ສູນກາງແນວລາວສ້າງຊາດ

Lao Front For National Development

ຍົກລະດັບສ້າງຄວາມເຂົ້າໃຈຕໍ່ການສ້າງຄວາມສາມັກຄີ

ກົມສາສະໜາ ສູນກາງແນວລາວສ້າງຊາດ(ສນຊ) ຮ່ວມກັບແນວລາວສ້າງຊາດ ເມືອງອຸທຸມພອນ ແຂວງສະຫວັນນະເຂດ ໄດ້ຈັດກອງປະຊຸມຝຶກອົບຮົມ “ທັກສະການສ້າງຄວາມສາມັກຄີ ແລະ ໄກ່ເກ່ຍບັນຫາ” ຂຶ້ນທີ່ເມືອງອຸທຸມພອນ ແຂວງສະຫວັນນະເຂດ, ໂດຍການເປັນປະທານຂອງ ທ່ານ ນາງ ລຳທອງ ຈັນທະແສງ ຄະນະປະຈຳພັກເມືອງ, ປະທານແນວລາວສ້າງຊາດ ເມືອງອຸທຸມພອນ, ເປັນກຽດເຂົ້າຮ່ວມມີ ທ່ານ ສີສະໄໝ ແສງສະຫວ່າງ ຮອງຫົວໜ້າກົມສາສະໜາ ສູນກາງແນວລາວສ້າງຊາດ, ທ່ານ ແກ້ວມະນີວອນ ຕານລະມະນີ ຮອງປະທານແນວລາວສ້າງຊາດ ແຂວງສະຫວັນນະເຂດ, ມີສໍາມະນາກອນຈາກ ບັນດາຫ້ອງການພາຍໃນເມືອງ, ພະນັກງານແນວລາວສ້າງເມືອງ ແລະ ແຂວງ ພ້ອມດ້ວຍບັນດາສາສະໜາຕ່າງໆ ເຂົ້າຮ່ວມ ໃນລະຫວ່າງວັນທີ 5-9 ເມສາ 2021.

ກອງປະຊຸມຄັ້ງນີ້, ສຳມະນາກອນໄດ້ຮຽນຮູ້ກ່ຽວກັບບັນດາເນື້ອໃນເອກະສານຄູ່ມືຝຶກອົບຮົມ ຄື: ສັນຕິສຸກ ແລະ ຂໍ້ຂັດແຍ່ງ, ຄວາມເຫັນອົກເຫັນໃຈ, ການເຄົາລົບນັບຖື, ຄວາມໄວ້ວາງໃຈ, ການເຂົ້າໃຈຜິດເລື່ອງເອກະລັກ, ການຮຽນຮູ້ຈາກຜົນລົບເປັກບວກ, ການວິເຄາະບັນຫາຂໍ້ຂັດແຍ່ງ, ບັນດາວິທີການ ແລະ ຂັ້ນຕອນທີ່ສາມາດຊ່ວຍໃນການແກ້ໄຂຂໍ້ຂັດແຍ່ງ, ທັກສະການໄກ່ເກ່ຍຂໍ້ຂັດແຍ່ງ, ທັດສະນະການໃຫ້ຄຳປຶກສາ, ຮຽນຮູ້ຈັນຍາບັນ ແລະ ໂຄງຮ່າງໃນການໄກ່ເກ່ຍ. ພ້ອມກັນນີ້ ໄດ້ປຶກສາຫາລືແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ເພື່ອຊອກຫາທິດທາງສ້າງສັນໃນການສ້າງຄວາມສາມັກຄີ ແລະ ໄດ້ມີການແລກປ່ຽນຄວາມຮູ້ພື້ນຖານໃນການໄກ່ເກ່ຍຂໍ້ຂັດແຍ່ງ ຢ່າງກົງໄປກົງມາຕື່ມອີກ.

ເພື່ອເປັນການສ້າງຄວາມເຂົ້າໃຈກ່ຽວກັບການສ້າງຄວາມສາມັກຄີກັນໃຫ້ຫຼາຍຂຶ້ນ, ການໃຫ້ກຽດ ແລະ ເຄົາລົບນັບຖືເຊິ່ງກັນ ແລະ ກັນ, ເພື່ອເຮັດໃຫ້ພະນັກງານ ແລະ ຜູ້ຕາງໜ້າສາສະໜາຕ່າງໆ ຢູ່ຂັ້ນທ້ອງຖິ່ນ ແລະ ຮາກຖານ ໄດ້ເຂົ້າໃຈບັນດາເນື້ອໃນການສ້າງຄວາມສາມັກຄີ, ການແກ້ໄຂບັນຫາສະເພາະໜ້າ ແລະ ຮຽນຮູ້ຫຼັກເຫດຜົນໃນການວິເຄາະບັນຫາຕ່າງໆ, ຊຸກຍູ້ໃຫ້ພະນັກງານແນວລາວສ້າງຊາດ ແລະ ພາກສ່ວນທີ່ກ່ຽວຂ້ອງ ໄດ້ນຳເອົາບົດຮຽນ, ຄວາມຮູ້ ໃນການແກ້ໄຂບັນຫາ, ການໄກ່ເກ່ຍບັນຫາໃຫຍ່ໃຫ້ເປັນບັນຫານ້ອຍ, ບັນຫານ້ອຍໃຫ້ໝົດໄປ; ຊຸກຍູ້ໃຫ້ຂັ້ນທ້ອງຖິ່ນເອົາໃຈໃສ່ໃນໜ້າທີ່ວຽກງານຂອງຕົນ ໃຫ້ມີຄວາມເປັນເອກະພາບ ໂດຍສະເພາະແມ່ນເຕົ້າໂຮມຄວາມສາມັກຄີ ປຸກລະດົມປະຊາຊົນໃຫ້ມີຄວາມ ຊ່ວຍເຫຼືອເຊິ່ງກັນ ແລະ ກັນ.

 

info@lfnd.org.la | 021 213754 | (856-21) 453191