ສູນກາງແນວລາວສ້າງຊາດ

Lao Front For National Development

ຄະນະທິ່ປຶກສາວຽກງານຊົນເຜົ່າ ສູນກາງແນວລາວສ້າງຊາດ ລົງເຄື່ອນໄຫວເຮັດວຽກຢູ່ແຂວງຊຽງຂວາງ

ໃນຕອນເຊົ້າຂອງວັນທີ 25 ສິງຫາ 2021 ນີ້. ຢູ່ທີຫ້ອງປະຊຸມໃຫຍ່ ຫອ້ງວ່າການແຂວງຊຽງຂວາງ, ທ່ານ ຄຳຫຼ້າ ດວງພະສຸກ ຄະນະທີ່ປຶກສາວຽກງານຊົນເຜົ່າ ສູນກາງແນວລາວສ້າງຊາດ, ປະທານບໍລິສັດດວງພະສຸກ ກໍ່ສ້າງສ້ອມແປງຂົວ-ທາງ ເຄຫາສະຖານ ແລະ ຊົນລະປະທານ ຈຳກັດຜູ້ດຽວ ພົບປະ ແລະ ເຮັດວຽກກັບ ແນວລາວສ້າງຊາດ ແຂວງ, ອົງການຈັດຕັ້ງມະຫາຊົນແຂວງ ແລະ ແນວລາວສ້າງຊາດບັນດາເມືອງໃນທົ່ວແຂວງ ໂດຍການຕ້ອນຮັບ ແລະເປັນປະທານຂອງ ທ່ານ ນາງ ບົວສີ ນາຖາວົງ ຄະນະປະຈຳພັກແຂວງ ປະທານແນວລາວສ້າງຊາດ ແຂວງຊຽງຂວາງ, ບັນດາກຳມະການພັກແຂວງ, ປະທານ-ຮອງປະທານ, ອົງການຈັດຕັ້ງມະຫາຊົນ ຕະຫຼອດຮອດພະນັກງານລັດຖະກອນບັນດາອົງການຈັດຕັ້ງມະຫາຊົນເຂົ້າຮ່ວມ.

ໃນພິທີ, ທ່ານ ນາງ ບົວສີ ນາຖາວົງ ລາຍງານສະພາບການເຄື່ອນໄຫວວຽກງານແນວລາວສ້າງຊາດ ແລະ ວຽກງານບັນດາອົງການຈັດຕັ້ງມະຫາຊົນ ໃນໄລຍະ 6 ເດືອນຕົ້ນປີ 2021 ຜ່ານມາ ໂດຍຫຍໍ້, ທ່ານໃຫ້ຮູ້ວ່າແນວລາວສ້າງຊາດ ແລະ ອົງການຈັດຕັ້ງຊົນແຕ່ລະຂັ້ນ ໄດ້ເອົາໃຈໃສ່ຈັດຕັ້ງເຜີຍແຜ່ແນວທາງນະໂຍບາຍ, ມະຕິຕ່າງໆຂອງພັກ ແລະ ລະບຽບກົດໝາຍຂອງລັດ ໃຫ້ພະນັກງານ-ລັດຖະກອນ, ຜູ້ຊົງຄຸນວຸດທິ ແລະ ປະຊາຊົນບັນດາເຜົ່າ ຢູ່ແຕ່ລະຮາກຖານທ້ອງຖີ່ນ,  ປະຕິບັດສິດ-ໜ້າທີ່ ຕາມພາລະບົດບາດ, ສຶກສາອົບຮົມເຕົ້າໂຮມຄວາມສາມັກຄີປອງດອງ ຂອງປະຊາຊົນລາວບັນດາເຜົ່າ, ບັນດາຊັ້ນຄົນ, ສາສະໜາ ແລະ  ເພດ-ໄວ. ໄດ້ເອົາໃຈໃສ່ຕິດຕາມ, ຊຸກຍູ້ຂະບວນການສ້າງຄອບຄົວ ແລະ ບ້ານສາມັກຄີປອງດອງເປັນປົກກະຕິ. 6 ເດືອນຕົ້ນປີຜ່ານມາສາມາດປະກາດບ້ານສາມັກຄີປອງດອງໄດ້ທັງໝົດ 14 ບ້ານ, ສ້າງຄອບຄົວສາມັກຄີປອງດອງໄດ້ທັງໝົດ 2658 ຄອບຄົວ.

ຈາກນັ້ນ ຄະນະທີ່ປຶກສາວຽກງານສູນກາງແນວລາວສ້າງຊາດ ໄດ້ມີຄຳຄິດຄຳເຫັນໂອລົມພໍ່ພະນັກງານ ແນວລາວສ້າງຊາດແຂວງ, ເມືອງ ແລະ ອົງການຈັດມະຫາຊົນຂອງແຂວງ  ທ່ານກ່າວວ່າ: ແນວລາວສ້າງຊາດ ແລະ ອົງການຈັດຕັ້ງມະຫາຊົນແຕ່ລະຂັ້ນ ແມ່ນມີມູນເຊື້ອອັນສະຫງ່າລາສີ ແຫ່ງການປະຕິວັດປົດປ່ອຍຊາດໃນສະໄໝຕໍ່ສູ້ກູ້ຊາດ, ມີບົດບາດເປັນເສນາທິການໃຫ້ພັກ ໃນການປົກປັກຮັກສາ ແລະ ສ້າງສາປະເທດຊາດ, ຈົ່ງພ້ອມກັນ ເສີມຂະຫຍາຍ,​ ຍົກສູງບົດບາດຂອງໃຜລາວ ປະສານສົມທົບກັບບັນດານັກທຸລະກິດ ເພື່ອຊອກຫາຊ່ອງທາງດຶງດູດທຶນຮອນ,​ ໂຄງການຕ່າງໆທີ່ກ່ຽວຂ້ອງກັບໜ້າວຽກ ແລະນຳມາພັດທະນາສຸມໃສ່ວຽກງານ, ພ້ອມກັນສ້າງຄວາມເຂັ້ມແຂງດ້ວຍຕົນເອງໂດຍ ການສ້າງເສດຖະກິດ ຫັນການຜະລິດໃຫ້ກາຍເປັນສິນຄ້າ. ພ້ອມນັ້ນໃນພິທີຫຼາຍທ່ານກໍ່ໄດ້ພ້ອມກັນປະກອບຄຳຄິດເຫັນ ເພື່ອເຮັດໃຫ້ການຈັດຕັ້ງປະຕິບັດວຽກງານແນວລາວສ້າງຊາດ, ວຽກງານແຕ່ລະອົງການ ມີຄວາມພົ້ນເດັ່ນ ຍົກສູງບົດບາດ,  ຄວາມສຳຄັນຂອງແນວລາວສ້າງຊາດ ແລະອົງການຕ່າງໆ ໃຫ້ສັງຄົມໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ.

ໂອກາດດັ່ງກ່າວນີ້ ຄະນະທີ່ປຶກສາວຽກງານຊົນເຜົ່າ ສູນກາງແນວລາວສ້າງຊາດ ພ້ອມດ້ວຍຄະນະ ໄດ້ມອບຄອມພີວເຕີຕັ້ງໂຕະຈຳນວນ 9 ຊຸດ ພ້ອມດ້ວຍພິ່ນເຕີ່ສີ ລວມມູນຄ່າ 70 ລ້ານກ່ວາກີບ, ກ່າວມອບໂດຍທ່ານ ຄຳຫຼ້າ ດວງພະສຸກ ແລະ  ກ່າວຮັບໂດຍທ່ານນາງ ບົວສີ ນາຖາວົງ, ໂດຍຊ້ອງໜ້າ ທ່ານ ໜໍບີຫາ ຕົ່ງປາວ ຮອງເລຂາພັກແຂວງ ຜູ້ຊີ້ນຳວຽກງານການເມືອງແນວຄິດ ພ້ອມດ້ວຍຜູ້ແທນກອງປະຊຸມ, ຄອມພີວເຕີຈຳນວນດັ່ງກ່າວແມ່ນມອບໃຫ້ເມືອງ7ເມືອງ ເມືອງລະຊຸດ, ບ້ານແຮກສ່ຽວຂອງແນວລາວສ້າງຊາດແຂວງ 1 ຊຸດ ແລະ ແນວລາວສ້າງຊາດແຂວງ 1 ຊຸດ ເພື່ອນຳໃຊ້ເຂົ້າໃນການປະຕິບັດວຽກງານໃຫ້ທັນສະໄໝ ແລະ ວ່ອງໄວຂື້ນ.

info@lfnd.org.la | 021 213754 | (856-21) 453191