ຄະນະຜູ້ແທນຂັ້ນສູງ ສນຊ ເຂົ້າຢ້ຽມຢາມພົບປະສະຫາຍ ເລຂາຄະນະພັກ ນະຄອນຫຼວງຮ່າໂນ້ຍ

ຄະນະຜູ້ແທນຂັ້ນສູງສູນກາງແນວລາວສ້າງຊາດ (ສນຊ) ນຳໂດຍ ສະຫາຍ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍຄະນະ ໄດ້ເຂົ້າຢ້ຽມຢາມພົບປະ ສະຫາຍ ດິງ ຕຽນ ຢຸງ ກຳມະການກົມການເມືອງສູນກາງພັກ, ເລຂາຄະນະພັກນະຄອນຫຼວງຮ່າໂນ້ຍ ຢູ່ທີ່ສຳນັກງານຄະນະພັກນະ ຄອນຮ່າໂນ້ຍ ໃນວັນທີ 26 ເມສາ 2023;

ໃນການເຂົ້າຢ້ຽມຢາມພົບປະຄັ້ງນີ້, ການນຳຂັ້ນສູງຂອງສອງຝ່າຍໄດ້ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສອງພັກ-ສອງລັດ ກໍ່ຄືສອງຊາດ ລາວ-ຫວຽດນາມ ເວົ້າລວມ ເວົ້າສະເພາະແມ່ນ ການຮ່ວມມືຂອງ 2 ນະຄອນຫຼວງວຽງຈັນ ແລະຮ່າໂນ້ຍ; ໃນນີ້, ສະຫາຍ ເລຂາຄະນະພັກ ໄດ້ລາຍງານສະພາບການພັດທະນາເສດຖະກິດ-ສັງຄົມ ໂດຍຫຍໍ້ ໃຫ້ຄະນະໄດ້ຮັບຊາບ ເຊິ່ງເຫັນວ່າມີທ່າຂະຫຍາຍຕົວໃນລະດັບດີພໍສົມຄວາມ; ອັນພົ້ນເດັ່ນອີກຢ່າງໜຶ່ງໃນໄລຍະຜ່ານມາ ແມ່ນການປ້ອງກັນ ແລະສະກັດກັ້ນ ການແຜ່ລະບາດພະຍາດ ໂຄວິດ-19 ໂດຍການປະກອບສ່ວນຂອງແນວໂຮມຫວຽດນາມ ໃນການໂຄສະນາປຸກລະດົມຂົນຂວາຍປະຊາຊົນ ໃຫ້ມີສ່ວນຮ່ວມໄດ້ຮັບໝາກຮັບຜົນດີ; ພ້ອມນີ້, ຍັງໄດ້ຍົກໃຫ້ເຫັນການພັດທະນາ ລະຫວ່າງ ນະຄອນຫຼວງຮ່າໂນ້ຍ ກັບນະຄອນຫຼວງວຽງຈັນ ຕື່ມອີກ;

ໂອກາດນີ້, ປະທານສູນກາງແນວລາວສ້າງຊາດ ໄດ້ສະແດງຄວາມຂອບໃຈຕໍ່ຄຳເຫັນອັນຈົບງາມຂອງ ສະຫາຍ ເລຂາຄະນະພັກ ທີ່ໄດ້ຍົກໃຫ້ເຫັນບົດຮຽນສຳຄັນຫຼາຍປະການ, ຂໍສະແດງຄວາມຍ້ອງຍໍຊົມເຊີຍຕໍ່ຜົນງານການນຳພາຂອງຄະນະພັກນະຄອນຫຼວງຮ່າໂນ້ຍ ທີ່ຍາດມາໄດ້ໃນໄລຍະຜ່ານມາ ເຊິ່ງເປັນພື້ນທີ່ໜຶ່ງທີ່ມີການພັດທະນາໄວໃນພາກພື້ນອາຊີ ກໍຄືໃນໂລກ; ສຳລັບການພົວພັນຮ່ວມມື ລະຫວ່າງ ນະຄອນຫຼວງຮ່າໂນ້ຍ ກັບນະຄອນຫຼວງວຽງຈັນ ໄດ້ມີຫຼາຍໂຄງການທີ່ໄດ້ຮັບການຊ່ວຍເຫຼືອຈາກນະຄອນຫຼວງຮ່າໂນ້ຍ ອັນພົ້ນເດັ່ນກໍແມ່ນການຮ່ວມມືລະຫວ່າງໂຮງຮຽນການເມືອງ-ການປົກຄອງນະຄອນຫຼວງວຽງຈັນ ແລະໂຮງຮຽນບຳລຸງສ້າງພະນັກງານເລຫົ້ງຟອງ ແມ່ນດີຫຼາຍ; ການແບ່ງ ປັນບົດຮຽນໃນວຽກງານກໍ່ສ້າງພັກ, ວຽກງານຄຸ້ມຄອງລັດ, ການແກ້ໄຂບັນດາຂັ້ນຂອດບໍລິຫານ, ບັນດາພະແນກການ, ຂະແໜງການ, ອົງການຈັດຕັ້ງມະຫາຊົນ, ວິຊາການຂອງສອງນະຄອນຫຼວງ ໄດ້ແລກປ່ຽນ ແລະແບ່ງປັນບົດຮຽນນໍາກັນ ແລະອື່ນໆ; ສໍາລັບການຮ່ວມມືໃນຕໍ່ໜ້າ ສະເໜີໃຫ້ຄະນະພັກ-ອົງການປົກຄອງ ນະຄອນຮ່າໂນ້ຍ ຊຸກຍູ້ການພົວພັນຮ່ວມມື ລະຫວ່າງ ແນວໂຮມຮ່າໂນ້ຍ ກັບແນວນະຄອນຫຼວວຽງຈັນ ໃຫ້ມີການຮ່ວມມືກັນເຊິ່ງກັນ ແລະກັນຫຼາຍຂຶ້ນ ເປັນຕົ້ນແມ່ນການຝຶກອົບຮົມວຽກງານແນວໂຮມ ໃຫ້ແກ່ແນວລາວສ້າງຊາດ ນະຄອນຫຼວງຈັນ ເພື່ອປະກອບສ່ວນຢ່າງຕັ້ງ ໜ້າເຂົ້າໃນການເພີ່ມພູນຄູນສ້າງສາຍພົວພັນອັນເປັນມູນເຊື້ອທີ່ຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານຂອງສອງຊາດ ພວກເຮົາ.