ໂດຍຕອບສະໜອງຕາມການເຊື້ອເຊີນ ຂອງ ອົງການປົກຄອງນະຄອນໂຮ່ຈິມິນ, ຄະນະຜູ້ແທນຂັ້ນສູງ ສູນກາງແນວລາວສ້າງຊາດ ນຳໂດຍ ສະຫາຍ ຄໍາໄຫຼ ສີປະເສີດ ກຳມະການສູນກາງພັກ ຮອງປະທານສູນກາງແນວລາວສ້າງຊາດ ຜູ້ປະຈໍາການ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມສົນທະນາມິດຕະພາບ ຄັ້ງທີ 2 ແລະ ກອງປະຊຸມເວທີປຶກສາຫາລືເສດຖະກິດ ນະຄອນໂຮ່ຈີມິນ ຄັ້ງທີ 5 ປີ 2024  ຢູ່ນະຄອນໂຮ່ຈິມິນ ສສ ຫວຽດນາມ ແຕ່ວັນທີ 23-27 ກັນຍາ 2024, ກອງປະຊຸມດັ່ງກ່າວມີຄະນະຜູ້ແທນຈາກບັນດາກະຊວງ-ອົງການ, ນະຄອນ/ແຂວງ ແລະການຈັດຕັ້ງສະມາຄົມມິດຕະພາບຂັ້ນທ້ອງຖິ່ນຂອງບັນດາປະເທດທົ່ວໂລກ ຈໍານວນ 35 ຄະນະ ເຂົ້າຮ່ວມ.

ກອງປະຊຸມສົນທະນາມິດຕະພາບ ຄັ້ງທີ 2  ກ່າວເປີດໂດຍ ສະຫາຍ ຟານ ວັນໝາຍ ກຳມະການສູນກາງພັກ ຮອງເລຂາຄະນະພັກ ປະທານຄະນະກຳມະການປະຊາຊົນນະຄອນໂຮ່ຈີມິນ ໂດຍການເຂົ້າຮ່ວມຂອງ ສະຫາຍ ຫງວຽນ ວັນເນນ ກໍາມະການກົມການ ເມືອງສູນກາງພັກ, ເລຂາຄະນະພັກນະຄອນໂຮ່ຈິມິນ; ກອງປະຊຸມເວທີປຶກສາຫາລືເສດຖະກິດນະຄອນໂຮ່ຈີມິນ ຄັ້ງທີ 5 ກ່າວເປີດໂດຍ ສະຫາຍ ຫວງຽນ ວັນເນນ ກຳມະການກົມການເມືອງສູນກາງພັກ, ເລຂາພັກນະຄອນໂຮ່ຈີມິນ ແລະໄດ້ຮັບກຽດເຂົ້າຮ່ວມ ແລະມີການສົນທະນາຕອບຂໍ້ສົນໃຈ ຂອງສະຫາຍນາຍົກລັດຖະມົນຕີ ແຫ່ງ ສສ ຫວຽດນາມ.

ສໍາລັບຄະນະຜູ້ແທນຂອງສູນກາງແນວລາວສ້າງຊາດ ກໍໄດ້ປະກອບຄໍາເຫັນໃນຫົວຂໍ້: ການລະດົມຊັບພະຍາກອນ Public Private Partnership (PPP, ການເງິນ, ຊັບພະຍາກອນມະນຸດ)ໃນຂົງເຂດແນວໂຮມ. ນອກຈາກນັ້ນ ຄະນະ ຍັງໄດ້ເຂົ້າຮ່ວມກິດຈະກໍາຕ່າງໆ ທີ່ຄະນະຮັບຜິດຊອບກອງປະຊຸມຈັດຂຶ້ນ ແລະໄດ້ໃຫ້ສໍາພາດແກ່ສະຖານີໂທລະພາບ ແລະວິທະຍຸນະຄອນໂຮຈິມິນຕື່ມອີກ.

ບ.ກ ໂດຍ: ສຊ ຈື້ໄຊ