ສູນກາງແນວລາວສ້າງຊາດ

Lao Front For National Development

ຄະນະທີ່ປຶກສາວຽກງານຊົນເຜົ່າ ສູນກາງແນວລາວສ້າງຊາດ ເຂົ້າພົບປະການນຳແຂວງຊຽງຂວາງ

ວັນທີ 25 ສິງຫາ 2021 ນີ້ ທີ່ຫ້ອງວ່າການແຂວງຊຽງຂວາງ ທ່ານ ຄຳຫຼ້າ ດວງພະສຸກ ທີ່ປຶກສາວຽກງານຊົນເຜົ່າ ສູນກາງແນວລາວສ້າງຊາດ, ປະທານບໍລິສັດ ດວງພະສູກ ກໍ່ສ້າງສ້ອມແປງຂົວ-ທາງ ເຄຫາສະຖານ ແລະ ຊົນລະປະທານ ຈຳກັດຜູ້ດຽວ ພ້ອມດ້ວຍຄະນະ ໄດ້ເຂົ້າພົບປະ ທ່ານ ໜໍບີຫາ ຕົ່ງປາວ ຮອງເລຂາພັກແຂວງໆຊຽງຂວາງ ໃນໂອກາດທີ່ໄດ້ລົງມາສຸກຍູ້ວຽກງານແນວລາວສ້າງຊາດ ຢູ່ແຂວງຊຽງຂວາງ.

ໃນວາລະພົບປະຄັ້ງນີ້, ທ່ານ ຄຳຫຼ້າ ດວງພະສຸກ ໄດ້ລາຍງານຈຸດປະສົງ ແລະ ໄດ້ປຶກສາຫາລື ຮ່ວມກັບການນຳແຂວງຫຼາຍບັນຫາທີ່ສຳຄັນເຊັນ: ການຊຸກຍູ້ສົ່ງເສີມພັດທະນາເສດຖະກິດແຂວງຊຽງຂວາງ ເວົ້າລວມ,​ ເວົ້າສະເພາະກໍ່ຄືວຽກງານຂອງແນວລາວສ້າງຊາດ ແລະ ອົງການຈັດຕັ້ງມະຫາຊົນ ຢູ່ຂັ້ນແຂວງ-ເມືອງ, ວຽກງານການພັດທະນາຕ່າງໆ ທີ່ຕິດພັນກັບການເຕີບໃຫຍ່ຂະຫຍາຍຕົວ ຂອງແນວລາວສ້າງຊາດ, ການແກ້ໄຂປະກົດການຫຍໍ້ທໍ້ຕ່າງໆທາງດ້ານຊົນເຜົ່າ, ການປະຕິບັດໃນໄລຍະຜ່ານມາ, ວຽກງານການກະກຽມກອງປະຊຸມໃຫຍ່ຂອງສູນກາງແນວລາວສ້າງຊາດຄັ້ງທີ່ XI ໂດຍສະເພາະ ດ້ານເນື້້ອໃນ, ຂະບວນການ.  ພ້ອມນັ້ນ, ທ່ານຍັງໄດ້ລາຍງານການປຸກລະດົມບັນດາບໍລິສັດ-ນັກທຸລະກິດ ເຊັ່ນ: ບໍລິສັດ ລິນທອງ ອອກແບບ, ກໍ່ສ້າງຂົວທາງ ແລະ ຊົນລະປະທານ ຈຳກັດຜູ້ດຽວ, ບໍລິສັດ ພອນຈະເລີນຊັບ ກໍ່ສ້າງຂົວທາງ ແລະ ສອມແປງເຄຫາສະຖານ ຈຳກັດຜູ້ດຽວ, ບໍລິສັດ ພີພີ ອະສັງຫາ ລີມມະຊັບ ກໍ່ສ້າງຈຳກັດຜູ້ດຽວ ແລະ ບໍລິສັດ ດວງຜາສຸກ ກໍ່ສ້າງສ້ອມແປງຂົວ-ທາງ ເຄຫາສະຖານ ແລະ ຊົນລະປະທານ ຈຳກັດຜູ້ດຽວ ໄດ້ນຳເອົາຄອມພິວເຕີ ຈຳນວນ 9 ຊຸດ ລວມມູນຄ່າ 70 ລ້ານກວ່າກີບ ເພື່ອເປັນເຄື່ອງມືນຳໃຊ້ເຂົ້າໃນວຽກງານແນວລາວສ້າງຊາດຂັ້ນແຂວງ, ເມືອງ ແລະ ພິເສດ ກໍ່ຍັງມີບ້ານແຮກສ່ຽວຕື່ມອີກ.

ຈາກນັ້ນ, ທ່ານ ຮອງເລຂາພັກແຂວງຊຽງຂວາງ ໄດ້ຕີລາຄາສູງ ແລະ ສະແດງຄວາມຍ້ອງຍໍຊົມເຊີຍຕໍ່ການລົງມາຢ້ຽມຍາມ ແລະ ຊຸກຍູ້ວຽກງານຢູ່ແຂວງຊຽງຂວາງ ໂດຍຕິດພັນກັບວຽກງານແນວລາວສ້າງຊາດ, ອົງການຈັດຕັ້ງມະຫາຊົນ ຂອງທ່ານ ຄຳຫຼ້າ ດວງພະສຸກ ພ້ອມທັງລາຍງານສະພາບການໂດຍຫຍໍ້ຂອງແຂວງ ໃຫ້ທ່ານທີ່ປຶກສາວຽກງານຊົນເຜົ່າ ສູນກາງແນວລາວສ້າງຊາດ ຮັບຊາບ.ໃຫ້ການສະໜັບສະໜູນ ຊຸກຍູ້ວຽກງານແນວລາວສ້າງຊາດ, ອົງການຈັດຕັ້ງມະຫາຊົນໃຫ້ມີຄວາມເຂັ້ມແຂງ ແລະ ພັດທະນາຂື້ນຢ່າງບໍຢຸດຢັ້ງ, ພ້ອມທັງໄດ້ປຶກສາຫາລືວຽກງານທີ່ຈຳເປັນຈຳນວນໜື່ງຕື່ມອີກ.

 ພາບ+ຂ່າວ: ເບ່ຕ່າ ໄຊປັນຍາ

ບ.ກ ໂດຍ: ສຊ ຈື້ໄຊ

info@lfnd.org.la | 021 213754 | (856-21) 453191