ສູນກາງແນວລາວສ້າງຊາດ

Lao Front For National Development

ຄະນະກຳມະການແນວລາວສ້າງຊາດແຂວງຫຼວງພະບາງສົມທົບກັບຄະນະນຳຂອງແຂວງຈັດກອງບຸນຜ້າປ່າສາມັກຄີ

ຄະນະກຳມະການແນວລາວສ້າງຊາດແຂວງຫຼວງພະບາງສົມທົບກັບຄະນະນຳຂອງແຂວງຈັດກອງບຸນຜ້າປ່າສາມັກຄີທົ່ວແຂວງປະຈຳປີ 2016.

ໃນ​ວັນ​ທີ 21 ທັນວາ 2016 ຜ່ານ​ມາ​ນີ້, ຄະນະກຳມະການ​ແນວ​ລາວ​ສ້າງ​ຊາດ​ແຂວງ​ຫຼວງ​ພະ​ບາງ​ສົມທົບ​ກັບ​ຄະນະ​ນຳ​ຂອງ​ແຂວງ​ໄດ້​ພ້ອມ​ກັນ​ຈັດ​ກອງ​ບຸນ​ຜ້າປ່າ​ສາມັກຄີ​ທົ່ວ​ແຂວງ​ຫຼວງ​ພະ​ບາງ​ຂຶ້ນ​ໂດຍ​ການ​ເປັນ​ປະທານ​ຂອງ​ທ່ານ ວົງ​ສະຫວັນ ​ເທບ​ພະຈັນ​, ຄະນະ​ປະຈຳ​ພັກ​ແຂວງ, ຮອງ​ເຈົ້າ​ແຂວງ​ຫຼວງ​ພະ​ບາງ.

ເປັນ​ກຽດ​ເຂົ້າ​ຮ່ວມ​ໃນ​ພິທີ​ແຫ່​ກອງ​ບຸນ​ຜ້າປ່າ​ສາມັກຄີ​ມີ​ທ່ານ ຄຳ​ຂັນ ຈັນທະ​ວີ​ສຸກ, ກຳມະການ​ສູນ​ກາງ​ພັກ, ​ເລຂາ​ຄະນະ​ບໍລິຫານ​ງານ​ພັກ​ແຂວງ, ​ເຈົ້າ​ແຂວງ​ຫຼວງ​ພະ​ບາງ, ມີ​ບັນດາ​ການ​ນຳ​ພັກ-ລັດ​ຂັ້ນ​ແຂວງ, ​ແນວ​ລາວ​ສ້າງ​ຊາດ, ອົງການ​ຈັດ​ຕັ້ງ​ມາ​ຫາ​ຊົນ, ບັນດາພະ​ແນ​ກການ, ບໍລິສັດ-ລັດ​ວິ​ສາ​ຫະກິດ, ​ສະ​ຖາ​ບັນ​ການ​ສຶກສາ, ບັນດາ​ຄະນະ​ນຳ​ຂອງ​ເມືອງ​ໃນ​ທົ່ວ​ແຂວງ ພ້ອ​ມດ້ວຍ​ປະຊາຊົນ​ບັນດາ​ເຜົ່າ ​ແລະ ຜູ້​ມີ​ໃຈ​ບຸນ​ສຸນ​ທານ​ເຂົ້າ​ຮ່ວມ​ຢ່າງ​ຄັບຄາ​ໜາ​ແໜ້ນ. ຈຸດປະສົງ​ໃນ​ການ​ຈັດ​ກອງ​ບຸນ​ຜ້າປ່າ​ສາມັກຄີທົ່ວ​ແຂວງ​ນີ້​ກໍ່​ເພື່ອ​ເປັນ​ການ​ອານຸລັກ​ຮັກສາ​ຂະ​ນົບ​ທຳນຽມ, ຮີດຄອງ​ປະ​ເພນີ​ອັນ​ດີງາມ​ຂອງ​ພຸດທະ​ສາສະໜາ, ສ່ອງ​ແສງ​ເຖິງ​ຄວາມ​ສາມັກຄີ, ສົ່ງ​ເສີມ​ການທ່ອງທ່ຽວ ​ແລະ ​ເປັນ​ການ​ລະດົມ​ທຶນ​ເພື່ອ​ປະຕິສັງ​ຂອນ​ວັດວາອາ​ຮາມ​ທີ່​ເປັນ​ມູນມໍລະດົກ​ອັນ​ລ້ຳ​ຄ່າ​ທາງ​ດ້ານ​ວັດທະນະທຳ​ຂອງ​ຊາດ​ໃຫ້​ຍືນ​ຍົງ​ຄົງ​ຢູ່​ຄູ່​ກັບ​ບ້ານ​ເມືອງ​ຕະຫຼອດ​ໄປ. ຂະ​ບວນກອງ​ບຸນ​ຜ້າປ່າ​ສາມັກຄີ​ທົ່ວ​ແຂວງ​ຫຼວງ​ພະ​ບາງ​ປະຈຳ​ປີ 2016​ໄດ້​ເລີ່​ມຂະ​ບວນ​ແຫ່​ເລີ່​ມຕັ້ງ​ແຕ່ຕໍ່ໜ້າ​ຫໍພິພິຕະພັນ​ພະລາດ​ສະ​ວັງ​ເກົ່າ​ໄປ​ຍັງ​ວັດຊຽງ​ທອງ ​ເພື່ອ​ຖວາຍ​ຜ້າປ່າ ​ແລະ ​ວັດຖຸ​ປັດ​ໃຈ​ຕ່າງໆ​ໃຫ້​ແກ່​ພະສົງ​ຢູ່​ທີ່​ວັດຊຽງ​ທອງ.

ພາຍຫຼັງສຳ​ເລັດ​ພິທີ​ທາງ​ສາສະໜາ, ຄະນະ​ກຳມະການ​ຮັບຜິດຊອບ​ກອງ​ບຸນ​ຜ້າປ່າ​ສາມັກຄີ​ໄດ້​ພ້ອມ​ກັນ​ຮີບ​ໂຮມ​ວັດຖຸ​ປັດ​ໃຈ​ທີ່​ໄດ້​ຮັບ​ຈາກ​ການ​ຖວາຍ​ກອງ​ບຸນ​ຄັ້ງ​ນີ້​ດ້ວມຄວາມ​ຮັບຜິດຊອບ​ສູງ​. ຜ່ານ​ການ​ສະຫຼຸບ​ຂອງ​ຄະນະ​ຮັບຜິດ ຊອບ​ສາມາດສັງ​ລວມ​ໄດ້​ຄື: ​ໄດ້​ຜ້າ​ໄຕຈີວອນ​ຈຳນວນ 219 ຊຸດ, ​ໄດ້​ເງິນ​ກີບ​ຈຳນວນ 70,213,500 ກີບ, ​ເງິນ​ໂດ​ລາສະຫະລັດ 354 ​ໂດ​ລາ, ​ເງິນ​ບາດ​ໄທ 12,640 ບາດ, ​ເງິ​ນດົງຫວຽດນາມ 170,000 ດົງ ​ແລະ ເງິນ​ຢວນຈີນ 29 ຢວນ. ປະຈຸ​ບັນ​ທາງ​ຄະນະ​ຮັບຜິດຊອບ​ທາງ​ດ້ານ​ເສດຖະກິດ​ຂອງ​ກອງ​ບຸນ​ຜ້າປ່າ​ສາມັກຄີ​ທົ່ວ​ແຂວງ​ຫຼວງ​ພະ​ບາງ​ໄດ້​ນຳ​ເງິນທີ່​ຮີບ​ໂຮມ​ໄດ້​ຈາກ​ກອງ​ບຸນ​ຄັ້ງ​ນີ້​ໄປ​ເກັບ​ມ້ຽນ​ໃນ​ບັນຊີ​ຂອງ​ຄະນະ​ອົງການ​ພຸດທະ​ສາສະໜາ​ສຳພັນ​ລາວ​​ແຂວງ​ຫຼວງ​ພະ​ບາງ​ເປັນ​ທີ່​ຮຽບຮ້ອຍ​ແລ້ວ​ເພື່ອ​ຮັກສາ​ໄວ້​ເປັນ​ກອງທຶນ​ໃນ​ການ​ບູ​ລະນະ​ປະຕິສັງ​ຂອນ​ວັນ​ວາ​ອາ​ຮາມ ​ແລະ ຮັບ​ໃຊ້​ໃນ​ວຽກ​ງານ​ອັນ​ຈຳ​ເປັນ​ຂອງ​ພະສົງ​ທົ່ວ​ແຂວງ​ຫຼວງ​ພະ​ບາງ. ສ່ວນ​ຜ້າ​ໄຕຈີວອນ​​ແມ່ນ​ໄດ້​ເກັບ​ມ້ຽນ​ໄວ້​ໃນ​ສາງ​ຢູ່ວັດຊຽງ​ທອງ ​ແລະ ອາຫານ​ແຫ້ງ​ຕ່າງໆກໍ່​ໄດ້​ແຈກ​ຢາຍ​ໃຫ້​ແກ່​ພະສົງ-ສາມະ​ເນນ​ເປັນ​ທີ່​ຮຽບຮ້ອຍ​ແລ້ວ.

info@lfnd.org.la | 021 213754 | (856-21) 453191