ໃນວັນທີ 24 ມີນາ 2021 ຢູ່ທີ່ ສະໂມສອນ ຫ້ອງການສຶກສາທິການ ແລະ ກິລາເມືອງວັງວຽງ, ແຂວງ ວຽງຈັນ ໄດ້ມີກອງປະຊຸມ ພົບປະແລກປ່ຽນບົດຮຽນ ໃນການເຄື່ອນໄຫວວຽກງານຊັ້ນຄົນ-ການຈັດຕັ້ງສັງຄົມຂື້ນ ເປັນກຽດຮ່ວມເປັນປະທານໃນກອງປະຊຸມຄັ້ງນີ້ ມີທ່ານ ປອ. ສົມພົງ ມົງຄົນວິໄລ ກໍາມະການສູນກາງແນວລາວສ້າງຊາດ, ຫົວໜ້າຄະນະທີ່ປຶກສາວຽກງານຊັ້ນຄົນ-ການຈັດຕັ້ງສັງຄົມ ແລະ ທ່ານ ບຸນຈັນ ມາລາວົງ ກໍາມະການພັກແຂວງ, ເລຂາພັກເມືອງ, ເຈົ້າເມືອງ-ເມືອງວັງວຽງ; ການພົບປະໃນຄັ້ງນີ້ມີ ທ່ານ ສີສຸພັນ ວັດທະນະວົງ ກໍາມະການປະຈໍາພັກເມືອງ, ປະທານແນວລາວສ້າງຊາດເມືອງ, ມີບັນດາທ່ານ ຕາງໜ້າສູນກາງແນວລາວສ້າງຊາດ, ຕາງໜ້າຫ້ອງການຕ່າງໆ ອ້ອມຂ້າງເມືອງ, ພະນັກງານອາວຸ ໂສບໍານານ, ຜູ້ຊົງຄຸນວຸດທິພາຍໃນເມືອງ ແລະ ສະມາຊິກສະມາຄົມຜູ້ອາຍຸສູງນະຄອນຫລວງວຽງຈັນ 50 ທ່ານເຂົ້າຮ່ວມ.

ກອງປະຊຸມພົບປະຄັ້ງນີ້ ໄດ້ຮັບຟັງ ການສະເໜີຜົນງານ, ບົດຮຽນໃນການຊີ້ນໍາ, ນໍາພາຂອງຄະນະພັກ-ອົງການປົກຄອງເມືອງ ໃນການພັດທະນາເສດຖະກິດ-ສັງຄົມຂອງເມືອງ ວັງວຽງ ໃນໄລຍະຜ່ານມາຍົກໃຫ້ເຫັນກາລະໂອກາດ, ບັນຫາ ແລະ ສິ່ງທ້າທາຍຕ່າງໆ, ການແບ່ງຂັ້ນຄຸ້ມຄອງ ທາງດ້ານເສດຖະກິດທີ່ເຫັນວ່າຍັງບໍ່ສອດຄ່ອງ, ການສວຍໂອກາດໃນການວີ້ງເຕັ້ນ ເພື່ອສໍາປະທານບໍ່ແຮ່ທີ່ມີຄວາມສ່ຽງຕໍ່ສະພາບແວດລ້ອມ ແລະ ບັນຫາອື່ນໆ. ນອກນັ້ນ ທ່ານຫົວໜ້າຄະນະທີ່ປຶກສາ ຍັງໄດ້ແລກປ່ຽນຄໍາຄິດເຫັນ ໃນການບໍລິຫານ ແລະ ພັດທະນາຕົວເມືອງວັງວຽງທີ່ເປັນເມືອງທ່ອງທ່ຽວຍອດນິຍົມໃຫ້ມີການກໍານົດແຜນຜັງ, ການບູລະນະ, ອະນາໄມຕົວເມືອງ, ການບໍາບັດນໍ້າເປື້ອນ ແລະ ຂີ້ເຫຍື້ອ, ການປູກຕົ້ນໄມ້, ສ້າງສວນສາທາລະນະ. ພ້ອມດຽວກັນນີ້ ທັງສອງສະມາຄົມຜູ້ອາຍຸສູງ ລະຫວ່າງ ນະຄອນຫຼວງວຽງຈັນ ແລະ ເມືອງ ວັງວຽງ ກໍ່ໄດ້ແລກ ປ່ຽນບົດຮຽນທີ່ດີໃນການເຄື່ອນໄຫວ ການຊີ້ນໍາ, ນໍາພາເຕົ້າໂຮມຄວາມສາມັກຄີ, ການຊ່ວຍເຫຼືອເຊິ່ງກັນ ແລະ ກັນ, ການບໍລິຫານ-ຄຸ້ມຄອງສະມາຄົມເຊິ່ງໄດ້ເປັນບົດຮຽນທີ່ດີໃຫ້ແກ່ທັງສອງຝ່າຍ.