ສູນກາງແນວລາວສ້າງຊາດ

Lao Front For National Development

ຄະນະປະຈຳ ສູນກາງແນວລາວສ້າງຊາດ ຢ້ຽມຢາມຟາມຂີ້ກະເດືອນ

ໃນວັນທີ 26 ຕຸລາ 2018 ນີ້, ທ່ານ ແກ້ວຈະເລີນ ເຊ່ຍຢິ້ງຢ່າງ ຄະນະພັກ, ຄະນະປະຈຳ, ຫົວນ້າກົມໂຄສະນາ-ອົບຮົມ ສູນກາງແນວລາວສ້າງຊາດ ພ້ອມດ້ວຍບັນດາທ່ານ ຫົວໜ້າ-ຮອງຫົວໜ້າພະແນກ ແລະ ພະນັກງານວິຊາການ ຂອງກົມໂຄສະນາ-ອົບ ຮົມ ສູນກາງແນວລາວສ້າງຊາດ ໄປທັດສະນະສຶກສາທີ່ຟາມລ້ຽງຂີ້ກະເດືອນ ຂອງທ່ານ ນາງ ສິລິພອນ ສຸວັນນະສິດ ສະມາຊິກສະ ມາຄົມຄຸນຄ່າລາວ ຢູ່ບ້ານໜອງພະຍາ, ເມືອງໄຊທານີ, ນະຄອນຫຼວງວຽງຈັນ, ໂດຍການຕ້ອນຮັບຂອງທ່ານ ນາງ ແກ້ວມະນີວອນ ຜາລີຂັນ ເພື່ອນຮ່ວມງານຂອງສູນກາງແນວລາວສ້າງຊາດ, ປະທານສະມາຄົມຄຸນຄ່າລາວ.

ທ່ານ ປະທານສະມາຄົມຄຸນຄ່າລາວ ກໍໄດ້ສະແດງຄວາມຍິນດີຕ້ອນຮັບການໄປທັດສະນະສຶກສາຂອງກົມໂຄສະນາ-ອົບຮົມ ສູນກາງແນວລາວສ້າງຊາດ. ພ້ອມກັນນັ້ນ, ທ່ານ ນາງ ສິລິພອນ ສຸວັນນະສິດ ເຊິ່ງເປັນເຈົ້າຂອງຟາມ ໄດ້ເວົ້າວ່າ: ກ່ອນການລ້ຽງຂີ້ກະເດືອນ ຄອບຄົວຂອງທ່ານແມ່ນຍັງບໍ່ມີເສດຖະກິດທີ່ໝັ້ນຄົງ ດັ່ງນັ້ນດ້ວຍໃຈທີມັກໃນການລ້ຽງຈຶ່ງໄດ້ສຶກສາກ່ຽວກັບການລ້ຽງຂີ້ກະເດືອນສາຍພັນຕ່າງໆ ແລ້ວໄດ້ຕັດສິນໃຈເລ່ີມລ້ຽງສາຍພັນ ອາຟຣິກາ(Africa)ທີ່ເອົາມາຈາກຕ່າງປະເທດ ເລີ່ມລ້ຽງແຕ່ວັນທີ 27/9/2017, ເຊິ່ງຝຸ່ນຂີ້ກະເດືອນມີຜົນປະໂຫຍດຫຼາຍຢ່າງຄື: ເພີ່ມປະລິມານອິນຊີວັດຖຸໃນດິນ, ພຶດສາມາດນຳຝຸ່ນນຂີ້ກະເດືອນໃນດິນ ໄປໃຊ້ປະໂຫຍດໄດ້ທັນທີ, ເພີ່ມຊ່ອງຫວ່າງໃນດິນ ການລະບາຍນ້ຳ ແລະອາກາດດີຕໍ່ພຶດ, ເຮັດໃຫ້ດິນຮ່ວນຊຸຍຮັກສາຄວາມຊຸ່ມໃນດິນ, ເຮັດດິນຄາຍຕົວ ບໍ່ແໜ້ນແຂງ ຮາກພຶດກະຈາຍໄດ້ກວ້າງ, ສາມາດດູດຊັບນ້ຳໄດ້ຫຼາຍຂື້ນ ເຮັດໃຫ້ດິນຊຸ່ມຊື່ນ, ເພີ່ມທາດອາຫານພຶດໃຫ້ແກ່ດິນໂດຍກົງ ເຮັດໃຫ້ມີຈຸລິນຊີທີ່ສົມບູນ, ເພີ່ມຄວາມຕ້ານທານໃນການປ່ຽນແປງ ໃນລະດັບຄວາມເປັນກົດ-ດ່າງ ແລະ ຊ່ວຍໃຫ້ພຶດໃຫຍ່ໄວ ແລະ ມີຄວາມຕ້ານທານໂລກສູງ;ມາຮອດປະຈຸບັນນີ້ ແມ່ນສາມາດຂາຍຟຸ່ນຂີ້ກະເດືອນໃຫ້ຊາວກະສິກຳ ຜູ້ທີ່ປູກພັກປອດສານຜິດ, ປູກໝາກໄມ້ກິນໝາກ ແລະຂາຍອອກສູ່ຕະ ຫຼາດ.ຝຸ່ນດັ່ງກ່າວ ຍັງສາມາດປະສົມອາຫານໃຫ້ປະເພດສັດລ້ຽງທີ່ມີກິ່ນກິນ ເພື່ອດັບກິ່ນບໍ່ໃຫ້ມີກິ່ນເໝນໄດ້ອີກ, ໄດ້ໃຊ້ຝຸ່ນດັ່ງກ່າວມາປູກພຶດຜັກປອດສານຜິດກິນເອງໃນຄອບຄົວເຮັດໃຫ້ເສດຖະກິດຄອບຄົວດີຂຶ້ນກວ່າເກົ່າ. ນອກນີ້ ທ່ານ ເຈົ້າຂອງຟາມຍັງໄດ້ແນະນາມກ່ຽວກັບວິທີ ແລະ ຂັ້ນຕອນໃນການລ້ຽງຂີ້ກະເດືອນ.

ໂອກາດນີ້, ທ່ານ ແກ້ວຈະເລີນ ເຊ່ຍຢິ້ງຢ່າງ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງສະມາຄົມຄຸນຄ່າລາວ ແລະ ທ່ານ ໄດ້ກ່າວຕື່ມວ່າ ການມາທັດສະນາສຶກສາຄັ້ງນີ້ແມ່ນມີປະໂຫຍດຫຼາຍ ເພາະຈະເປັນບົດຮຽນ ແລະ ປະສົບການໃນການຮຽນຮູ້ກ່ຽວກັບການລ້ຽງຂີ້ກະເດືອນຜະລິດຝຸ່ນຊີວະພາບ ທີ່ມີຄຸນນະພາບສູງ ຂາຍອອກເປັນສິນຄ້າສູ່ຕະຫຼາດ ແລະ ໃຫ້ພະນັກງານກົມໂຄສະນາ-ອົບຮົມ ສູນກາງແນວລາວສ້າງຊາດ ຈົ່ງນຳເອົາບົດຮຽນໃນຄັ້ງນີ້ໄປແນະນຳໃຫ້ປະຊາຊົນຜູ້ທີ່ມີຄວາມມັກໃນການລ້ຽງ ໃຫ້ເຂົາເຈົ້າມາລ້ຽງຂີ້ກະເດືອນຜະລິດຝຸ່ນຂາຍ ເພື່ອແກ້ໄຂຊີວິດການເປັນຢູ່ຂອງເຂົາເຈົ້າໃຫ້ດີຂຶ້ນເທື່ອລະກ້າວ.

info@lfnd.org.la | 021 213754 | (856-21) 453191