ສູນກາງແນວລາວສ້າງຊາດ

Lao Front For National Development

ຄະນະກຳມະການເລືອກຕັ້ງຂັ້ນແຂວງລົງຊຸກຍູ້ການກະກຽມປ່ອນບັດ ການເລືອກຕັ້ງສະມາຊິກສະພາ ແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II

ໃນຕອນເຊົ້າວັນທີ 9 ກຸມພາ 2021 ນີ້ ທ່ານ ນາງ ບົວສີ ນາຖາວົງ ຄະນະປະຈຳພັກແຂວງ ປະທານແນວລາວສ້າງຊາດ ແຂວງຊຽງຂວາງ ທັ້ງເປັນຄະນະກຳມະການເລືອກຕັ້ງຂັ້ນແຂວງ ພ້ອມຄະນະ ລົງຊຸກຍູ້-ການກະກຽມປ່ອນບັດການເລືອກຕັ້ງສະມາຊິກສະພາແຫ່ງຊາດ ຊຸດທີ່ IX ແລະສະມາຊິກສະພາປະຊາຊົນຂັ້ນແຂວງ ຊຸດທີ  II ຢູ່ທີ່ສະໂມສອນເມືອງຄູນ ແຂວງຊຽງຂວາງ.

ທັ້ງນີ້, ກໍ່ເພື່ອເປັນການກຳນົດທິດທາງວຽກງານ, ແຜນການ ແລະວິທີຈັດຕັ້ງປະຕິບັດໃຫ້ແກ່ຄະນະກຳມະການເລືອກຕັ້ງຂັ້ນແຂວງ, ຄະນະກຳມະການເລືອກຕັ້ງຂັ້ນເມືອງ, ບັນດາອານຸກຳມະການຕ່າງໆມີຈຸດສຸມ ແນໃສ່ເຮັດໃຫ້ການດຳເນີນການປ່ອນບັດເລືອກຕັ້ງ ມີຜົນສຳເລັດຕາມແຜນການທີ່ວາງໄວ້, ຮັບປະກັນການເລືອກເຟັ້ນໃຫ້ໄດ້ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ຜູ້ທີ່ມີເງື່ອນໄຂມາດຖານຄົບຖ້ວນ, ມີຄຸນທາດການເມືອງໜັກແໜ້ນ, ສາມາດເປັນຕົວແທນແຫ່ງສິດ ແລະຜົນປະໂຫຍດອັນຊອບທຳ ຂອງປະຊາຊົນບັນດາເຜົ່າ ໄດ້ຢ່າງແທ້ຈີງ ແລະ ດຳເນີນການປ່ອນບັດການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຄັ້ງນີ້ໄດ້ຕາມເວລາທີ່ກຳນົດໄວ້ ແລະ ຮັບປະກັນຜົນສຳເລັດຕາມຄາດໝາຍ ຄື: ໃຫ້ຜູ້ທີ່ມີສິດປ່ອນບັດເລືອກຕັ້ງບ່ອນບັດຄົບຖ້ວນ ຕາມຈຳນວນ, ບໍ່ໃຫ້ມີບັດຕາຍ ແລະ ມີຄວາມສະຫງົບປອດໄພ.

ໃນວັນດຽວກັນນີ້, ຄະນະກຳມະການເລືອກຕັ້ງຂັ້ນແຂວງຍັງໄດ້ລົງຊຸກຍູ້-ການກະກຽມປ່ອນບັດການເລືອກຕັ້ງສະມາຊິກສະພາແຫ່ງຊາດ ຊຸດທີ່ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ຢູ່ທີ່ກຸ່ມສັນຫຼວງຕື່ມອີກ.

info@lfnd.org.la | 021 213754 | (856-21) 453191