ໃນວັນທີ 28 ສິງຫາ 2024 ນີ້ ທີ່ສະຖານທູດຫວຽດນາມປະຈໍາລາວ ທ່ານ ດຣ ນາງ ອິນລາວັນ ແກ້ວບຸນພັນ ກຳມະການສູນກາງພັກ ຮອງປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຂົ້າອວຍພອນວັນຊາດ ສສ. ຫວຽດນາມ ຄົບຮອບ 79 ປີ( 2 ກັນຍາ 1945-2 ກັນຍາ 2024) ໂດຍໄດ້ຮັບການຕ້ອນຮັບຈາກ ທ່ານ ຟານ ມິງ ຈ໋ຽນ ອຸປະທູດ ສສ ຫວຽດນາມ ປະຈໍາຢູ່ ສປປ ລາວ.

ທ່ານ ຮອງປະທານສູນກາງແນວລາວສ້າງຊາດ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ຂອງ ທ່ານ ຟານ ມິງ ຈ໋ຽນ ໃນຄັ້ງນີ້ ແລະ ໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຜົນສໍາເລັດອັນໃຫຍ່ຫຼວງໃນທຸກດ້ານ ທີ່ ສສ.ຫວຽດນາມ ຍາດມາໄດ້ໃນຕະຫຼອດໄລຍະ 79 ປີທີ່ຜ່ານມາ. ພ້ອມກັນນັ້ນ, ທ່ານ  ຍັງໄດ້ສະແດງຄວາມພາກພູມໃຈ ຕໍ່ສາຍພົວພັນແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ.  ທ່ານ ຮອງປະທານ ສນຊ ໄດ້ສະແດງຄວາມຂອບໃຈ ແລະ ຮູ້ບຸນຄຸນຢ່າງເລິກເຊິ່ງຕໍ່ພັກ-ລັດ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການຊ່ວຍເຫຼືອ ສປປ ລາວ ຢ່າງຫຼວງຫຼາຍໃນໄລຍະທີ່ຜ່ານມາ ພ້ອມທັງອວຍພອນ ໂດຍຜ່ານ ທ່ານ ຟານ ມິງ ຈ໋ຽນ ໄປຍັງບັນດາທ່ານການນໍາພັກ-ລັດຖະບານຫວຽດນາມ, ພະນັກງານ ແລະ ປະຊາຊົນຫວຽດນາມອ້າຍນ້ອງ ຈົ່ງຍາດໄດ້ໄຊຊະນະຍິ່ງໃຫຍ່ກວ່າເກົ່າ; ອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຈົ່ງໝັ້ນຄົງທະນົງແກ່ນຕະຫລອດກາລະນານ.
ທ່ານ ຟານ ມິງ ຈ໋ຽນ ໄດ້ສະແດງຄວາມຂອບໃຈຕໍ່ຄະນະນຳຂອງສູນກາງແນວລາວສ້າງຊາດ ທີ່ໄດ້ເຂົ້າອວຍພອນໃນຄັ້ງນີ້ ແລະ ທ່ານໄດ້ກ່າວວ່າ ສະຖານທູດຫວຽດນາມ ຈະສືບຕໍ່ເປັນຂົວຕໍ່ສະໜັບສະໜູນການເສີມຂະຫຍາຍສາຍພົວພັນຂອງສອງປະເທດ ກໍ່ຄືການພົວພັນຮ່ວມມື ລະຫວ່າງ ສູນກາງແນວລວສ້າງຊາດ ກັບສູນກາງແນວໂຮມປະເທດຊາດຫວຽດນາມ, ຄະນະກຳມະການສາສະໜາ ແຫ່ງ ລັດຖະບານ ສສ ຫວຽດນາມ, ຄະນະຂົນຂວາຍປະຊາຊົນ ພັກກອມມູນິດຫວຽດນາມ ແລະ ຄະນະກຳມະການຊົນເຜົ່າ ສສ ຫວຽດນາມ ໃນຕໍ່ໜ້າ.
ຂ່າວ+ພາບ: ຢຢ
ບກ: ພ.ບຸບຜາ