ສູນກາງແນວລາວສ້າງຊາດ

Lao Front For National Development

ກຸ່ມນາງາມ ເມືອງໄຊ ແຂວງອຸດົມໄຊ ຈັດພິທີປະກາດຮັບຮອງຄອບຄົວ ແລະ ບ້ານສາມັກຄີປອງດອງ

ໃນວັນທີ 15 ທັນວາ 2020 ທີ່ຜ່ານມານີ້ ຢູ່ໂຮງຮຽນມັດທະຍົມສົມບູນບ້ານນາງາມ ເມືອງໄຊ ແຂວງອຸດົມໄຊ ໄດ້ຈັດພິທີປະກາດຮັບຮອງກຸ່ມນາງາມ ຈຳນວນ 6 ບ້ານຄື: ບ້ານນາງາມ, ບ້ານນາອ້ອມ, ບ້ານ ຫ້ວຍອຸ່ນ, ບ້ານ ທ່າສະເລື່ອງ, ມົກຈາກ ແລະ ບ້ານ ລາງ ເປັນຄອບຄົວ ແລະ ບ້ານສາມັກຄີປອງດອງ ຂື້ນຢ່າງເປັນທາງການ, ໂດຍການເປັນປະທານຂອງທ່ານ ຄຳແພງ ທະວີແສງ ກຳມະການແນວລາວສ້າງຊາດເມືອງ, ເລຂາຄະນະພັກຮາກຖານກຸ່ມນາງາມ,  ເປັນກຽດ​ເຂົ້າ​ຮ່ວມ​ພິທີໃນ​ຄັ້ງ​ນີ້​ມີ ທ່ານ ນາງ ຈັນທະຈອນ ດວງສຸກ ກຳມະການແນວລາວສ້າງຊາດແຂວງ ຮອງປະທານແນວລາວສ້າງຊາດແຂວງ, ຄະນະປະຈຳພັກເມືອງ, ປະທານແນວລາວສ້າງຊາດເມືອງ ຜູ້ຊີ້ນຳວຽກງານອົງການຈັດຕັ້ງມະຫາຊົນ,  ອົງການ​ປົກຄອງ​ບ້ານ, ປະທານແນວ​ບ້ານ, ເຖົ້າແກ່ແນວໂຮມ ​ແລະ ຕາງໜ້າປະຊາຊົນເຂົ້າຮ່ວມທັງໝົດ 73​ ທ່ານ, ຍິງ 30 ທ່ານ.

ໃນພິທີທ່ານ ຄຳແພງ ທະວີແສງ ກຳມະການແນວລາວສ້າງຊາດເມືອງ  ເລຂາຄະນະພັກຮາກຖານກຸ່ມນາງາມ ໄດ້ຂຶ້ນຜ່ານບົດສະຫຼຸບການສ້າງຄອບຄົວ ແລະ ບ້ານສາມັກຄີປອງດອງ ໃນໄລຍະຜ່ານມາ ທ່ານໄດ້ຍົກໃຫ້ເຫັນເຖິງການຈັດຕັ້ງຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂອງແນວລາວສ້າງຊາດ, ການປະຕິບັດຄຳແນະນຳສະບັບເລກທີ 033/ຄປຈ.ສນຊ ລົງວັນທີ 19 ເມສາ 2017 ວ່າດ້ວຍການຈັດຕັ້ງຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ຄ່ຽງຄູ່ກັບຂະບວນການແຂ່ງຂັນຮັກຊາດ ແລະ ພັດທະນາ. ນອກນັ້ນ ທ່ານຍັງໄດ້ແນະນຳໃຫ້ພໍ່ແມ່ປະຊາຊົນບັນດາເຜົ່າ ໃຫ້ມີຄວາມສາມັກຄີຮັກແພງ, ຊ່ວຍເຫຼື່ອເຊິ່ງກັນ ແລະ ກັນ, ມີຄວາມຮັບຮູ້ເຊື່ອມຊືມຕໍ່ແນວທາງນະໂຍບາຍຂອງພັກ-ລັດ, ປະຊາຊົນມີຄວາມຕື່ນຕົວທາງດ້ານການເມືອງ ແລະ ໃຫ້ສຶກສາອົບຮົມລູກຫຼານຂອງຕົນ. ໃນພິທີໄດ້ມອບ-ຮັບໃບຢັ້ງຢືນຄອບຄົວ ແລະ ບ້ານສາມັກຄີປອງດອງ ໃຫ້ແກ່ການປົກຄອງບ້ານ ແລະ ຄອບຄົວ.

ໃນຕອນທ້າຍຂອງພິທີໄດ້ຮັບຟັງການໂອ້ລົມຂອງ ທ່ານ ນາງ ຈັນທະຈອນ ດວງສຸກ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຈັດຕັ້ງປະຕິບັດຂອງເມືອງ ເວົ້າສະເພາະກໍ່ແມ່ນຄະນະພັກ, ພໍ່ແມ່ປະຊາຊົນພາຍໃນກຸ່ມນາງາມທີ່ຍາດມາໄດ້ ແລະ ໄດ້ປະກາດເປັນຄອບຄົວ ແລະ ບ້ານສາມັກຄີປອງດອງ ໃນຄັ້ງນີ້, ຄ່ຽງຄູ່ກັນນັ້ນ, ທ່ານຍັງໄດ້ຮຽກຮ້ອງໃຫ້ຄະນະພັກ, ຄະນະຮັບຜິດຊອບຂະບວນການສ້າງຄອບຄົວ ແລະ ບ້ານສາມັກຄີປອງດອງ ສຶບຕໍ່ຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍ ແລະ ແຜນພັດທະນາເສດຖະກິດ-ສັງຄົມຂອງລັດ, ມະຕິກອງປະຊຸມໃຫ່ຍຜູ້ແທນທົ່ວປະເທດຂອງແນວລາວສ້າງຊາດ ໃນແຕ່ລະໄລຍະ, ປຸກລະດົມກໍາລັງແຮງທົ່ວປວງຊົນ ເຂົ້າຮ່ວມປະຕິບັດ 2 ໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ, ຮັດແໜ້ນຄວາມສາມັກຄີ, ຄວາມເປັນເອກະພາບຂອງປະຊາຊົນລາວບັນດາເຜົ່າ, ຊັ້ນຄົນ, ສາສະໜາ ແລະ ເພດ-ໄວ ໂດຍເລິ່ມຈາກຄອບຄົວ ແລະ ຮາກຖານບ້ານ, ເຊິ່ງເປັນປັດໄຈສຳຄັນໃນການເສີມສ້າງສະຖຽນລະພາບ, ຄວາມສະຫງົບ ແລະ ຄວາມມັ່ງຄັ່ງເຂັ້ມແຂງຂອງຊາດ.

info@lfnd.org.la | 021 213754 | (856-21) 453191