ສູນກາງແນວລາວສ້າງຊາດ

Lao Front For National Development

ຄະນະຜູ້ແທນຂັ້ນສູງ ສນຊ ເຂົ້າພົບປະຢ້ຽມຢາມປະທານສະພາທີ່ປຶກສາການເມືອງທົ່ວປະເທດຈີນ

     ໃນວັນທີ 22 ມັງກອນ 2024 ນີ້, ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ (ສນຊ) ໄດ້ເຂົ້າພົບປະຢ້ຽມຢາມ ທ່ານ ຫວາງ ຫູໜິງ ປະທານສະພາທີ່ປຶກສາການເມືອງທົ່ວປະເທດຈີນ ທີ່ນະຄອນຫຼວງປັກກິງ ໂດຍມີບັນດາທ່ານການນໍາຂັ້ນສູງຂອງສອງຝ່າຍເຂົ້າຮ່ວມ.
     ທ່ານ ຫວາງ ຫູໜິງ ກ່າວວ່າ: ເປັນວັນຄົບຮອບ 15 ປີແຫ່ງການສ້າງສາຍພົວພັນຄູ່ຮ່ວມມືຍຸດທະສາດຮອບດ້ານລາວ-ຈີນ, ຄະນະກໍາມະການສະພາທີ່ປຶກສາການເມືອງທົ່ວປະເທດ ຈີນຍິນດີຮ່ວມກັບຄະນະກໍາມະການສູນກາງແນວລາວສ້າງຊາດ ໂດຍປະຕິບັດຕາມຄວາມເຫັນດີເຫັນພ້ອມຂອງການນໍາຂັ້ນສູງຂອງສອງປະເທດ ທີ່ໄດ້ສ້າງກົນໄກການພົວພັນຮ່ວມມືທີ່ດີຂອງສອງປະເທດ ພ້ອມກັນນີ້, ທ່ານຍັງແຈ້ງພາລະບົດບາດ, ສິດ ແລະ ໜ້າທີ່ຂອງສະພາທີ່ປຶກສາການເມືອງທົ່ວປະເທດຈີນໃຫ້ຝ່າຍລາວໄດ້ຮັບຊາບ.
     ພ້ອມກັນນີ້, ທ່ານ ສິນລະວົງ ຄຸດໄພທູນ ໄດ້ກ່າວວ່າ, ລາວຢຶດໝັ້ນຫຼັກການລວມສູນປະຊາທິປະໄຕ ໃຫ້ຄວາມສໍາຄັນຢ່າງຍິ່ງຕໍ່ການພົວພັນຮ່ວມມືກັນລະຫວ່າງ ລາວ-ຈີນ ແລະ ຍິນດີເພີ່ມທະວີການແລກປ່ຽນປະສົບການກັບສະພາທີ່ປຶກສາການເມືອງທົ່ວປະເທດຈີນ. ການພົບປະຄັ້ງນີ້ແມ່ນແນໃສ່ເສີມຂະຫຍາຍພຶ້ນຖານຄວາມເຫັນດີຂອງປະຊາຊົນຂອງສອງປະເທດ, ປະກອບສ່ວນເຂົ້າໃນການພັດທະນາການພົວພັນຮ່ວມມືສອງປະເທດໃຫ້ດີຂຶ້ນ.
     ຫຼັງຈາກການພົບປະ, ທ່ານ ສິນລະວົງ ຄຸດໄພທູນ ແລະ ທ່ານ ຫວາງ ຫູໜິງ ໄດ້ເຂົ້າຮ່ວມພິທີລົງນາມສັນຍາການຮ່ວມມືລະຫວ່າງຄະນະກໍາມະການສູນກາງແນວລາວສ້າງຊາດ ລົງນາມໂດຍທ່ານ ດຣ. ນາງ ອິນລາວັນ ແກ້ວບຸນພັນ ກໍາມະການສູນກາງພັກ, ຮອງປະທານສູນກາງແນວລາວສ້າງຊາດ ແລະ ຄະນະກໍາມະການສະພາທີ່ປຶກສາການເມືອງທົ່ວປະເທດຈີນ ລົງນາມໂດຍທ່ານ ຫວາງ ຕົງຝິງ ຮອງປະທານສະພາທີ່ປຶກສາການເມືອງທົ່ວປະເທດຈີນ, ເພື່ອເປັນການສືບຕໍ່ສັນຍາການຮ່ວມມືໄລຍະປີ 2024-2028.
info@lfnd.org.la | 021 213754 | (856-21) 453191