ສູນກາງແນວລາວສ້າງຊາດ

Lao Front For National Development

ຂະບວນການອອກແຮງງານ ເພື່ອຂໍ່ານັບຮັບຕ້ອນ ແລະ ສະເຫຼີມສະຫຼອງວັນກຳມະກອນສາກົນ ຄົບຮອບ 138 ປີ.

ເພື່ອເປັນການສ້າງຂະບວນການ ຂ່ຳນັບຮັບຕ້ອນ ແລະ ສະເຫຼີມສະຫຼອງວັນກຳມະກອນສາກົນ ຄົບຮອບ 138 ປີ (1 ພຶດສະພາ 1886 ຫາ 1 ພຶດສະພາ 2024) ໃຫ້ມີບັນຍາກາດ ພ້ອມທັງປູກຈິດສຳນຶກໃຫ້ສະມາຊິກກຳມະບານ, ກຳມະກອນ ແລະ ຜູ້ອອກແຮງງານ ຮັກສາໄດ້ຄວາມສະອາດ, ຮັກໃນການອອກແຮງງານ. ດັ່ງນັ້ນ, ສູນກາງແນວລາວສ້າງຊາດ ສນຊ ຈັດກິດຈະກຳອອກແຮງງານລວມ ໃນວັນທີ 30 ເມສາ 2024 ທີ່ສໍານັກງານ ສນຊ. ເຊິ່ງນໍາພາໂດຍທ່ານ ຄໍາຢາດ ຣາຊດາວົງ ປະທານສະຫະພັນກໍາມະການ ສນຊ, ເປັນກຽດເຂົ້າຮ່ວມຂອງທ່ານ ດຣ ນາງ ອິນລາວັນ ແກ້ວບຸນພັນ ກຳມະການສູນກາງພັກ ຮອງປະທານ ສນຊ, ມີບັນດາທ່ານຮອງປະທານ ສນຊ, ມີບັນດາທ່ານຫົວໜ້າ-ຮອງຫ້ອງການ, ກົມ ແລະ ຄະນະບໍລິຫານງານ ກຳມະບານ ສນຊ ພ້ອມດ້ວຍສະມາຊິກຳມະບານ ສນຊ ເຂົ້າຮ່ວມເປັນຂະບວນການຟົດຟື້ນ.
ຂະບວນການອອກແຮງງານຄັ້ງນີ້, ຜູ້ເຂົ້າຮ່ວມໄດ້ພ້ອມກັນທໍາຄວາມສະອາດ, ປັດກວດ, ເກັບຂີ້ເຫຍື້ອ ຕາມບໍລິເວນ ສໍານັກງານ ສນຊ ແລະ ແຄມທາງ. ຈຸດປະສົງຂອງການອອກແຮງງານ ເພື່ອເຮັດໃຫ້ສະຖານທີ່ສາທາລະນະ, ສຳນັກງານ, ອົງການ, ສະຖານທີ່ເຮັດວຽກ ມີຄວາມສະອາດງາມຕາ ພ້ອມທັງຮັກສາສິ່ງແວດລ້ອມທີ່ດີ ແລະ ເພື່ອເປັນການປູກຈິດສຳນຶກໃຫ້ພະນັກງານສະມາຊິກກຳມະບານ, ກຳມະກອນ ແລະ ຜູ້ອອກແຮງງານ ຮັກສາຄວາມສະອາດອິກດ້ວຍ.
ບກ: ໄພຈິດ
ຂ່າວ+ພາບ: ລີ
info@lfnd.org.la | 021 213754 | (856-21) 453191