ສູນກາງແນວລາວສ້າງຊາດ

Lao Front For National Development

ກຸ່ມບ້ານໂພນໂຮມ ປະກາດຮັບຮອງບ້ານສາມັກຄີປອງດອງ ຈຳນວນ 3 ​ບ້ານ

ໃນວັນທີ 2 ເມສາ 2021  ຢູ່ໂຮງຮຽນປະຖົມສົມບູນບ້ານນໍ້າວຶນ ເມືອງໄຊ ແຂວງອຸດົມໄຊ  ໄດ້ຈັດພິທີປະກາດຮັບຮອງກຸ່ມບ້ານໂພນໂຮມ ຈຳນວນ 3 ບ້ານຄື: ບ້ານນໍ້າວຶນ, ບ້ານຫ້ວຍລະອົງ ແລະ ບ້ານຫ້ວຍເຮ້ຍ ເປັນຄອບຄົວ ແລະ ບ້ານສາມັກຄີປອງດອງ, ເປັນກຽດ​ເຂົ້າ​ຮ່ວມ​ພິທີໃນ​ຄັ້ງ​ນີ້​ມີ ທ່ານ ນາງ ຈັນທະຈອນ ດວງສຸກ ຄະນະປະຈໍາແນວລາວສ້າງຊາດແຂວງ ຮອງປະທານແນວລາວສ້າງຊາດແຂວງອຸດົມໄຊ, ມີທ່ານ ຄຳດາ ຟົງມະນີ ກໍາມະການປະຈຳພັກເມືອງ ປະທານແນວລາວສ້າງຊາດເມືອງໄຊ, ​ມີ​ແຂກ​ເຊີນ, ອົງການ​ປົກຄອງ​ບ້ານ ພ້ອມດ້ວຍ ປະຊາຊົນຂອງ 3 ບ້ານເຂົ້າຮ່ວມ.

ໃນພິທີທ່ານ ຈັນທີ ແກ້ວປະເສີດ ຄະນະພັກຮາກຖານ ເລຂາໜ່ວຍພັກ ນາຍບ້ານ-ບ້ານ ນ້ຳວຶນ  ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງໃນໄລຍະຜ່ານມາ ແລະ ຜ່ານທິດທາງແຜນການໃນຕໍ່ໜ້າ, ເຊິ່ງໄດ້ໃຫ້ຮູ້ວ່າສາມບ້ານດັ່ງກ່າວມີ 228 ຫຼັງຄາເຮືອນ, ມີ 275 ຄອບຄົວ, ປະກອບມີ 1 ຊົນເຜົ່າຄື: ເຜົ່າກືມມຸ. ຜ່ານການຈັດຕັ້ງປະຕິບັດຄຳແນະນຳ ສະບັບເລກທີ 033/ຄປຈ.ສນຊ ວ່າດ້ວຍການຈັດຕັ້ງຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ຕິດພັນກັບການສ້າງຂະບວນການແຂ່ງຂັນຮັກຊາດ ແລະ ພັດທະນາ ສາມາດສຶກສາອົບຮົມ ປະຊາຊົນບັນດາເຜົ່າໃຫ້ມີຄວາມສາມັກຄີຮັກແພງ, ຊ່ວຍເຫຼື່ອເຊິ່ງກັນ ແລະ ກັນ, ມີຄວາມຮັບຮູ້ເຊື່ອມຊືມຕໍ່ແນວທາງນະໂຍບາຍຂອງພັກ-ລັດ, ປະຊາຊົນມີຄວາມຕື່ນຕົວທາງດ້ານການເມືອງສູງ.

ຜ່ານການປະເມີນການສ້າງຄອບຄົວ ແລະ ບ້ານສາມັກຄີປອງດອງທັງ 3 ບ້ານ ບັນລຸ 95% ຂຶ້ນໄປ, ໃນພິທີໄດ້ມອບ-ຮັບ ໃບຢັ້ງຢືນຄອບຄົວ ແລະ ບ້ານສາມັກຄີປອງດອງໃຫ້ແກ່ອົງການປົກຄອງບ້ານ  ແລະ  ຄອບຄົວ. ພ້ອມກັນນັ້ນ ຍັງໄດ້ປະດັບຫຼຽນກາລະນຶກ 70 ປີ  ແລະ  ມອບໃບຍ້ອງຍໍ ສູນກາງແນວລາວສ້າງຊາດໃຫ້ແກ່ບຸກຄົນທີ່ມີຜົນງານປະກອບສວນເຂົ້າໃນວຽກງານແນວລາວສ້າງຊາດ ໃນໄລຍະ 10 ປີຜ່ານມາ ຈຳນວນ 3 ທ່ານ.

ໃນຕອນທ້າຍ ທ່ານ ນາງ ຈັນທະຈອນ ດວງສຸກ ໄດ້ຮຽກຮ້ອງໃຫ້ ຄະນະພັກ, ອົງການປົກຄອງ, ແນວລາວສ້າງຊາດ ຄະນະຮັບຜິດຊອບຂະບວນການສ້າງຄອບຄົວ ແລະ ບ້ານສາມັກຄີປອງດອງ ສຶບຕໍ່ຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍ ແລະ ແຜນພັດທະນາເສດຖະກິດ-ສັງຄົມ ຂອງລັດ ໂດຍສະເພາະແມ່ນການຈັດຕັ້ງປະຕິບັດ 4 ມາດຖານຄອບຄົວສາມັກຄີປອງດອງ ແລະ 5 ມາດຖານຂອງການສ້າງບ້ານສາມັກຄີປອງດອງ, ທ່ານໄດ້ຍົກໃຫ້ເຫັນການສ້າງກອງທຶນພັດທະນາບ້ານ, ການຕິດຕາມກວດກາສະພາບພາຍໃນບ້ານໃຫ້ມີຄວາມສະຫງົບ, ປຸກລະດົມປະຊາຊົນບັນດາເຜົ່າພາຍໃນບ້ານ ເຂົ້າຮ່ວມປະຕິບັດ 2 ໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ, ຮັດແໜ້ນຄວາມສາມັກຄີ, ຄວາມເປັນເອກະພາບຂອງປະຊາຊົນລາວບັນດາເຜົ່າ, ຊັ້ນຄົນ, ສາສະໜາ ແລະ ເພດ-ໄວ ໂດຍເລີ່ມຈາກຄອບຄົວ ແລະ ຮາກຖານບ້ານ, ເຊິ່ງເປັນປັດໄຈສຳຄັນໃນການເສີມສ້າງສະຖຽນລະພາບ, ຄວາມສະຫງົບ ແລະ ຄວາມມັ່ງຄັ່ງເຂັ້ມແຂງຂັ້ນຮາກຖານໃຫ້ດີຂື້ນເລື້ອຍໆ ເພື່ອຮັບປະກັນໃຫ້ແກ່ການສ້າງເສດຖະກິດຄອບຄົວສາມາດຫຼຸດພົ້ນອອກຈາກຄວາມທຸກຍາກ ໄດ້ຕາມຄາດໝາຍຂອງແຂວງວາງອອກ.

info@lfnd.org.la | 021 213754 | (856-21) 453191