ສູນກາງແນວລາວສ້າງຊາດ

Lao Front For National Development

ຊຸກຍູ້ການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ຂອງແນວລາວສ້າງຊາດ ຢູ່ແຂວງໄຊສົມບູນ

     ວັນທີ 26 ມີນາ 2024 ນີ້, ທ່ານ ເຍ່ຍເກີຢ່າ ໜໍຈໍຈົງຕົວ ຮອງປະທານສູນກາງແນວລາວສ້າງຊາດ ພ້ອມຄະນະ ໄດ້ເຄື່ອນໄຫວຊຸກຍູ້ວຽກງານການກະກຽມດໍາເນີນກອງປະຊຸມໃຫຍ່ 3 ຂັ້ນ ຂອງແນວລາວສ້າງຊາດ ຢູ່ແຂວງໄຊສົມບູນ.
     ໃນວາລະການເຄື່ອນໄຫວ ທ່ານ ຮອງປະທານສູນກາງແນວລາວສ້າງຊາດ ໄດ້ເຂົ້າພົບ ທ່ານ ວົງສອນ ອິນປານພິມ ຮອງເລຂາພັກແຂວງ ຜູ້ຊີ້ນຳວຽກງານພັກ-ພະນັກງານ ເພື່ອລາຍງານຈຸດປະສົງການເຄື່ອນໄຫວເຮັດວຽກງານໃນຄັ້ງນີ້, ຫຼັງຈາກນັ້ນ, ຄະນະກໍໄດ້ເຂົ້າພົບປະເຮັດວຽກກັບຄະນະກຳມະການແນວລາວສ້າງຊາດ ແລະ ພາກສ່ວນທີ່ກ່ຽວຂ້ອງຂອງແຂວງ. ໃນພິທີ ທ່ານ ເລັ່ງຊົ່ງ ຕົ່ງສີ ປະທານແນວລາວສ້າງຊາດແຂວງໄຊສົມບູນ ໄດ້ລາຍງານກ່ຽວກັບຜົນງານທີ່ພົ້ນເດັ່ນ ໃນການເຄື່ອນໄຫວວຽກງານຂອງແນວລາວສ້າງຊາດ ໃນໄລຍະຜ່ານມາ, ທິດທາງແຜນການໃນຕໍ່ໜ້າ ແລະ ວຽກງານການກະກຽມກອງປະຊຸມໃຫຍ່ 3 ຂັ້ນຂອງແນວລາວສ້າງຊາດໂດຍຫຍໍ້, ພ້ອມກັນນີ້, ກອງປະຊຸມຍັງໄດ້ຮັບຟັງການເຜີຍແຜ່ບາງເອກະສານທີ່ສໍາຄັນ ຄື: ແຈ້ງການເລກທີ 17/ຄປຈ ກ່ຽວກັບການກະກຽມດໍາເນີນກອງປະຊຸມໃຫຍ່ 3 ຂັ້ນຂອງແນວລາວສ້າງຊາດ ໄລຍະ 5 ປີ 2024-2029, ມະຕິ 108/ກມສພ ວ່າດ້ວຍວຽກງານແນວໂຮມ ແລະ ວຽກງານມະຫາຊົນຂອງພັກ ໄລຍະໃໝ່, ຄໍາສັ່ງຂອງຄະນະເລຂາທິການສູນກາງພັກ ເລກທີ 19/ຄລສພ ລົງວັນທີ 30 ມິຖຸນາ 2015 ກ່ຽວກັບບຸກຄະລາກອນຂອງແນວລາວສ້າງຊາດຂັ້ນທ້ອງຖິ່ນ, ດໍາລັດເລກທີ 203/ລບ ລົງວັນທີ 4 ກໍລະກົດ 2017 ວ່າດ້ວຍຕໍ່າແໜ່ງບໍລິຫານຂອງພະນັກງານ-ລັດຖະກອນ, ດໍາລັດເລກທີ 461/ລບ ລົງວັນທີ 9 ຕຸລາ 2012 ວ່າດ້ວຍມາດຕະຖານ ປະທານ, ຮອງປະທານ, ຮອງປະທານບໍ່ປະຈໍາການ, ຄະນະປະຈໍາ, ກໍາມະການ, ທີ່ປຶກສາ ແລະ ຄູ່ຮ່ວມງານແນວລາວສ້າງຊາດ ແຕ່ລະຂັ້ນ. ຈາກນັ້ນ, ຜູ້ເຂົ້າຮ່ວມ ກໍໄດ້ພ້ອມກັນແລກປ່ຽນຄໍາຄິດຄໍາເຫັນຢ່າງກົງໄປກົງມາ ຕາມຄໍາຖາມເຈາະຈີ້້ມຂອງປະທານກອງປະຊຸມຕື່ມອີກ.
     ທ່ານ ຮອງປະທານ ສນຊ ໄດ້ມີຄໍາເຫັນເນັ້ນຕື່ມວ່າ: ໃຫ້ແນວລາວສ້າງຊາດ ແຕ່ລະຂັ້ນ ສືບຕໍ່ເອົາໃຈໃສ່ເຊື່ອມຊຶມແນວທາງນະໂຍບາຍ ແລະ ນິຕິກຳຕ່າງໆ ຂອງພັກ, ຂອງລັດ, ຂອງແນວລາວສ້າງຊາດ ແລະ ບັນດາແຜນງານ, ໂຄງການ ແລະ ກິດຈະກຳຕ່າງໆ ທີ່ກອງປະຊຸມໃຫຍ່ຂອງແນວລາວສ້າງຊາດ ແຕ່ລະຂັ້ນໄດ້ກຳນົດ ເພື່ອກຳແໜ້ນໃຫ້ເລິກຊິ່ງ ແລະ ນຳໄປຈັດຕັ້ງຜັນຂະຫຍາຍເຂົ້າໃນວຽກງານຕົວຈີງ ຢ່າງແຂງແຮງ ໂດຍສະເພາະການກະກຽມດ້ານເນື້ອໃນ ແລະດ້ານບຸກຄະລາກອນ, ພ້ອມກັນນັ້ນ ສືບຕໍ່ຍູ້ແຮງຈັດຕັ້ງປະຕິບັດການຜັນຂະຫຍາຍຂໍ້ຕົກລົງຂອງຄະນະປະຈໍາ ສນຊ ເລກທີ 388 ລົງວັນທີ 12 ກັນຍາ 2023 ວ່າດ້ວຍການຮັບຮອງຂໍ້ແຂ່ງຂັນຮັກຊາດ ແລະ ພັດທະນາ ຕິດພັນກັບການສ້າງຂະບວນການເພື່ອຂໍ່ານັບຮັບຕ້ອນການສະເຫຼີມສະຫຼອງວັນສ້າງຕັ້ງແນວລາວສ້າງຊາດ ຄົບຮອບ 75 ປີ ໃຫ້ເປັນຂະບວນການຟົດຟື້ນ ໂດຍຍູ້ແຮງຂະບວນການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກຂອງປະຊາຊົນ, ສືບຕໍ່ປຸກລະດົມປະຊາຊົນໃຫ້ທຳການຜະລິດກະສິກຳ ເປັນສິນຄ້າ ຢ່າງແຂງແຮງ, ນຳໃຊ້ຜະລິດຕະພັນຂອງລາວ ແລະ ພ້ອມກັນຊ່ວຍກັນຕ້ານປະກົດການຫຍໍ້ທໍ້ຕ່າງໆ ທີ່ເກີດຂື້ນໃນສັງຄົມ.
ຂ່າວ+ພາບ: ເຢ
ບກ: ພ. ບຸບຜາ
  
info@lfnd.org.la | 021 213754 | (856-21) 453191