ສູນກາງແນວລາວສ້າງຊາດ

Lao Front For National Development

ຄະນະພັກເມືອງຄູນສະຫຼຸບວຽກງານກໍ່ສ້າງຮາກຖານການເມືອງ 6 ເດືອນຕົ້ນປີ 2021 ແລະ ທິດທາງແຜນການ 6 ເດືອນທ້າຍປີ 2021

        ກອງປະຊຸມສະຫຼຸບວຽກງານກໍ່ສ້າງຮາກຖານການເມືອງ 6 ເດືອນຕົ້ນປີ 2021 ແລະ ທິດທາງແຜນການ 6 ເດືອນທ້າຍປີ 2021 ເມືອງຄູນ ແຂວງຊຽງຂວາງ ໄດ້ໄຂຂື້ນຢ່າງເປັນທາງການໃນຕອນເຊົ້າ ຂອງວັນທີ 6 ກໍລະກົດ 2021 ຢູ່ທີ່ສະໂມສອນເມືອງຄູນ, ໂດຍການເປັນກຽດເຂົ້າຮ່ວມຂອງ ທ່ານ ນາງ ບົວສີ ນາຖາວົງ ຄະນະປະຈຳພັກແຂວງ ປະທານແນວລາວສ້າງຊາດແຂວງ, ທ່ານ ນາງ ສົມສະໜຸກ ພົມມະຫາໄຊ ຮອງເລຂາພັກເມືອງ ຜູ້ຊີ້ນຳວຽກງານກໍ່ສ້າງຮາກຖານການເມືອງ, ມີບັນດາຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການອ້ອມຂ້າງຂອງເມືອງຕະຫຼອດຮອດຄະນະຮັບຜິດຊອບ 4 ກຸ່ມບ້ານຂັ້ນເມືອງ ແລະນາຍບ້ານ 13 ບ້ານເທດສະບານເຂົ້າຮ່ວມ.

ໃນພິທີ, ທ່ານ ບຸນເພັງ ສຸລາດດາພົນ ກຳມະການພັກເມືອງ ຫົວໜ້າຫ້ອງວ່າການເມືອງ ຂື້ນຜ່ານບົດສະຫຼຸບວຽກງານກໍ່ສ້າງຮາກຖານການເມືອງ 6 ເດື່ອນຕົ້ນປີ 2021 ແລະ ທິດທາງແຜນການ 6 ເດືອນທ້າຍປີ 2021 ໂດຍທ່ານໃຫ້ຮູ້ວ່າ: ເມືອງຄູນມີໜ່ວຍພັກທັງໝົດ 132  ໜ່ວຍ,​ ມີສະມາຊິກພັກທັງໝົດ 2,127 ສະຫາຍ, ຍິງ 675 ສະຫາຍ. ໃນໄລຍະ 6 ເດືອນຕົ້ນປີຜ່ານມາ ຄະນະພັກເມືອງ ໄດ້ເອົາໃຈໃສ່ຊີ້ນຳ-ນຳພາ ແຕ່ລະຂົງເຂດຂອງວຽກງານໃຫ້ໜັກແໜ້ນເຂັ້ມແຂງໃນຫຼາຍດ້ານ,​ ໄດ້ນໍໍາເອົາແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມະຕິ 11 ຂອງສູນກາງພັກ​, ມະຕິ 8 ຂອງອົງຄະນະພັກແຂວງ ລົງເຜີຍແຜ່ເຊຶ່ອມໃຫ້ພະນັກງານລັດຖະກອນແຕ່ລະຫ້ອງການ, ກຸ່ມບ້ານໃນທົ່ວເມືອງ ໄດ້ຮັບຮູ້ເຂົ້າໃຈ; ໄດ້ລົງຊຸກຍູ້ການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ, ຝຶກອົບຮົມວຽກງານມະຫາຊົນຜູ້ກ້າວໜ້າເຂົ້າເປັນສະມາຊິກພັກໄດ້ 3 ຊຸດ, ລົງເຊື່ອມຊຶມເອກະສານແນວລາວສ້າງຊາດ ແລະ ສ້າງບ້ານສາມັກຄີປອງດອງໄດ້ 19 ບ້ານ,​ ປະເມີນບ້ານບົດບາດຍິງຊາຍໄດ້ 39 ບ້ານ, ໄດ້ຮັບການສ່ອງແສງລາຍງານຢູ່ຮາກຖານບ້ານໄດ້ 3 ຈຸດ, ໄດ້ຊຸກຍູ້ການປູກຝັງ ແລະ ລ້ຽງສັດ ເປັນສີນຄ້າໄດ້ 20 ກຸ່ມບ້ານ ທຽບໃສ່ແຜນການຂອງປີເທົ່າກັບ 95%. ພ້ອມນັ້ນ, ຍັງໄດ້ເປັນເຈົ້າການໃນການສຶກສາອົບຮົມການເມືອງ-ແນວຄິດ ໃຫ້ພໍ່ແມ່ປະຊາຊົນ ເຂົ້າໃຈຕໍ່ແນວທາງຂອງພັກ-ລັດ, ເຮັດໃຫ້ປະຊາຊົນມີຄວາມສາມັກຄີປອງດອງ, ເຄົາລົບຕໍ່ລະບຽບກົດໝາຍ, ເປັນເຈົ້າຕົ້ນເອງໃນການປົກປັກຮັກສາ, ພ້ອມກັນສ້າງສາພັດທະນາປະເທດຊາດ ກໍ່ຄືຄອບຄົວ ໃຫ້ມີຊີວິດດີຂື້ນເທື່ອລະກ້າວ. ຈາກນັ້ນ,  ຜູ້ເຂົ້າຮ່ວມກອງປະຊຸມ ໄດ້ພ້ອມກັນປະກອບຄຳຄິດເຫັນຢ່າງກົງໄປກົງມາ, ເພື່ອເຮັດໃຫ້ວຽກງານການລົງກໍ່ສ້າງຮາກຖານໄດ້ຮັບຜົນສຳເລັດສູງສຸດ.

ໃນຕອນທ້າຍ, ຍັງໄດ້ຮັບຟັງຄຳຄິດເຫັນໂອ້ລົມຈາກທ່ານ ນາງ ບົວສີ ນາຖາວົງ ເຊີ່ງກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນການລົງກໍ່ສ້າງຮາກຖານ 6 ເດືອນຕົ້ນປີ 2021 ນີ້ ຊຶ່ງເຫັນໄດ້ວ່າມີຄວາມສຳເລັດໃນຫຼາຍດ້ານ ແລະ ທ່ານຍັງໄດ້ຍົກໃຫ້ເຫັນໃນບາງບັນຫາທີ່ເມືອງ ແລະ ພະນັກງານລົງກໍ່ສ້າງຮາກຖານຈະຕ້ອງເອົາໃຈໃສ່ແກ້ໄຂໃນຕໍ່ໜ້າ. ພ້ອມກັນນັ້ນ, ທ່ານກໍ່ໄດ້ຮຽກຮ້ອງໃຫ້ຄະນະພັກ-ຄະນະນຳຂອງເມືອງຕະຫຼອດຮອດພະນັກງານລົງກໍ່ສ້າງຮາກຖານເອົາໃຈໃສ່ສຶກສາອົບຮົມການເມືອງ-ແນວຄິດ ໃຫ້ພໍ່ແມ່ປະຊາຊົນແຕ່ລະກຸ່ມໃຫ້ເຂົາເຈົ້າເຂົ້າໃຈຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ,  ເອົາໃຈໃນການປັບປຸງລະບົບການເມືອງຢ່າງເລີກເຊີ່ງ ແລະໜັກແໜ້ນ, ຫັນແນວທາງມາເປັນແຜນການ, ສືບຕໍ່ລົງເຜີຍແຜ່ເຊື່ອມຊືມບັນດາເອກະສານ ຂອງພັກ-ລັດ ຢ່າງທົ່ວເຖິງ, ພ້ອມກັນເປັນເຈົ້າຕົ້ນເອງໃນການປົກປັກຮັກສາ, ພ້ອມກັນສ້າງສາພັດທະນາປະເທດຊາດກໍ່ຄືຄອບຄົວໃຫ້ມີຊີວິດດີຂື້ນເທື່ອລະກ້າວ.

info@lfnd.org.la | 021 213754 | (856-21) 453191