ສູນກາງແນວລາວສ້າງຊາດ

Lao Front For National Development

ຄະນະຜູ້ແທນຂັ້ນສູງ ຄະນະກຳມະການສູນກາງແນວລາວສ້າງຊາດ ສຳເລັດການເຂົ້າຮ່ວມງານສະເຫຼີມສະຫຼອງວັນ ວິສາຂະບູຊາສາກົນ ທີ່ປະເທດສີລັງກາ

ຄະນະ​ຜູ້​ແທນ​ຂັ້ນ​ສູງ​ ຄະນະ​ກຳມະການ​ສູນ​ກາງ​ແນວ​ລາວ​ສ້າງ​ຊາດ ນຳ​ໂດຍ​ທ່ານ ຄຳ​ໃບ ດຳລັດ ກຳມະການ​ສູນ​ກາງ​ພັກ ຮອງ​ປະທານ ຄະນະ​ປະຈຳ ສູນ​ກາງ​ແນວ​ລາວ​ສ້າງ​ຊາດ (ສນຊ) ພ້ອມ​ດ້ວຍ​ຄະນະ ​ແລະ ຄະນະ​ຝ່າຍ​ພະສົງ ນຳ​​ໂດຍ ພະ​ອາຈານໃຫຍ່ ມະຫາ​ງອນ ດຳລົງ​ບຸນ ປະທານ​ສູນ​ກາງອົງການ​ພຸດທະສາສະໜາສຳພັນ​ລາວ ສຳ​ເລັດ​ການ​ເຂົ້າ​ຮ່ວມ​ງານ​ສະ​ເຫຼີ​ມສະຫຼອງ​ວັນ​ວິສາຂະບູຊາສາກົນ ​ຄັ້ງທີ 14 ​ເຊິ່ງຈັດ​ຂຶ້ນ​ທີ່​ປະ​ເທດ​ສີ​ລັງກາ ລະ​ຫ່າງ​ວັນ​ທີ 12-14 ພຶດສະພາ 2017.

ວັນ​ວິສາຂະບູຊາເປັນວັນທີ່ມີ​ຄວາມ​ໝາຍສຳຄັນຢ່າງ​ຍິ່ງ ສຳລັບ​ຊາວ​ພຸດ​ທຸກ​ນິກາຍ​ໃນ​ທົ່ວ​ໂລກ ທີ່​ໄດ້​ພ້ອມ​ໃຈ​ກັນ​ສະ​ເຫຼີ​ມສະຫຼອງ​ງານ​ບຸນດັ່ງກ່າ​ວຂຶ້ນ​ທຸກໆ​ປີ ​ເພາະ​ເປັນ​​ເຫດການ​ໜຶ່ງ​ທີ່​ສຳຄັນທາງພຸດທະສາສະໜາ ຄື: ວັນປະສູດ, ວັນຕັດສະຮູ້ ແລະ ວັນປະຣິນິພານ ຂອງ​ອົງ​ສຳ​ມາ​ສຳ​ພຸດທະ​ເຈົ້າ, ວົງ​ຄະນາ​ຍາດ​ສາກົນ ກໍ​ຄື ອົງການສະຫະປະຊາຊາດ ກໍ່​ໄດ້​ຮັບຮອງ​ເອົາ​ວັນ​ວິສາຂະບູຊາ ​ເປັນ​ວັນວສາ​ຂະ​ບູຊາ​ສາກົນ​ ນັບ​ແຕ່​ວັນ​ທີ 13 ພຶດສະພາ 1999. ໃນ​ງານ​ສະ​ເຫຼີ​ມສະຫຼອງ​ງານ​ບຸນ​ວິສາຂະບູຊາ​ສາກົນ​ຄັ້ງ​ນີ້ ພາຍ​ໃຕ້​ຫົວ​ຂໍ້: “ຄຳ​ສອນ​ພຸດທະ​ສາສະໜາ ​ເພື່ອ​ຄວາມ​ຍຸຕິ​ທຳ​ທາງ​ສັງຄົມ ​ແລະ ຄວາມ​ສະຫງົບ​ສຸກ​ອັນ​ຍືນ​ຍົງ​ຂອງ​ໂລກ” ໂດຍ​ມີຜູ້​ແທນ​ເຂົ້າ​ຮ່ວມ​ຫຼາຍ​ກວ່າ 400 ທ່ານ ທີ່​ມາຈາກ​ບັນດາ​ປະ​ເທດ​ທີ່​ນັບ​ຖື​ສາສະໜາ​ພຸດ​​ໃນ​ທົ່ວ​ໂລກ.

ພ້ອມ​ດຽວ​ກັນ​ນີ້, ຄະ​ນະ​ຜູ້ແທນ ສນຊ ຍັງ​ໄດ້​ເຂົ້າ​ຢ້ຽມ​ຂ່ຳນັບທ່ານ ​ໄວ​ຢາ​ດາ​ສະ ຣາຈະ​ປາຊີ ລັດຖະມົນຕີ​ກະຊວງຍຸດຕິ​ທຳ ​ແລະ ສາສະໜາ​ ແຫ່ງ​ສີ​ລັງກາ ​ເຊິ່ງທ່ານ​ໄດ້​ສະ​ແດງ​ຄວາມ​ຕ້ອນຮັບ ​ແລະ ຊົມ​ເຊີຍ​ຄະ​ນະ​ຜູ້​ແທນ​ຝ່າຍ​ລາວ ທີ່​​ໄດ້​ສະຫຼະ​ເວລາມາ​ຮ່ວມ​ງານສະ​ເຫຼີ​ມສະຫຼອງ​​ໃນ​ຄັ້ງ​ນີ້ ​ແລະ ທ່ານ​ຮອງ​ປະທານ ສນຊ ກໍ​ໄດ້​ສະ​​ແດງຄວາມ​ຂອບ​ໃຈ​ເປັນ​ຢ່າງ​ຍິ່ງ ​ໃນ​ການ​ຕ້ອນຮັບ​ຢ່າງ​ອົບ​ອຸ່ນຂອງ​ລັດຖະບານ​ສີ​ລັງກາ ເຊິ່ງ​ມີຄວາມໝາຍ​ຄວາມ​ສຳຄັນ​ໃນ​ການ​ພົວພັນ​ຮ່ວມ​ມື​ລະຫວ່າງ​ສອງ​ລັດຖະບານ.

ນອກຈາກ​ນັ້ນ, ຄະນະ​ຜູ້​ແທນ​ຂັ້ນ​ສູງ​ຄະນະ​ກຳມະການ ສນຊ ຍັງ​ໄດ້​​ຢ້ຽມ​ຊົມງານ​ວາງສະ​ແດງ​ພາຍ​ໃນ​ງານ, ຢ້ຽມ​ຊົມວັດວາ​ອາ​ຮາມ ​ແລະ ​ພື້ນຖານ​ວັດ​ທະ​ທຳ ຈຳນວນ​ໜຶ່ງ ພານ​ໃນ​ເມືອງ​ໂຄ​ລົມ​ໂບ ​ແລະ ​ເມືອງ​ແຄນ​ດີ ຕື່ມ​ອີກ.

info@lfnd.org.la | 021 213754 | (856-21) 453191