ສູນກາງແນວລາວສ້າງຊາດ

Lao Front For National Development

ຄະນະຜູ້ແທນຂັ້ນສູງ ສນຊ ເຄື່ອນໄຫວຢ້ຽມຢາມ ແລະ ເຮັດວຽກຢູ່ ສສ ຫວຽດນາມ

ໃນບໍ່ດົນຜ່ານມານີ້, ຄະນະຜູ້ແທນຂັ້ນສູງສູນກາງແນວລາວສ້າງຊາດ (ສນຊ) ນໍາໂດຍ ທ່ານ ເຍ່ຍເກີຢ່າ ໜໍຈໍຈົງຕົວ ຮອງປະທານສູນກາງແນວລາວສ້າງຊາດ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ ສສ ຫວຽດນາມ, ໂດຍການຕ້ອນຮັບຢ່າງອົບອຸ່ນຂອງທ່ານ ໂດ ວັນ ຈຽນ ກໍາມະການສູນກາງພັກ, ລັດຖະມົນຕີ, ປະ ທານຄະນະກຳມະການຊົນເຜົ່າ ສສ ຫວຽດນາມ ພ້ອມດ້ວຍຄະນະ ທີ່ນະຕອນຫຼວງຮ່າໂນຍ.

ໂອກາດນີ້, ໄດ້ມີພິທີພົບປະສອງຝ່າຍ ລະຫວ່າງຄະນະຜູ້ແທນຂັ້ນສູງ ສນຊ ນໍາໂດຍທ່ານ ເຍ່ຍເກີຢ່າ ໜໍຈໍຈົງຈົວ ແລະ ຄະນະກຳມະການຊົນເຜົ່າ ສສ ຫວຽດນາມ ນຳໂດຍທ່ານ ໂດ ວັນ ຈຽນ ຊິ່ງໃນພິທີດັ່ງກ່າວທ່ານ ປະທານຄະນະກຳມະການຊົນເຜົ່າ ໄດ້ກ່າວວ່າ: ການມາຢ້ຽມຢາມ ແລະ ເຮັດວຽກຢູ່ ສສ ຫວຽດນາມ ຂອງຄະນະຜູ້ແທນຂັ້ນສູງ ສນຊ ຄັ້ງນີ້ ແມ່ນເປັນການເພີ່ມທະວີສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຂອງສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມືເຂົ້າສູ່ລວງເລິກ. ທ່ານ ຮອງປະທານ ສນຊ ກໍໄດ້ສະແດງຄວາມຂອບໃຈຕໍ່ຄະນະກຳມະການຊົນ ເຜົ່າ ທີ່ໄດ້ຕ້ອນຮັບອັນອຸ່ນ. ພ້ອມກັນນັ້ນ, ທັງສອງຝ່າຍກໍໄດ້ມີການປຶກສາຫາລື ແລະ ແລກປ່ຽນບົດຮຽນບາງວຽກງານທີ່ສຳຄັນຢ່າງກົງໄປກົງມາ ເປັນຕົ້ນ: ແລກປ່ຽນກ່ຽວກັບຄຸນລັກສະນະ, ມາດຕະຖານຂອງຜູ້ຊົງຄຸນວຸດທິ, ວິທີການຂັດເລືອກຜູ້ຊົງຄຸນ ວຸດທິເຂົ້າຮ່ວມກອງປະພົບປະຜູ້ຊົງຄຸນວຸດທິທົ່ວປະເທດ ເພາະວ່າກາງເດືອນສິງຫາ 2018 ນີ້ ສນຊ ຈະໄດ້ເປັນເຈົ້າການຈັດກອງປະຊຸມພົບປະຜູ້ຊົງຄຸນວຸດທິທົ່ວປະເທດຄັ້ງທີ 3.

ໂອກາດດັ່ງກ່າວ, ຄະນະຜູ້ແທນ ສນຊ ກໍໄດ້ໄປຢ້ຽມຢາມ ແລະ ເຮັດວຽກຢູ່ ແຂວງເຫງະອານ, ໄປທັດສະນະສຶກສາຢູ່ອະນຸສາວະລີນັກຮົບເສຍສະລະ ຫວຽດນາມ-ລາວ, ໄປແລກປ່ຽນບົດຮຽນກ່ຽວກັບບາດກ້າວ, ຂັ້ນຕອນ ແລະ ຜົນສໍາເລັດໃນການສ້າງສາພັດ ທະນາຊົນນະບົດແບບໃໝ່ຢູ່ຕາແສງ ຕາມກວາງ ເມືອງເຕືອງເຍືອງ ແຂວງເຫງະອານຕື່ມອີກ.

info@lfnd.org.la | 021 213754 | (856-21) 453191