ສູນກາງແນວລາວສ້າງຊາດ

Lao Front For National Development

ຄະນະຜູ້ແທນຂັ້ນສູງ ສນຊ ເຂົ້າພົບປະປະທານສະພາປະຊາຊົນຈີນ

     ຄະນະຜູ້ແທນຂັ້ນສູງສູນກາງແນວລາວສ້າງຊາດ (ສນຊ) ນໍາໂດຍທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍຄະນະ ເຂົ້າພົບປະຢ້ຽມຢາມທ່ານ ຈ່າວເລິຈີ ຄະນະປະຈໍາກົມການເມືອງສູນກາງພັກກອມມູນິດຈີນ ປະທານສະພາປະຊາຊົນຈີນ ທີ່ນະຄອນຫຼວງປັກກິງ ມີການນໍາຂັ້ນສູງຂອງພັກ-ລັດ ເຂົ້າຮ່ວມ ໃນວັນທີ 23 ມັງກອນ 2024 ນີ້.
     ປະທານສະພາປະຊາຊົນຈີນໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ກັບການຢ້ຽມຢາມ ແລະ ເຮັດວຽກຂອງທ່ານ ປະທານ ສນຊ ພ້ອມດ້ວຍຄະນະ ຢູ່ ສປ ຈີນ ໃນຄັ້ງນີ້ ແລະ ເປັນການເພີ່ມທະວີຮັດແໜ້ນສາຍພົວພັນຮ່ວມມືລະຫວ່າງສອງປະເທດ ລາວ-ຈີນ, ຈີນ-ລາວ ໃຫ້ນັບມື້ແໜ້ນແຟ້ນຂຶ້ນເລື້ອຍໆ ເປັນຕົ້ນແມ່ນຢູ່ໃນທ່າມກາງທີ່ສອງປະເທດ ລາວ-ຈີນ ຊຸກຍູ້ສົ່ງເສີມໂຄງການໜຶ່ງເລວທາງໜຶ່ງເສັ້ນທາງ ໃຫ້ໄດ້ຮັບຜົນປະໂຫຍດສູງສຸດ.
     ປະທານ ສນຊ ໄດ້ສະແດງຄວາມຂອບໃຈຢ່າງຍິ່ງຕໍ່ກັບປະທານສະພາປະຊາຊົນຈີນທີ່ໄດ້ຕ້ອນຮັບຄະນະ ໃນຄັ້ງນີ້, ເພື່ອເປັນການມາພົບປະແລກປ່ຽນບົດຮຽນນໍາສະພາປະຊາຊົນຈີນ, ສປປ ລາວ ຢຶດໝັ້ນຕາມ ການນໍາຂັ້ນສູງ ສອງພັກ, ສອງລັດ ລາວ-ຈີນ ທີ່ໄດ້ເຫັນດີເປັນເອກະພາບກັນໃນການກໍານົດທິດນໍາ ພ້ອມກັນລົງເລິກການສ້າງເປັນຄູ່ຮ່ວມຊໍາຕາກໍາລາວ-ຈີນ, ລະຫວ່າງສອງອົງການ: ສູນກາງແນວລາວສ້າງຊາດ ແລະ ສະພາປະຊາຊົນຈີນ, ຈະສືບຕໍ່ພົວພັນຮ່ວມມືໃຫ້ໄດ້ຮັບຜົນສໍາເລັດຢ່າງຈົບງາມໃນຕໍ່ໜ້າ. ຫຼັງຈາກນັ້ນ, ປະທານ ສນຊ ພ້ອມດ້ວຍຄະນະໄດ້ໄປຢ້ຽມຊົມຫໍສະພາປະຊາຊົນຈີນ, ໄດ້ທັດສະນະສຶກສາຢ້ຽມຊົມຫໍມູນເຊື້ອພັກກອມມູນິດຈີນ, ຢ້ຽມຊົມບໍລິສັດ ຈິງຕົງ ທີ່ເປັນບໍລິສັດ ຜະລິດເຕັກໂນໂລຊີໃນການຂົນສົ່ງແບບທັນສະໄໝ ທາງດ້ານໂລຈິສຕິກ ແລະ ບໍລິສັດ ຕ້າຖາງ ທີ່ເປັນບໍລິສັດລົງທຶນສ້າງໄຟຟ້າເຊີລາແຊວ, ໄຟຟ້ານໍ້າຕົກທີ່ໃຫຍ່ທີ່ສຸດ ໃນ ສປ ຈີນ.
ບກ: ສື່ເຊັ້ງ
ຂ່າວ+ຮູບ: ສຸວັນລີ
info@lfnd.org.la | 021 213754 | (856-21) 453191