ສູນກາງແນວລາວສ້າງຊາດ

Lao Front For National Development

ງານສະເຫຼີມສະຫຼອງປີທ່ອງທ່ຽວ ຄສ 2018 ແລະ ພິທີປະກາດການສ້າງຕັ້ງ “ນະຄອນ ຫຼວງພະບາງ”ໄດ້ໄຂ້ຂຶ້ນຢ່າງເປັນທາງການ ຢູແຂວງຫຼວງພະບາງເມືອງມໍລະດົກໂລກ

ເພື່ອເປັນການສະຫຼອງງານບຸນກຸດສົງການບຸນປີໃໝ່ລາວ ພສ 2561, ງານສະເຫຼີມສະຫຼອງປີທ່ອງທ່ຽວ ຄສ 2018 ແລະ ພິທີປະ ກາດການສ້າງຕັ້ງ ເມືອງຫຼວງພະບາງເປັນ “ ນະຄອນ ຫຼວງພະບາງ ” ໃຫ້ມີຄວາມໝາຍເລິກເຊິ່ງ ແລະ ເປັນການໂຄສະນາດຶງ ດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ອງທ່ຽວໃຫ້ຫຼາຍຂຶ້ນ.

ໃນລະຫວ່າງວັນທີ 12-17 ເມສາ 2018 ນີ້, ທ່ານ ນາງ ຍອດແກ້ວມະນີ ສຸພານຸວົງ ຮອງປະທານສູນກາງແນວລາວສ້າງ ຊາດ ພ້ອມດ້ວຍຄະນະໄດ້ເຂົ້າຮ່ວມພິທີສະເຫຼີມສະຫຼອງປີທ່ອງທ່ຽວ ລາວ ຄສ 2018 ເນື່ອງໃນໂອກາດບຸນກຸດສົງການປີໃໝ່ ລາວ ແລະ ພິທີປະກາດການສ້າງຕັ້ງ ເມືອງຫຼວງພະບາງເປັນ “ ນະຄອນ ຫຼວງພະບາງ ” ເຊິ່ງເມືອງຫຼວງພະບາງ ແຂວງຫຼວງ ພະບາງ ໄດ້ຖືກຮັບຮອງເປັນເມືອງມໍລະດົກໂລກ ຂອງ ສ ປປ ລາວ ແຕ່ປີ1995 ເປັນຕົ້ນມາ, ໂດຍເປັນກຽດເຂົ້າຮ່ວມຂອງ ທ່ານ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດແຫ່ງ ສ ປປ ລາວ, ມີ ທ່ານ ຄຳຂັນ ຈັນທະວີສຸກ ເລຂາພັກແຂວງ ເຈົ້າແຂວງຫຼວງພະບາງ, ມີບັນດາທ່ານມາຈາກສູນກາງ, ກະຊວງພາຍໃນ, ຜູ້ແທນການນຳພັກ-ລັດ ພາຍໃນແຂວງ ແລະ ຕ່າງແຂວງເຂົ້າຮ່ວມຢ່າງຄຶກຄື້ນ.

ການສະເຫຼີມສະຫຼອງປີທ່ອງທ່ຽວລາວ ຄສ 2018 ແລະ ພິທີປະກາດການສ້າງຕັ້ງ ເມືອງຫຼວງພະບາງເປັນ “ ນະຄອນຫຼວງ ພະບາງ ” ຄັ້ງນີ້, ທ່ານ ຄໍາມູນ ວິພົງໄຊ ຮອງລັດຖະມົນຕີກະຊວງພາຍໃນ ໄດ້ຂຶ້ນຜ່ານດຳລັດ ເລກທີ 126/ນຍ, ວ່າດ້ວຍການ ສ້າງຕັ້ງນະຄອນ ຫຼວງພະບາງ, ພ້ອມກັນນັ້ນ ທ່ານ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດແຫ່ງ ສ ປປ ລາວ ກໍໄດ້ໃຫ້ກຽດຕັດແຖບຜ້າ ແລະ ລັ່ນຄ້ອງ 9 ບາດ ເພື່ອເປັນສິລິມຸງຄຸນໃນການເປີດປີທ່ອງທ່ຽວລາວ ໂດຍສະເພາະຢູ່ແຂວງ ຫຼວງພະບາງ ແລະ ພິທີປະກາດການສ້າງຕັ້ງ “ ນະຄອນ ຫຼວງພະບາງ ” ຢ່າງເປັນທາງການ.


ໃນໂອກາດເຂົ້າຮ່ວມພິທີດັ່ງກ່າວ, ທ່ານ ນາງ ຍອດແກ້ວມະນີ ສຸພານຸວົງ ພ້ອມດ້ວຍຄະນະ ໄດ້ເຂົ້າໄຫວ້ອາໄລທີ່ອະນຸສາວະລີ ປະທານ ສຸພານຸວົງ ປະທານປະເທດຜູ້ທຳອິດຂອງ ສ ປປ ລາວ ທີ່ ນະຄອນ ຫຼວງພະບາງ, ເຂົ້າຮ່ວມພິທີຄັດເລືອກນາງ ສັງຂານ ປີ ພສ 2561, ໄດ້ເຂົ້າຮ່ວມພິທີແຫ່ຊ້າງຮຽງເກີຍ, ເຂົ້າຮ່ວມງານໂລະລາດແບບມວນຊົນ, ເຂົ້າຮ່ວມຊົມການສະ ແດງສິລະປະ ແລະ ຫັດຖະກຳຊົນເຜົ່າລື້ບ້ານຜານົມ, ເຂົ້າຮ່ວມຊົມຂະບວນແຫ່ວໍ່, ເຂົ້າຮ່ວມພິທີໃສ່ບາດຢູ່ໜ້າວັດແສນ ແລະ ໄດ້ເຂົ້າຮ່ວມພິທີອັງເຊີນພະບາງຈາກຫໍລົງປະດິດສະຖານຢູ່ວັດໃໝ່ ເພື່ອໃຫ້ຊາວຫຼວງພະບາງ ກໍ່ຄືຊາວພຸດທະສາສະໜາ ທັງຫຼາຍໄດ້ຫົດສົງ, ໄດ້ຢ້ຽມຊົມແຫຼ່ງທ່ອຽທ່ຽວທຳມະຊາດທີ່ລືຊື່ຈຳນວນໜຶ່ງພາຍໃນແຂວງຄື: ຕາດກວ່າງຊີ, ທາດໝາກໂມ, ວັດຊຽງທອງ, , ວັດຜາໂອ ແລະ ຖໍ້າຕິ່ງຕື່ມອີກ.

ຄະນະຜູ້ແທນສູນກາງແນວລາວສ້າງຊາດ ພວກເຮົາໄປເຖິງໃສກໍ່ໄດ້ຮັບການຕ້ອນຮັບຢ່າງອົບອຸ່ນຈາກຄະນະພັກ, ອຳນາດ ການປົກຄອງແຂວງ ພ້ອມດ້ວຍຄະນະນຳຂອງແນວລາວສ້າງຊາດ ແຂວງຫຼວງພະບາງ ແລະ ຊາວຫຼວງພະບາງທຸກຊັ້ນຄົນ, ທຸກຊົນເຜົ່າ ຢ່າງມີຄວາມໝາຍປະຫວັດສາດ ອັນສວຍງາມຂອງນະ ຄອນຫຼວງພະບາງ ແລະ ແຂວງຫຼວງພະບາງ.

info@lfnd.org.la | 021 213754 | (856-21) 453191