ສູນກາງແນວລາວສ້າງຊາດ

Lao Front For National Development

ຄະນະຜູ້ແທນ ສນຊ ໄປຢ້ຽມຢາມ ແລະ ເຮັດວຽກທີ່ແຂວງ ຢຸນໜານ ສປ ຈີນ

ໃນລະຫວ່າງວັນທີ 25 ມີນາ 2024 ນີ້, ຄະນະຜູ້ແທນ ສູນກາງແນວລາວສ້າງຊາດ ໄປຢ້ຽມຢາມ ແລະ ເຮັດວຽກ ທີ່ແຂວງ ຢຸນໜານ ສປ ຈີນ ເຊິ່ງນໍາໂດຍທ່ານ ສຈ ປອ ອ໋ອດ ພົງສະຫວັນ ຮອງປະທານສູນກາງແນວລາວສ້າງຊາດ (ບໍ່ປະຈໍາການ), ພ້ອມດ້ວຍຄະນະ ໄດ້ເຂົ້າພົບປະຢ້ຽມຢາມທ່ານ He lianghui ຮອງປະທານສະພາທີ່ປຶກສາການເມືອງແຂວງ ຢຸນນານ, ທີ່ຫ້ອງການສະພາທີ່ປຶກສາການເມືອງ ແຂວງ ຢຸນນານ.
ໂດຍໄດ້ຮັບການຕ້ອນຮັບຂອງທ່ານ He lianghui ຮອງປະທານສະພາທີ່ປຶກສາການເມືອງແຂວງ ຢຸນນານ, ຊຶ່ງການຢ້ຽມຢາມ ແລະ ເຮັດວຽກໃນຄັ້ງນີ້ແມ່ນເປັນການປະກອບສ່ວນຢ່າງຕັ້ງໜ້າເຂົ້າໃນການເສີມຂະຫຍາຍສາຍພົວພັນການຮ່ວມມືອັນເປັນມູນເຊື້ອ ທີ່ມີມາແຕ່ດົນນານລະຫວ່າງ ລາວ-ຈີນ, ຈີນ-ລາວ, ບົນຈິດໃຈ 4 ດີ ແລະ ຄູ່ຮ່ວມຊາຕາກຳດຽວກັນ, ຊື່ງຜູ້ນໍາສູງສຸດ 2 ປະເທດໄດ້ລົງນາມຮ່ວມກັນ ໃນການຈັດຕັ້ງຜັນຂະຫຍາຍປະຕິບັດບົດບັນທຶກວ່າດ້ວຍການຮ່ວມມື ລະຫວ່າງ ສອງອົງການຄະນະກໍາມະການ ສູນກາງແນວລາວສ້າງຊາດ ແລະ ສະພາທີ່ປຶກສາການເມືອງທົ່ວປະເທດຈີນ ທີ່ຫາກໍ່ໄດ້ລົງນາມຮ່ວມກັນໃນວັນທີ 22 ມັງກອນ 2024 ນີ້ ແລະ ເປັນການເສີມຂະຫຍາຍສາຍພົວພັນການຮ່ວມມືອັນເປັນມູນເຊື້ອ ມາແຕ່ດົນນານ. ເພື່ອເປັນການຊຸກຍູ້ການຜະລິດພາຍໃນເພື່ອທົດແທນການນໍາເຂົ້າ, ຂົນຂວາຍດຶງດູດການລົງທຶນເຂົ້າສູ່ການພັດທະນາເສດຖະກິດ-ສັງຄົມ.
ການໄປຢ້ຽມຢາມ ແລະ ເຮັດວຽກໃນຄັ້ງນີ້ເປັນການຊຸກຍູ້ ແລະ ເພື່ອເອື້ອອໍານວຍໃຫ້ແກ່ນັກທຸລະກິດ, ຈາກຕ່າງປະເທດເຂົ້າມາລົງທຶນຢູ່ ສປປ ລາວ ນັບມື້ນັບຫຼາຍຂຶ້ນ ໂດຍສະເພາະແມ່ນນັກລົງທຶນຂອງ ສປປ ຈີນ. ໃນການພັດທະນາເສດຖະກິດ-ສັງຄົມຂອງ ສປປ ລາວ ໃນນັ້ນແມ່ນການເຄື່ອນໄຫວວຽກງານກອງທືນພັດທະນາຂອງແນວລາວສ້າງຊາດ ໃຫ້ມີການຂະຫຍາຍຕົວທີ່ໝັ້ນທ່ຽງ ແລະ ບັນດາໂຄງການໃຫຍ່ໃນລາວແມ່ນໂຄງການຂອງ ສປ ຈີນ ເປັນຕົ້ນ: ເສັ້ນທາງລົດໄຟ ລາວ-ຈີນ, ເສັ້ນທາງດ່ວນ ວຽງຈັນ-ວັງວຽງ, ເຂດພັດທະນາເສດຖະກິດກວມລວມໄຊເຊດຖາ, ໂຄງການປັບປຸງໂຮງໝໍມະໂຫສົດ, ໂຄງການແສງສະຫວ່າງນະຄອນຫຼວງວຽງຈັນ, ໂຄງການຊ່ວຍເຫຼືອແກ້ໄຂຄວາມທຸກຍາກຢູ່ທ້ອງຖິ່ນຕ່າງໆຂອງລາວ, ແລະ ໂຄງການອື່ນໆ.
info@lfnd.org.la | 021 213754 | (856-21) 453191