ສູນກາງແນວລາວສ້າງຊາດ

Lao Front For National Development

ກຸ່ມບ້ານສີເກີດ ເປັນບ້ານສາມັກຄີປອງດອງ

ພິທີຮັບຮອງກຸ່ມບ້ານສີເກີດເປັນບ້ານສາມັກຄີປອງດອງ ໄດ້ຈັດຂຶ້ນໃນວັນທີ 22 ກັນຍາ 2020 ນີ້, ທີ່ວັດບ້ານສີເກີດ ເມືອງນາຊາຍທອງ ນະຄອນຫຼວງວຽງຈັນ, ໂດຍການເປັນປະທານຂອງທ່ານ ເພັດສະຫວັນ ວິມະລາວົງ ຄະນະປະຈໍາພັກເມືອງ, ປະທານແນວລາວສ້າງຊາດ ເມືອງນາຊາຍທອງ, ໂດຍເປັນກຽດເຂົ້າຮ່ວມຂອງທ່ານ ຖະໝອມ ທໍາທອງ ກຳມະການສູນກາງແນວລາວສ້າງຊາດ, ປະທານແນວລາວສ້າງຊາດ ນະຄອນຫຼວງວຽງຈັນ, ມີອົງການປົກຄອງບ້ານ ພ້ອມດ້ວມປະຊາຊົນຂອງກຸ່ມບ້ານດັ່ງກ່າວ ເຂົ້າຮ່ວມ.

ໃນພິທີ ທ່ານ ແກ້ວ ແສນວິໄລ ຮອງປະທານແນວລາວສ້າງຊາດ ກຸ່ມບ້ານສີເກີດ ໄດ້ລາຍງານຜົນການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາດຂອງປະຊາຊົນລາວບັນດາເຜົ່າ ຕະຫຼອດໄລຍະຜ່ານມາ ເຊິ່ງທ່ານ ໄດ້ໃຫ້ຮູ້ວ່າກຸ່ມບ້ານດັ່ງກ່າວປະກອບມີ 8 ບ້ານຄື: ບ້ານສີເກີດ, ດົງຊຽງດີ, ນາສ້ຽວ, ຜາງແຫ້ງ, ໄຊມຸງຄຸນ, ໂພນແກ້ວ, ໂພນສະຫວັນ ແລະ ບ້ານ ນາລ່ຽນ. ໄລຍະຜ່ານມາແນວລາວສ້າງຊາດເມືອງ ໄດ້ສົມທົບກັບອົງການປົກຄອງບ້ານ ໄດ້ນຳເອົາບັນດາມາດຖານຂອງການສ້າງຄອບຄົວ ແລະ ບ້ານສາມັກຄີປອງດອງ ໄປເຜີຍແຜ່ ສຶກສາອົບຮົມ ໃຫ້ປະຊາຊົນແຕ່ລະຄອບຄົວ ໄດ້ຮັບຮູ້, ເຊື່ອມຊຶມ ແລະ ພ້ອມກັນຈັດຕັ້ງປະຕິບັດ, ໄດ້ມີແຜນການເປັນໄລຍະ ແລະ ລົງຕິດຕາມກວດກາ ເພື່ອປະເມີນຜົນໄດ້ຮັບຕົວຈິງ ໃນແຕ່ລະມາດຖານຂອງບ້ານສາມັກຄີປອງດອງ. ໃນໄລຍະຜ່ານມາປະຊາຊົນ ມີຄວາມຕື່ນຕົວທາງດ້ານການເມືອງ, ມີສະຕິຕໍ່ການຈັດຕັ້ງປະຕິບັດລະບຽບກົດໝາຍ, ມີຄວາມສາມັກຄີປອງດອງກັນ, ເຄົາລົບນັບຖືໃຫ້ກຽດເຊິ່ງກັນ ແລະ ກັນ, ມີນ້ຳໃຈເອື້ອເຟື້ອເພື່ອແຜ່ ແລະ ປົກປັກຮັກສາວັດທະນະທຳ-ຮີດຄອງປະເພນີອັນດີງາມທີ່ເປັນເອກະລັກຂອງແຕ່ລະຊົນເຜົ່າ ເຊິ່ງມາຮອດປະຈຸບັນການປະເມີນກຸ່ມບ້ານສີເກີດເປັນບ້ານສາມັກຄີ ແມ່ນສຳເລັດ ແລະ ມອບໃບຢັ້ງຢືນແລ້ວທຸກບ້ານ. ພ້ອມກັນນີ້ ກໍໄດ້ມອບໃບຢັ້ງຢືນບ້ານສາມັກຄີປອງດອງໃຫ້ກຸມບ້ານດັ່ງກ່າວ ແລະ ມອບຫຼຽນກາລະນຶກ 70 ປີ ວັນສ້າງຕັ້ງແນວລາວສ້າງຊາດ ໃຫ້ບຸນຄົນທີ່ມີຜົນງານດີເດັ່ນເຂົ້າໃນການປະກອບສ່ວນວຽກງານຂອງແນວລາວສ້າງຊາດ.

ໂອກາດນີ້, ທ່ານປະທານແນວລາວສ້າງຊາດ ນະຄອນຫຼວງວຽງຈັນ ໄດ້ຫວນຄືນມູນເຊື້ອການກຳເນີດເຕີບໃຫຍ່ຂະຫຍາຍຕົວ ຂອງອົງການແນວລາວສ້າງຊາດ ຕະຫຼອດໄລຍະ 70 ປີຜ່ານມາ. ພ້ອມດຽວກັນນີ້, ທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວ ຂອງແນວລາວສ້າງຊາດເມືອງ, ອົງການປົກຄອງບ້ານ ແລະ ພໍ່ແມ່ປະຊາຊົນທີ່ສາມາດຍາດໄດ້ຜົນງານທີ່ພົ້ນເດັ່ນ ແລະ ເຮັດໃຫ້ແຕ່ລະບ້ານໄດ້ຮັບນາມມະຍາດເປັນບ້ານສາມັກຄີປອງດອງ ແລະ ທ່ານ ຍັງໄດ້ເນັ້ນຕື່ມວ່າ: ຄວາມສາມັນຄີປອງດອງແມ່ນຜົນສຳເລັດຂອງວຽກງານທຸກປະການ ສະນັ້ນໃຫ້ແຕ່ລະຄອບຄົວຈົ່ງສືບຕໍ່ຮັກສາຄວາມສາມັກຄີອັນເປັນມູນເຊື້ອ ຂອງປະຊາຊົນລາວບັນດາເຜົ່າໄວ້; ໃຫ້ແນວລາວສ້າງຊາດ ເມືອງເມືອງ ແລະ ອົງການປົກຄອງຂອງກຸ່ມບ້ານດັ່ງກ່າວສືບຕໍ່ຊີ້ນຳ-ນຳພາ ຢ່າງໃກ້ສິດ, ສຶບຕໍ່ເຜີຍແຜ່ແນວທາງນະໂຍບາຍຂອງພັກ-ລະບຽບກົດໝາຍຂອງລັດ, ນິຕິກຳຕ່າງໆແນວລາວສ້າງຊາດ ໃຫ້ປະຊາຊົນໄດ້ຮັບຮູ້ຢ່າງທົ່ວເຖິງ, ຊຸກຍູ້ໃຫ້ຄອບຄົວ ແລະ ບ້ານ ທີ່ໄດ້ຮັບໃບຢັ້ງຢືນໃນຄັ້ງນີ້ໃຫ້ຮັກສາມູນເຊື້ອນາມມະຍົດຄອບຄົວ ແລະ ບ້ານສາມັກຄີປອງດອງ ດັ່ງກ່າວຕະຫຼອດໄປ.]

info@lfnd.org.la | 021 213754 | (856-21) 453191