ສູນກາງແນວລາວສ້າງຊາດ

Lao Front For National Development

ຄົງເຊໂດນ ຈັດພິທີປະກາດ 28 ບ້ານເປັນບ້ານສາມັກຄີປອງດອງຂອງແນວລາວສ້າງຊາດ

ໃນວັນທີ 2 ກໍລະກົດ 2021 ນີ້ ທີ່ສະໂມສອນເມືອງ ຄົງເຊໂດນ ແຂວງສາລະວັນ ໄດ້ມີພິທີປະກາດຮັບຮອງເອົາ 28 ບ້ານເປັນ ບ້ານເປັນບ້ານສາມັກຄີປອງດອງ, ພາຍໃຕ້ການເປັນປະທານຂອງ ທ່ານ ປອ ສະໄໝ ໂພທິສານ ກຳມະການພັກແຂວງ, ເລຂາພັກ-ເຈົ້າເມືອງຄົງເຊໂດນ, ມີທ່ານ ໜູການ ຊາທິລາດ ຮອງປະທານແນວລາວສ້າງຊາດແຂວງ, ມີທ່ານ ນາງ ບັງອອນ ອາສາພິທັກ ຄະນະປະຈຳພັກເມືອງ, ປະທານແນວລາວສ້າງຊາດເມືອງ,  ພ້ອມດ້ວຍພະແນກການທີ່ກ່ຽວຂ້ອງຂັ້ນແຂວງ-ຂັ້ນເມືອງ, ຕະຫຼອດຮອດເລຂາໜ່ວຍພັກ, ນາຍບ້ານ, ພໍ່ແມ່ປະຊາຊົນພາຍໃນ 28 ບ້ານເຂົ້າຮ່ວມ.

ໃນພິທີ, ໄດ້ຮັບຟັງການສະຫຼຸບລາຍງານ ໃນການຈັດຕັ້ງປະຕິບັດ ເຄື່ອນໄຫວວຽກງານຂະບວນການສ້າງຄອບຄົວ ແລະ ບ້ານສາມັກຄີປອງດອງ ໃນໄລຍະຜ່ານມາ ຈາກທ່ານຮອງປະທານແນວລາວສ້າງຊາດເມືອງ, ໂດຍທ່ານໃຫ້ຮູ້ວ່າ: ໂດຍປະຕິບັດຕາມແຈ້ງການແນະນຳ033/ ຄປຈ. ສນຊ ວ່າດ້ວຍການສ້າງຂະບວນການຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ, ຕິດພັນກັບຂະບວນການແຂ່ງຂັນຮັກຊາດ ແລະ ພັດ ທະນາ. ການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ແມ່ນໄດ້ເລີ້ມຈັດຕັ້ງປະຕິບັດນັບແຕ່ປີ 2016 ເປັນຕົ້ນມາ ຖືເອົາຄໍາແນະນໍາຂອງສູນກາງ, ຂອງແຂວງ ເປັນບ່ອນອີງ, ສະນັ້ນ ພາຍຫຼັງສຳເລັດກອງປະຊຸມໃຫ່ຍຜູ້ແທນແນວລາວສ້າງຊາດເມືອງ ຄັ້ງທີ VI ເພື່ອປະຕິບັດຕາມມະຕິ VI ຂອງກອງປະຊຸມໃຫ່ຍທີ່ຮັບຮອງແຜນການສືບຕໍ່ເຄື່ອນໄຫວ ຂອງວຽກງານຂະບວນການສ້າງຄອບຄົວ ແລະ ບ້ານສາມັກຄີປອງດອງ, ໃນນັ້ນແນວລາວສ້າງຊາດເມືອງໄດ້ສຸມໃສ່ວຽກງານດັ່ງກ່າວ ສາມາດປະເມີນຄອບຄົວ ແລະ ບ້ານສາມັກຄີປອງດອງ ໃນສົກປີ 2020 ຈຳນວນ 28 ບ້ານ ແລະ 3.637 ຄອບຄົວ ທຽບໃສ່ແຜນການປີ ເທົ່າກັບ 98,11%, ການຈັດຕັ້ງປະຕິບັດແມ່ນໄດ້ດໍາເນີນຕາມ 4 ມາດຖານຂອງຄອບຄົວສາມັກຄີປອງດອງ ແລະ 5 ມາດຖານຂອງບ້ານສາມັກຄີປອງດອງ.

ໃນຕອນທ້າຍ ທ່ານ ເຈົ້າເມືອງຄົງເຊໂດນ ໄດ້ຮຽກຮ້ອງໃຫ້ຄະນະກຳມະການແນວລາວສ້າງຊາດເມືອງ ເອົາໃຈໃສ່ໃນການເຕົ້າໂຮມຄວາມສາມັກຄີປະຊາຊົນລາວບັນດາເຜົ່າ, ສຶກສາອົບຮົມລູກຫຼານ ຮັກສາ ແລະ ເສີມຂະຫຍາຍຮີດຄອງປະເພນີອັນດີງາມ, ໃຫ້ແນວລາວສ້າງຊາດເມືອງສືບຕໍ່ສູ້ຊົນໃນການສ້າງຄອບຄົວ ແລະ ບ້ານສາມັກຄີປອງດອງ ໃຫ້ໄດ້ຫຼາຍທີ່ສຸດ ເພື່ອໃຫ້ບັນລຸຕາມແຜນການທີ່ວາງໄວ້ ແລະ ໄດ້ຮັບນາມມະຍົດເປັນເມືອງສາມັກຄີປອງດອງໃນຕໍ່ໜ້າ.

info@lfnd.org.la | 021 213754 | (856-21) 453191