດຄະນະບໍລິຫານງານສະຫະພັນແມ່ຍິງ ສນຊ ແລະພັນລະຍາອະດີດ ປະທານ ສນຊ ແຕ່ລະສະໄໝ.

ການຈັດກິດຈະກໍາດັ່ງກ່າວເປັນການສະແດງເຖິງຄວາມຮູ້ບຸນຄຸນ ແລະຂອບໃຈເປັນຢ່າງຍິ່ງ ຕໍ່ພວກເພິ່ນທີ່ໄດ້ສ້າງຜົນງານປະໄວ້ ແລະພວກເພິ່ນໄດ້ປະກອບສ່ວນສະໜັບສະໜູນການເຄື່ອນໄຫວວຽກງານສະຫະພັນແມ່ຍິງ ສນຊ ຕະຫລອດມາ ພ້ອມກັນນັ້ນ, ພວກເພິ່ນຍັງໄດ້ກໍ່ສ້າງ ແລະສຶກສາອົບຮົມແນວຄິດແມ່ຍິງຮຸ່ນຫນຸ່ມ ໃຫ້ເຊື່ອໝັ້ນຕໍ່ການນໍາພາຂອງພັກ, ປະກອບສ່ວນຢ່າງເປັນເຈົ້າການໃນການປະຕິບັດວຽກງານວິຊາສະເພາະຕາມພາລະບົດບາດ, ສຶກສາອົບຮົມແມ່ຍິງລາວ ໃຫ້ຮັກສາຮີດຄອງປະເພນີອັນດີງາມຂອງຊາດ, ເຂົ້າຮ່ວມຂະບວນການຕ່າງໆ ທີ່ຖືກມອບໝາຍໃຫ້ສໍາເລັດຜົນ ແລະສ້າງໃຫ້ສະມາຊິກແມ່ຍິງ ສນຊ ຮຸ່ນໃໝ່ໄດ້ສືບສານຕໍ່ໄປ.  ກິດຈະກໍາດັ່ງກ່າວໄດ້ຈັດຂຶ້ນຢູ່ເຮືອນຂອງພວກເພິ່ນ ໃນລະຫວ່າງ ວັນທີ 28-30 ກໍລະກົດ 2021 ນີ້.