ທ່ານ ສຈ.ດຣ  ພອນເທບ ພົນເສນາ ຫົວໜ້າຄະນະທີ່ປຶກສາວຽກງານຊົນເຜົ່າ ສູນກາງແນວລາວສ້າງຊາດ(ສນຊ) ພ້ອມດ້ວຍຄະນະວິຊາການ ກົມຊົນເຜົ່າ ສນຊ ໄດ້ລົງຢ້ຽມຢາມ, ຕິດຕາມ ແລະ ເກັບກຳສະພາບການຢູ່ ສູນສຸຂະພາບແມ່ ແລະເດັກ, ໂຮງໝໍມະໂຫສົດ ແລະ ມະຫາວິທະຍາໄລ ວິທະຍາສາດ ສຸຂະພາບ ໃນລະຫວ່າງວັນທີ 18-20 ພະຈິກ 2020 ນີ້, ໂດຍໄດ້ຮັບການຕ້ອນຮັບຢ່າງອົບອຸ່ນຂອງ ທ່ານ ດຣ ນາງ ປານອມ ໄຊຍະມຸງຄຸນ ຮັກສາການຫົວໜ້າສູນສຸຂະພາບແມ່ ແລະ ເດັກ, ທ່ານ ນາງ ອາພອນ ວິຊາເທບ ຮອງອຳນວຍການໂຮງໝໍມະໂຫສົດ ແລະ ທ່ານ ດຣ ເກດສົມສຸກ ບຸບຜາວັນ ຄະນະບໍດີ ຄະນະແພດສາດ ມະຫາວິທະຍາໄລ ວິທະຍາສາດ ສຸຂະພາບ.

ໃນການລົງເຮັດວຽກຄັ້ງນີ້, ໄດ້ຮັບຟັງການລາຍງານສະພາບລວມ ແລະ ຜົນສຳເລັດຂອງການເຄື່ອນໄຫວວຽກງານແມ່ ແລະ ເດັກໃນໄລຍະ 1 ປີຜ່ານມາ ວ່າ: ຂອງສູນສຸຂະພາບແມ່ ແລະເດັກ ໄດ້ສົ່ງເສີມສຸຂະພາບ ປະກອບມີ 5 ໂຄງການຫຼັກ: ໂຄງການສັກຢາກັນພະຍາດ, ໂຄງການສຸຂະພາບຈະເລີນພັນ, ໂຄງການເກີດລູກ ແລະ ປິ່ນປົວເດັກເຈັບ 5 ປີບໍ່ເສຍຄ່າ, ໂຄງການກັນການຕິດເຊື້ອຈາກແມ່ຫາລູກ ແລະ ໂຄງການຄຸ້ມຄອງເຊື່ອມສານພະຍາດໃນເດັກ ໃນສະຖານທີ່ບໍລິການ; ໂຮງໝໍມະໂຫສົດ ແມ່ນໄດ້ມີການຝຶກອົບຮົມຍົກລະດັບແພດໝໍທີ່ເຮັດວຽກງານສຸຂະພາບແມ່ ແລະ ເດັກ ຈຳນວນນຶ່ງ ເຊິ່ງມາຮອດປະຈຸບານແມ່ນມີແພດຊ່ຽວຊານ 100 ກວ່າຄົນ ແລະ ແຈກຢາຍຢູ່ຕາມບັນດາໂຮງໝໍ ທົ່ວທຸກແຂວງ ແລະ ເມືອງ, ແຕ່ລະປີໄດ້ມີການຈັດກອງປະຊຸມເພື່ອປະເມີນຄືນຜົນໄດ້ຮັບຂອງວຽກງານດັ່ງກ່າວ ແລະ ປະກອບຄຳຄິດຄຳເຫັນແລກປ່ຽນນຳກັນ; ສ່ວນວຽກງານສຸຂະພາບແມ່ ແລະເດັກ ຂອງມະຫາວິທະຍາໄລ ວິທະຍາສາດ ສຸຂະພາບ ແມ່ນໄດ້ມີການກໍ່ສ້າງແພດຊ່ຽວຊານໄດ້ 20 ລຸ້ນ ເຊິ່ງປະກອບມີແຕ່ລະຊົນເຜົ່າ ທີ່ມາຈາກບັນດາແຂວງທົ່ວປະເທດ ລວມທັງໝົດ 162 ຄົນ. ວຽກງານດັ່ງກ່າວແມ່ນໄດ້ຊ່ວຍໃຫ້ອັດຕາການເສຍຊີວິດຂອງແມ່ ແລະ ເດັກໄດ້ຫຼຸດລົງຫຼາຍຖ້າທຽບໃສ່ຫຼາຍປີທີ່ຜ່ານມາ.

ທ່ານ ສຈ.ດຣ  ພອນເທບ ພົນເສນາ ໄດ້ສະແດງຄວາມຂອບໃຈຕໍ່ການຕ້ອນຮັບ ແລະ ການລາຍງານຜົນການຈັດຕັ້ງປະຕິບັດວຽກງານສຸຂະພາບແມ່ ແລະ ເດັກຕະຫຼອດໄລຍະ 1 ປີຜ່ານມາຂອງທັງ 3 ພາກສ່ວນ ແລະ ທ່ານ ຍັງໄດ້ຮຽກຮ້ອງຕຶ່ມວ່າ: ໃຫ້ແຕ່ລະພາກສ່ວນຈົ່ງສຶບຕໍ່ຍົກລະດັບ ແລະ ສ້າງແພດຊ່ຽວຊານວຽກງານດັ່ງກ່າວ ໂດຍສະເພາະແມ່ນຢູ່ຂັ້ນແຂວງ ແລະ ຂັ້ນເມືອງ ເພື່ອໃຫ້ເຂົາກັບຄືນໄປຮັບໃຊ້ປະຊາຊົນຢູ່ທ້ອງຖິ່ນຮາກຖານ ເພື່ອໃຫ້ໄດ້ຮັບຜົນສຳເລັດຫຼາຍຂຶ້ນກວ່າເກົ່າ. ສືບຕໍ່ເຜີຍແຜ່ໃຫ້ປະຊາຊົນມີຄວາມເຂົ້າໃຈຕໍ່ຄວາມສຳຄັນຂອງວຽກງານສຸຂະພາບແມ່ ແລະເດັກ ເປັນຕົ້ນແມ່ນການສ້າງໃຫ້ລູກມີຄວາມແຂງແຮງຕັ້ງແຕ່ຍັງຢູ່ໃນທ້ອງແມ່ ແລະ ເກີດມາເປັນເດັກທີ່ມີສຸຂະພາບສົມບູນ.