ສູນກາງແນວລາວສ້າງຊາດ

Lao Front For National Development

ຊຸກຍູ້ການກະກຽມ ແລະດໍາເນີນກອງປະຊຸມໃຫຍ່ 3 ຂັ້ນ ຂອງແນວລາວສ້າງຊາດ ຢູ່ແຂວງບໍລິຄຳໄຊ

     ເພື່ອຊຸກຍູ້ວຽກງານການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງແນວລາວສ້າງຊາດ ໃຫ້ມີຄວາມເປັນເອກະພາບ, ມີຄຸນນະພາບດີຂຶ້ນ ແລະ ຖືກທິດ; ໃນວັນທີ 25 ມີນາ 2024 ນີ້, ທີ່ຫ້ອງປະຊຸມ ແຂວງບໍລິຄຳໄຊ; ທ່ານ ເຍ່ຍເກີຢ່າ ໜໍ່ຈໍ່ຈົງຕົວ ຮອງປະທານສຸນກາງແນວລາວສ້າງຊາດ ພ້ອມດ້ວຍຄະນະ ໄດ້ລົງພົບປະ ແລະ ເຮັດວຽກຮ່ວມກັບຄະນະກຳມະການສູນກາງແນວລາວສ້າງຊາດ ປະຈຳຢູ່ແຂວງ ແລະ ຄະນະກຳມະການແນວລາວສ້າງຊາດແຂວງບໍລິຄຳໄຊ ໂດຍມີ ທ່ານ ບຸນຄຳ ໄຊເຍ່ຍລໍ່ວື່ ປະທານຄະນະກຳມະການແນວລາວສ້າງຊາດ ແຂວງບໍລິຄຳໄຊ, ທ່ານ ບຸນສົງ ເພັດຈະເລີນ ຄະນະປະຈຳພັກແຂວງ, ຫົວໜ້າຄະນະຈັດຕັ້ງແຂວງ, ຄະນະກວດກາແຂວງ ແລະ ພະນັກງານ-ລັດຖະກອນ ຂອງແນວລາວສ້າງຊາດແຂວງເຂົ້າຮ່ວມ.
ທ່ານ ປະທານແນວລາວສ້າງຊາດ ແຂວງບໍລິຄຳໄຊ ໄດ້ກ່າວຕ້ອນຮັບ ພ້ອມທັງລາຍງານສະພາບລວມໃນການຈັດຕັ້ງປະຕິບັດວຽກງານຮອບດ້ານ ຂອງແນວລາວສ້າງຊາດແຂວງ ໃນໄລຍະຜ່ານມາ ແລະ ບາງທິດທາງແຜນການວຽກງານຈຸດສຸມຕໍ່ໜ້າ.
     ຫຼັງຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ຮັບຟັງການເຜີຍແຜ່ ບາງເນື້ອໃນສໍາຄັນຂອງແຈ້ງການເລກທີ 17/ຄປຈ ກ່ຽວກັບການກະກຽມດໍາເນີນກອງປະຊຸມໃຫຍ່ 3 ຂັ້ນຂອງແນວລາວສ້າງຊາດ ໄລຍະ 5 ປີ 2024-2029, ມະຕິ108/ກມສພ ວ່າດ້ວຍວຽກງານແນວ
ໂຮມ ແລະວຽກງານມະຫາຊົນຂອງພັກ ໄລຍະໃໝ່, ຄໍາສັ່ງຂອງຄະນະເລຂາທິການສູນກາງພັກ ເລກທີ 19/ຄລສພ ລົງວັນທີ 30 ມິຖຸນາ 2015 ກ່ຽວກັບບຸກຄະລາກອນຂອງແນວລາວສ້າງຊາດຂັ້ນທ້ອງຖິ່ນ, ດໍາລັດເລກທີ 203/ລບ ລົງວັນທີ 4 ກໍລະກົດ 2017 ວ່າດ້ວຍຕໍ່າແໜ່ງບໍລິຫານຂອງພະນັກງານ-ລັດຖະກອນ, ດໍາລັດເລກທີ 461/ລບ ລົງວັນທີ 9 ຕຸລາ 2012 ວ່າດ້ວຍມາດຕະຖານ ປະທານ, ຮອງປະທານ, ຮອງປະທານບໍ່ປະຈໍາການ, ຄະນະປະຈໍາ, ກໍາມະການ, ທີ່ປຶກສາ ແລະ ຄູ່ຮ່ວມງານແນວລາວສ້າງຊາດ ແຕ່ລະຂັ້ນ. ຈາກນັ້ນ, ໄດ້ພ້ອມກັນແລກປ່ຽນຄໍາຄິດຄໍາເຫັນຢ່າງກົງໄປກົງມາ ຕາມຄໍາຖາມເຈາະຈີ້້ມ.
     ໂອກາດນີ້, ທ່ານ ຮອງປະທານສູນກາງແນວລາວສ້າງຊາດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ແນວລາວສ້າງຊາດແຂວງ ສາມາດຍາດໄດ້ໃນໄລຍະຜ່ານມາ ແລະ ທ່ານໄດ້ມີຄຳເຫັນຕື່ມວ່າ: ໃຫ້ຄະນະກໍາມະການແນວລາວສ້າງຊາດ ແຕ່ລະຂັ້ນ ຈົ່ງສືບຕໍ່ສຶກສາຄົ້ນຄວ້ານິຕິກຳຕ່າງໆຂອງພັກ-ລັດທີ່ກ່ຽວຂ້ອງ ແລະ ນິຕິກໍາຂອງແນວລາວສ້າງຊາດໃນການກະກຽມ ແລະ ດໍາເນີນກອງປະຊຸມໃຫຍ່ຂອງແນວລາວສ້າງຊາດແຕ່ລະຂັ້ນ ເພື່ອສາມາດກຳແໜ້ນ ແລະ ນຳໄປຈັດຕັ້ງປະຕິບັດຕົວຈິງໃຫ້ບັນລຸຕາມຄາດໝາຍທີ່ວາງໄວ້ ໂດຍສະເພາະດ້ານເນື້ອໃນ ແລະ ບຸກຄະລາກອນ, ສືບຕໍ່ປຸກລະດົມປະຊາຊົນລາວບັນດາເຜົ່າພາຍໃນແຂວງ ໃຫ້ຮັກສາມູນເຊື້ອຄວາມສາມັກຄີປອງດອງຊ່ວຍເຫຼືອເຊິ່ງກັນແລະກັນ, ສືບຕໍ່ຍູ້ແຮງການຈັດຕັ້ງຜັນຂະຫຍາຍຂໍ້ຕົກລົງ 388/ຄປຈ ວ່າດ້ວຍ 9 ຂໍ້ແຂ່ງຂັນຮັກຊາດ ແລະ ພັດທະນາຂົງເຂດແນວລາວສ້າງຊາດ; ຈັດຕັ້ງຜັນຂະຫຍາຍເນື້ອໃນ 4 ການຫັນປ່ຽນ, 4 ຮ່ວມ ແລະ 4 ເສີມສ້າງ ຕິດພັນກັບການສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 75 ປີ ໃຫ້ເປັນຂະບວນການຟົດຟື້ນ.
ຂ່າວ-ຮູບ: ເຢ້
ບ.ກ: ພ. ບຸບຜາ
 
info@lfnd.org.la | 021 213754 | (856-21) 453191