ໃນພິທີພົບປະ, ທ່ານປະທານແນວໂຮມປະເທດຊາດຫວຽດນາມ ແຂວງ ເຫງະອານ ໄດ້ສະແດງຄວາມຍິນດີຕ້ອນ ຮັບຢ່າງອົບອຸ່ນ ແລະ ໄດ້ລາຍງານໂດຍຫຍໍ້ກ່ຽວກັບວຽກງານແນວໂຮມຂອງແຂວງ ໃນໄລຍະຜ່ານມາ ເຊິ່ງໄດ້ໃຫ້ຮູ້ວ່າ ແນວໂຮມປະເທດຊາດຫວຽດນາມ ແຂວງ ເຫງະອານ ໄດ້ເອົາໃຈໃສ່ຊຸກຍູ້ປຸກລະດົມຄວາມສາມັກຄີກັນປອງດອງຂອງ ປະຊາ ຊົນບັນດາເຜົ່າພາຍໃນທົ່ວແຂວງ; ໂດຍສະເພາະ, ການປຸກລະດົມພາກສ່ວນຕ່າງໆ ເພື່ອປະກອບສ່ວນເຂົ້າໃນການຊ່ວຍເຫຼືອປະຊາຊົນຜູ້ທີ່ທຸຸກຍາກຢູ່ເຂດຫ່າງໄກສອກຫຼີກ-ຊົນນະບົດ ເຊິ່ງໄດ້ປຸກເຮືອນໃຫ້ປະຊາຊົນທີ່ທຸກຍາກ ທັງໝົດ 8 ພັນກວ່າຫຼັງ, ເຊິ່ງບັນລຸໄດ້ 52 ຂອງແຜນງານປະຈຳປີ. ພ້ອມດຽວກັນນັ້ນ, ຍັງໄດ້ປຸກລະດົມທຶນ ເພື່ອຊ່ວຍເຫຼືອປະຊາຊົນທີ່ປະສົບກັບອຸທົກກະໄພ ໄດ້ 3 ພັນກວ່າຄົນ; ປຸກລະດົມປະຊາຊົນຊາວຫວຽດນາມ ນຳໃຊ້ຜະລິດຕະພັນຂອງປະເທດຕົນເອງ ແລະ ໄດ້ປຸກລະດົມໃຫ້ປະຊາຊົນທຳການຜະລິດກະສິກຳເປັນສິນຄ້າອີກດ້ວຍ.

ທ່ານ ຮອງປະທານ ຜູ້ບໍ່ປະຈຳການ ສູນກາງແນວລາວສ້າງຊາດ ສະແດງຄວາມຂອບໃຈຕໍ່ການຕ້ອນຮັບ ຢ່າງອົບອຸ່ນ ຂອງຄະນະກຳມະການແນວໂຮມປະເທດຊາດຫວຽດນາມ ແຂວງ ເຫງະອານ; ເຊິ່ງທ່ານ ໄດ້ຍົກໃຫ້ເຫັນສະພາບລວມໃນການເຄື່ອນໄຫວວຽກງານ ກອງທຶນສາມັກຄີພັດທະນາ ຂອງແນວລາວສ້າງຊາດ ໃນໄລຍະຜ່ານມາ ເຊິ່ງໄດ້ສົ່ງເສີມໃຫ້ປະຊາ ຊົນທຳການຜະລິດກະສິກຳເປັນສິນຄ້າ ເພື່ອສ້າງລາຍຮັບໃຫ້ແກ່ຄອບຄົວ ແລະ ແກ້ໄຂຊີວິດການເປັນຂອງປະຊາຊົນ ໃຫ້ນັບມື້ດີຂື້ນເທື່ອລະກ້າວ. ພ້ອມກັນນັ້ນ, ທ່ານຍັງໄດ້ສະເໜີໃຫ້ແຂວງ ເຫງະອານ ສືບຕໍ່ຊ່ວຍເຫຼືອທາງດ້ານວິຊາການ ດ້ານການກະເສດ ເພື່ອມາຊ່ວຍວິໄຈດິນ ທຳການຜະລິດຢູ່ ສປປ ລາວ; ໂດຍສະເພາະ ແມ່ນຢູ່ບັນດາແຂວງພາກເໜືອ ທີ່ມີສາຍແດນຕິດຈອດກັບ ສສ ຫວຽດນາມ ແລະ ແຂວງແຮກສ່ຽວກັບແຂວງເຫງະອານ ພ້ອມທັງຊ່ວຍຍົກລະດັບວຽກງານວິຊາການ ໃຫ້ພະນັກງານຮັບຜິດຊອບວຽກງານກະສິກຳຂອງ ສປປ ລາວ; ສະເໜີໃຫ້ບັນດາແຂວງແຮກສ່ຽວ ສືບຕໍ່ຈັດຕັ້ງຜັນຂະຫຍາຍບົດບັນທຶກການຮ່ວມມືຢູ່ຂັ້ນແຂວງ ໃຫ້ໄດ້ຮັບຜົນສຳເລັດຫລາຍຂື້ນກວ່າເກົ່າ. ຫລັງຈາກນັ້ນ, ຄະນະຜູ້ແທນທັງສອງຝ່າຍ ໄດ້ພ້ອມກັນປະກອບຄຳຄິດຄຳເຫັນ ແລກປ່ຽນບົດຮຽນຕໍ່ບາງວຽກງານທີ່ຈະຕ້ອງສືບຕໍ່ຮ່ວມມືກັນໃນຕໍ່ໜ້າ.

     ພ້ອມກັນນີ້, ຄະນະໄດ້ໄປຢ້ຽມຢາມເຂດພັດທະນາອຸດສາຫະກຳ WHA Group, ເຂດພັດທະນາ VSIP, ຢ້ຽມ ຢາມຄອບຄົວຕົວແບບໃນການເຮັດນ້ຳປາ-ກະປິ, ອາຫານທະເລທີ່ເປັນສິນຄ້າ ຂະໜາດນ້ອຍ ແລະ ຢ້ຽມຢາມເຂດຮ່ອງ ຮອຍປະຫວັດສາດຂອງແຂວງຈໍານວນໜຶ່ງຕື່ມອີກ.

ຂ່າວ-ພາບ: ຢຢ

ບກ: ອິນທະຫວາ