ສູນກາງແນວລາວສ້າງຊາດ

Lao Front For National Development

ຄະນະຜູ້ແທນຂັ້ນສູງ ສນຊ ເຂົ້າພົບປະຢ້ຽມຢາມເລຂາພັກແຂວງຈ່ຽງຊູ

        ຄະນະຜູ້ແທນຂັ້ນສູງສູນກາງແນວລາວສ້າງຊາດ (ສນຊ) ນໍາໂດຍທ່ານ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍຄະນະ ເຂົ້າພົບປະຢ້ຽມຢາມທ່ານ ຊິ້ນສັງຊີ່ງ xin changxing ເລຂາພັກແຂວງ, ປະທານສະພາປະຊາຊົນແຂວງຈ່ຽງຊູ ມີການນໍາຂັ້ນສູງຂອງພັກ-ລັດເຂົ້າຮ່ວມໃນວັນທີ 25 ມັງກອນ 2024 ນີ້.

ທ່ານ ຊິ້ນສັງຊີ່ງ ໄດ້ສະແດງຄວາມຍິນດີຕ້ອນຮັບທ່ານ ສິນລະວົງ ຄຸດໄພທູນ ຢ່າງສຸດໃຈ ແລະ ໄດ້ຕີລາຄາສູງຕໍ່ການມາຢ້ຽມຢາມ ແຂວງ ຈ່ຽງຊູ ຄັ້ງນີ້, ເພື່ອເປັນການເສີມຂະຫຍາຍແນວຄວາມຄິດຂອງການນໍາຂັ້ນສູງ ສອງພັກ, ສອງລັດ ລາວ-ຈີນ ໄດ້ເຫັນດີເປັນເອກະພາບກັນໃນການກນໍານົດທິດນໍາ ພ້ອມກັນລົງເລິກການສ້າງເປັນຄູ່ຮ່ວມຊະຕາກໍາລາວ-ຈີນ ເປັນການເພິ່ມທະວີຮັດແໜ້ນສາຍພົວພັນຮ່ວມມື ລະຫວ່າງສອງປະເທດ ລາວ-ຈີນ ໃຫ້ນັບມື້ແໜ້ນແຟ້ນ, ພ້ອມກັນນີ້, ທ່ານຍັງໄດ້ລາຍງານແຜນການພັດທະນາຂອງແຂວງ ຈ່ຽງຊູ ຖືເອົາການຜະລິດອຸດສາຫະກໍາເປັນຕົ້ນຕໍ ຍອດລວມການຜະລິດລໍາດັບ 13% ຂອງປະເທດຈີນ ແລະ ແຂວງຈ່ຽງຊູໄດ້ພົວພັນຮ່ວມມືກັບ ສປປ ລາວ ມີຫຼາຍວິສາຫະກິດທີ່ໄດ້ລົງທືນໃນ ສປປ ລາວ ນອກຈາກນີ້, ຍັງໄດ້ຮ່ວມມືທາງດ້ານວິທະຍາສາດ, ເຕັກນິກວິຊາການ, ການສຶກສາ, ການຄ້າ, ການລົງທືນ ສໍາລັບການພັດທະນາໝູ່ບ້ານທີ່ທຸກຍາກຕາມແນວຄິດຂອງທ່ານ ສີຈີ້ນເຜິ້ງ ແມ່ນສ້າງອາຊີບໃຫ້ເຂົາເຈົ້າມີວຽກເຮັດງານທໍາຈຶ່ງຖືໄດ້ວ່າຫຼຸດຜ່ອນຈາກຄວາມທຸກຍາກ.

ທ່ານ ສິນລະວົງ ຄຸດໄພທູນ ໄດ້ສະແດງຄວາມຂອບໃຈຢ່າງຍິ່ງຕໍ່ກັບເລຂາພັກແຂວງ ຈ່ຽງຊູ ທີ່ໄດ້ໃຫ້ໂອກາດຕ້ອນຮັບອັນອົບອຸ່ນ, ພ້ອມທັງໄດ້ຮັບຟັງແຜນການພັດທະນາຂອງແຂວງ ທີ່ເປັນແຂວງຜະລິດອຸດສາຫະກໍາທົ່ວໂລກ, ການມາພົບປະຢ້ຽມຢາມໃນຄັ້ງນີ້, ເພື່ອເປັນການມາແລກປ່ຽນບົດຮຽນນໍາຕົວແບບການພັດທະນາຂອງ ສປ ຈີນ ໂດຍສະເພາະໝູ່ບ້ານຕົວແບບ ຫ່ວງຫຼົງຊ້ຽນ, ເມືອງຈ່າງໜີງ, ນະຄອນ ໜານຈິງ, ແຂວງ ຈ່ຽງຈູ, ເຂດນິຄົມອຸດສາຫະກໍາຊູໂຈ ແລະ ອັນສໍາຄັນແມ່ນການສ້າງເສດຖະກິດດີຈີຕອນ, ພ້ອມກັນນັ້ນ, ທ່ານຍັງໄດ້ສະແດງຄວາມຮູ້ບຸນຄຸນຕໍ່ພັກ-ລັດຖະບານ ສປ ຈີນ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ຕະຫຼອດໄລຍະຜ່ານມາ, ພິເສດການຢຶດຖືຂໍ້ການຖະແຫຼງຮ່ວມລະຫວ່າງຜູ້ນໍາ ສອງຜູ້ນໍາສູງສຸດ ລາວ-ຈີນ ແລະ ເຫັນດີເປັນເອກະພາບສະໜັບສະໜູນ 4 ດີ ເປັນຄູ່ຮ່ວມຊະຕາກໍາ ລາວ-ຈີນ.

ຫຼັງຈາກການພົບປະຢ້ຽມ, ປະທານ ສນຊ ພ້ອມດ້ວຍຄະນະໄດ້ໄປຢ້ຽມຊົມສວນໂຈເຈີງ, ໄດ້ທັດສະນະສຶກສາເຂດນິຄົມອຸດສາຫະກໍາຊູໂຈ, ໄດ້ຢ້ຽມຊົມບໍລິສັດ ພະລັງງານສະອາດ GCL, ໄດ້ໄປຢ້ຽມຊົມໝູ່ບ້ານຕົວແບບ ຫ່ວງຫຼົງຊ້ຽນ ທີ່ເປັນໝູ່ບ້ານວັດທະນະທໍາທາງດ້ານການຜະລິດ ແລະ ບັນຍາກາດທໍາມະຊາດນອກເມືອງ, ໄດ້ທັດສະນະສຶກສາຫໍພິພິຕະພັນນະຄອນໜານຈິງ, ຫໍພິພິຕະພັນປະຫວັດສາດຈີນຮ່ວມສະໄໝ ແລະ ອາດິດທໍານຽບປະທານປະເທດໃນສະໄໝກ່ອນ.

ຂ່າວ+ພາບ: ສຸວັນລີ

ບກ: ສືເຊັ່ງ

info@lfnd.org.la | 021 213754 | (856-21) 453191