ສູນກາງແນວລາວສ້າງຊາດ

Lao Front For National Development

ຊຸກຍູ້ການກະກຽມ  ແລະ ດໍາເນີນກອງປະຊຸມໃຫຍ່ 3 ຂັ້ນ ຂອງແນວລາວສ້າງ ຢູ່ແຂວງເຊກອງ

ທ່ານ ດຣ ນາງ ອິນລາວັນ ແກ້ວບຸນພັນ ກຳມະການສູນກາງພັກ, ຮອງປະທານສຸນກາງແນວລາວສ້າງຊາດ ພ້ອມດ້ວຍຄະນະ ໄດ້ລົງເຄື່ອນໄຫວຊຸກຍູ້ວຽກງານການກະກຽມກອງປະຊຸມໃຫຍ່ 3 ຂັ້ນຂອງແນວລາວສ້າງຊາດແຂວງເຊກອງ. ໂດຍມີ ທ່ານນາງ ບຸນຮຽງ ບຸນຈິດ ກຳມະການປະຈຳພັກແຂວງ, ປະທານແນວລາວສ້າງຊາດແຂວງເຊກອງ, ມີບັນດາທ່ານກຳມະການສູນກາງແນວລາວສ້າງຊາດ, ກຳມະການແນວລາວສ້າງຊາດແຂວງ ພ້ອມດ້ວຍພະນັກງານ-ລັດຖະກອນ ຂອງແນວລາວສ້າງຊາດແຂວງເຂົ້າຮ່ວມ ໃນວັນທີ 13 ມີນາ 2024 ນີ້, ທີ່ຫ້ອງປະຊຸມຊັ້ນ 3 ຫ້ອງວ່າການແຂວງເຊກອງ.

ໃນກອງປະຊຸມ, ທ່ານນາງ ບຸນຮຽງ ບຸນຈິດ ໄດ້ລາຍງານສະພາບການຈັດຕັ້ງປະຕິບັດວຽກງານປະຈໍາປີ 2023 ແລະ ທິດທາງ 2024,  ເຊິ່ງທ່ານໃຫ້ຮູ້ວ່າ: ໃນໄລຍະ 1 ປີຜ່ານມາ ຄະນະກໍາມະການແນວລາວສ້າງຊາດແຕ່ລະຂັ້ນ ໄດ້ຖືສໍາຄັນໃນການສຶກສາອົບຮົມການເມືອງ-ແນວຄິດ ແລະ ເຕົ້າໂຮມຄວາມສາມັກຄີປະຊາຊົນລາວບັນດາເຜົ່າດ້ວຍຫຼາຍຮູບການ ເຊື່ອໝັ້ນຕໍ່ການນໍາພາຂອງພັກ, ເຮັດໃຫ້ທ້ອງຖິ່ນມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເສດຖະກິດມີການຂະຫຍາຍຕົວຢ່າງຕໍ່່ເນື່ອງ; ໄດ້ເອົາໃຈໃສ່ປຸກລະດົມທຸກຊັ້ນຄົນທົ່ວປວງຊົນ ປະກອບສ່ວນຜັນຂະຫຍາຍ ແລະ ຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ. ພ້ອມທັງປຸກລະດົມປະຊາຊົນບັນດາເຜົ່າຮັກສາໄດ້ຮີດຄອງປະເພນີອັນດີງາມຂອງຊາດ ແລະ ເອກະລັກທີ່ເປັນມູນເຊື້ອຂອງແຕ່ລະເຜົ່າ, ເອົາໃຈໃສ່ສ້າງຄອບຄົວ ແລະ ບ້ານສາມັກຄີປອງດອງໃນທົ່ວແຂວງ. ພາຍຫຼັງທີ່ໄດ້ຮັບແຈ້ງການຂອງຄະນະປະຈຳສູນກາງແນວລາວສ້າງຊາດ ສະບັບເລກທີ 17/ຄປຈ ວ່າດ້ວຍກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງແນວລາວສ້າງຊາດ. ແນວລາວສ້າງຊາດແຂວງ ໄດ້ອອກແຈ້ງການໃຫ້ແນວລາວສ້າງຊາດເມືອງ ໃນການກະກຽມດໍາເນີນກອງປະຊຸມໃຫຍ່ຂັ້ນຂອງຕົນໃນ 4 ເມືອງ ແລະ ໄດ້ສໍາເລັດ 2 ເມືອງ.

ໂອກາດນີ້, ທ່ານ ດຣ ນາງ ອິນລາວັນ ແກ້ວບຸນພັນ ໄດ້ໂອ້ລົມໃຫ້ທິດຊີ້ນໍາຕໍ່ຄະນະກໍາມະການແນວລາວສ້າງຊາດແຕ່ລະຂັ້ນ ຍົກໃຫ້ເຫັນຄວາມສໍາຄັນໃນການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນ ຂອງຕົນ ໃຫ້ສໍາເລັດຕາມລະດັບຄາດໝາຍ, ທັງນີ້ເພື່ອຕີລາຄາການນໍາພາ-ຊີ້ນໍາຂອງຄະນະນໍາ, ໃນການຈັດຕັ້ງປະຕິບັດວຽກງານຮອບດ້ານ 5 ປີຜ່ານມາ. ເຊິ່ງທ່ານໄດ້ເນັ້ນໃຫ້ຄະນະກຳມະການແນວລາວສ້າງຊາດແຕ່ລະຂັ້ນ ຈົ່ງເອົາໃຈໃສ່ວຽກງານດ້ານບຸກຄະລາກອນ ຖືສໍາຄັນໃນການສ້າງພະນັກງານກັບທີ່ຜູ້ມີປະສົບການໂດຍຫັນເປັນໜຸ່ມໃຫ້ມີຄວາມໜັກແໜ້ນ ແລະ ເຂັ້ມແຂງ; ເອົາໃຈໃສ່ວຽກງານໂຄສະນາ-ຂະບວນການ ໃຫ້ຟົດຟື້ນເຫັນໄດ້ມູນເຊື້ອຂອງແນວລາວສ້າງຊາດ, ຜົນງານການເຄື່ອນໄຫວທີ່ພົ້ນເດັ່ນ, ວຽກດີຄົນເດັ່ນ ແລະ ທາງດ້ານເນື້ອໃນໃຫ້ມີຈຸດສຸມ. ເອົາໃຈໃສ່ຈັດຕັ້ງປະຕິບັດ 4 ຮ່ວມ 4 ເສີມສ້າງ ແລະ 9 ຂໍ້ແຂ່ງຂັດຕິດພັນກັບຂະບວນການຮັກຊາດ ແລະ ພັດທະນາຂອງແນວລາວສ້າງຊາດ.

ຂ່າວ+ພາບ: ຄຳຜາຍ

ບກ: ກົງແກ້ວ

info@lfnd.org.la | 021 213754 | (856-21) 453191