ສູນກາງແນວລາວສ້າງຊາດ

Lao Front For National Development

ຖະແຫລງຂ່າວ ຜົນສຳເລັດກອງປະຊຸມສາກົນວ່າດ້ວຍການສ້າງເສັ້ນຊາຍແດນ ລາວ – ຫວຽດນາມ ສັນຕິພາບ, ມິດຕະພາບ, ຮ່ວມມື ພ້ອມກັນພັດທະນາ ຄັ້ງທີ VI

ທ່ານ ແກ້ວຈະເລີນ ເຊ່ຍຢິ້ງຢ່າງ ຄະນະພັກ, ຄະນະປະຈຳ ສູນກາງແນວລາວສ້າງຊາດ ຫົວໜ້າກົມ ໂຄສະນາ-ອົບຮົມ ໃນນາມ ຕາງໜ້າໃຫ້ຄະນະກຳມະການ ສູນກາງແນວລາວສ້າງຊາດ ໄດ້ຖະແຫຼ່ງຂ່າວ ຜົນສຳເລັດກອງປະຊຸມສາກົນວ່າດ້ວຍການສ້າງເສັ້ນ ຊາຍແດນ ລາວ- ຫວຽດນາມ ສັນຕິພາບ, ມິດຕະພາບ, ຮ່ວມມື ພ້ອມກັນພັດທະນາ ຄັ້ງທີ VI, ໃນວັນທີ 19 ກໍລະກົດ 2017 ວ່າ:

ໂດຍປະຕິບັດຕາມບົດບັນທຶກວ່າດ້ວຍການຮ່ວມມື ລະຫວ່າງ ສູນ​ກາງ​ແນວ​ລາວ​ສ້າງ​ຊາດ ແລະ ​​ແນວ​ໂຮມປະ​ເທ​ດຊາດ​ຫວຽດ ນາມ (ໄລຍະ 2016-2020); ປະຕິບັດຕາມບົດບັນທຶກຊ່ວຍຈຳຂອງກອງປະຊຸມປະທານແນວໂຮມ 3 ປະເທດ ກຳປູ ເຈຍ-ລາວ-ຫວຽດນາມ ທີ່ໄດ້ຈັດຂຶ້ນຢູ່ນະຄອນຫຼວງຮ່າໂນ້ຍ ສສ ຫວຽດນາມ ເມື່ອວັນທີ 25/6/2017; ວັນທີ 14/7/2017 ທີ່ແຂວງກວາງບິ່ງ ແຫ່ງ ສສ ຫວຽດນາມ, ຄະນະກຳມະການສູນກາງແນວໂຮມປະເທດຊາດ ຫວຽດນາມ ແລະ ຄະນະກຳມະ ການສູນກາງແນວລາວສ້າງຊາດ ໄດ້ປະສານສົມທົບຈັດຕັ້ງກອງປະຊຸມສາກົນ ວ່າດ້ວຍການສ້າງເສັ້ນຊາຍແດນລາວ-ຫວຽດ ນາມ ສັນຕິພາບ, ມິດຕະພາບ, ຮ່ວມມື ພ້ອມກັນພັດທະນາ ຄັ້ງທີ VI ຂຶ້ນ; ເຊິ່ງຄະນະຜູ້ແທນຂັ້ນສູງຝ່າຍ ລາວ ນໍາໂດຍ ທ່ານ ຄຳໃບ ດຳລັດ ກຳມະການສູນກາງພັກ ຮອງປະທານສູນກາງແນວລາວສ້າງຊາດ, ຄະນະຜູ້ແທນຂັ້ນສູງຝ່າຍ ຫວຽດນາມ ນໍາໂດຍ ທ່ານ ເຈີນແທງເມິນ ກໍາມະການສູນກາງພັກຄອມມູນິດ ຫວຽດນາມ, ປະທານສູນກາງແນວຮ່ວມປະເທດຊາດ ຫວຽດນາມ, ມີບັນດາຜູ້ແທນຈາກສູນກາງແນວໂຮມ 2 ປະເທດ, ກະຊວງ-ອົງການກ່ຽວຂ້ອງ ແລະ ຜູ້ແທນ 10 ແຂວງຂອງ ລາວ-ຫວຽດນາມ ທີ່ມີຊາຍແດນຕິດຈອດກັນເຂົ້າຮ່ວມ.

ກອງປະຊຸມຄັ້ງນີ້, ສອງຝ່າຍພ້ອມກັນຕີລາຄາປະເມີນຜົນ ການປະຕິບັດແຈ້ງການຮ່ວມຜົນກອງປະຊຸມສາກົນວ່າດ້ວຍການ ສ້າງເສັ້ນຊາຍແດນ ຫວຽດນາມ-ລາວ ສັນຕິພາບ, ມິດຕະພາບ ໄລຍະ 2014-2016 ທີ່ຮັບຮອງຢູ່ແຂວງຄຳມ່ວນ ແຫ່ງ ສປປ ລາວ; ພ້ອມກັນເປັນເອກະພາບກ່ຽວກັບການຮ່ວມມືເສີມສ້າງເສັ້ນຊາຍແດນ ລາວ-ຫວຽດນາມ ສັນຕິພາບ, ມິດຕະພາບ, ຮ່ວມມື ພ້ອມກັນພັດທະນາ ໄລຍະ 2017-2020; ໃນນັ້ນ ທີ່ກອງປະຊຸມສອງອົງການແນວໂຮມ ໄດ້ຮັບຮອງແຈ້ງການຮ່ວມ ຜົນກອງປະຊຸມສາກົນ ວ່າດ້ວຍການສ້າງເສັ້ນຊາຍແດນ ລາວ-ຫວຽດນາມ ສັນຕິພາບ, ມິດຕະພາບ, ຮ່ວມມື ພ້ອມກັນພັດ ທະນາ ໄລຍະ 2017-2020 ແລະ ເຊັນຮັບຮອງສັນຍາໝັ້ນໝາຍການແຂ່ງຂັນເສີມສ້າງເສັ້ນຊາຍແດນ ຫວຽດນາມ-ລາວ ສັນ ຕິພາບ, ມິດຕະພາບ, ຮ່ວມມື ພ້ອມກັນພັດທະນາ ໄລຍະ 2017-2020 ລະຫວ່າງ ແນວລາວສ້າງຊາດ 10 ແຂວງ ແລະ ແນວໂຮມຫວຽດນາມ 10 ແຂວງ ທີ່ມີຊາຍແດນຕິດຈອດກັນ; ຊຶ່ງມີເນຶື້ອໃນລະອຽດຄື:

  1. ຄະນະກຳມະການສູນກາງແນວໂຮມປະເທດຊາດ ຫວຽດນາມ ແລະ ຄະນະກຳມະການສູນ ກາງແນວລາວສ້າງຊາດ ດີ ໃຈ ແລະ ທະນົງໃຈກ່ຽວກັບມູນເຊື້ອຂອງແນວໂຮມສອງປະເທດທີ່ປະທານ ໂຮ່ຈີມິນ ແລະ ປະທານ ໄກສອນ ພົມວິ ຫານ, ປະທານ ສຸພານຸວົງ ພ້ອມກັບບັນດາການນຳແນວໂຮມສອງປະເທດ ຖະນຸຖະໜອມ ແລະ ເພີ່ມພູນຄູນສ້າງ. ການເຄື່ອນໄຫວຂອງແນວໂຮມສອງປະເທດ ຢູ່ໃນບັນດາໄລຍະປະຫວັດສາດໄດ້ປະກອບສ່ວນຮັດແໜ້ນຄວາມສາມັກ ຄີ, ມິດຕະພາບແບບພິເສດ, ເຫຼື້ອມໃສ, ບໍລິສຸດຜຸດຜ່ອງລະຫວ່າງສອງຊາດ. ໂດຍການນຳພາຂອງພັກກອມມູນິດ ຫວຽດນາມ ແລະ ພັກປະຊາຊົນປະຕິວັດລາວ, ບັນດາໂຄງການ-ແຜນການປະສານສົມທົບ ລະຫວ່າງ ແນວໂຮມສອງ ປະເທດນັບມື້ນັບມີປະສິດທິຜົນຢ່າງແທ້ຈິງ. ສອງປີກວ່າຜ່ານມາ, ເຖິງວ່າຍັງມີຂໍ້ຄົງຄ້າງ, ຂໍ້ຈຳກັດຈຳນວນໜຶ່ງທີ່ ຕ້ອງໄດ້ພ້ອມກັນແກ້ໄຂກໍຕາມ, ແຕ່ການສ້າງເສັ້ນຊາຍແດນ ລາວ-ຫວຽດນາມ ສັນຕິພາບ, ມິດຕະພາບຕາມເນື້ອ ໃນຈິດໃຈຂອງແຈ້ງການຮ່ວມ ທີ່ໄດ້ລົງນາມລະຫວ່າງສອງຝ່າຍຢູ່ແຂວງຄຳມ່ວນ ແຫ່ງ ສປປ ລາວໃນປີ 2014 ຍັງບັນ ລຸໝາກຜົນໄດ້ຫຼາຍຢ່າງ, ປະກອບສ່ວນອັນສຳຄັນເຂົ້າໃນສະຖຽນນະພາບ ແລະ ພັດທະນາຂອງບັນດາແຂວງທີ່ມີຊາຍ ແດນຕິດຈອດກັນ ແລະ ຂອງທັງສອງປະເທດ ລາວ ​ແລະ ຫວຽດນາມ.
  2. ດ້ວຍນ້ຳໃຈມິດຕະພາບ, ຄວາມສາມັກຄີພິເສດ ແລະ ການເຂົ້າຮ່ວມມືບັນດາການເຄື່ອນໄຫວສະຫຼອງວັນສ້າງຕັ້ງ ສາຍພົວພັນການທູດ ລາວ-ຫວຽດນາມ ຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 40 ປີ, ແນວໂຮມສອງປະເທດໄດ້ເອກະພາບກ່ຽວກັບທິດທາງ, ໜ້າທີ່ທີ່ຈະຕ້ອງສົມທົບ ກັນກໍ່ສ້າງເສັ້ນຊາຍແດນ ລາວ-ຫວຽດນາມ ສັນຕິພາບ, ມິດຕະພາບ, ຮ່ວມມືພ້ອມກັນພັດທະນາ ໄລຍະ 2017-2020,
  3. ກອງປະຊຸມສາກົນກ່ຽວກັບການສ້າງເສັ້ນຊາຍແດນ ລາວ-ຫວຽດນາມ ສັນຕິພາບ, ມິດຕະພາບ, ຮ່ວມມືພ້ອມກັນ ພັດທະນາໄລຍະຕໍ່ໄປ ຄະນະກຳມະການສູນກາງແນວລາວສ້າງຊາດ ​ແລະ ຄະນະກຳມະການສູນກາງແນວໂຮມປະເທດ ຊາດ ຫວຽດນາມ ຈະ​ໄດ້ປະສານສົມທົບກັນຈັດໃນປີ 2020 ຢູ່ ສປປ ລາວ
  4. ຄະນະກຳມະການສູນກາງແນວລາວສ້າງຊາດ ​ແລະ ຄະນະກຳມະການສູນກາງແນວໂຮມປະເທດຊາດ ຫວຽດນາມ ຈະ ພ້ອມກັນລາຍງານຕໍ່ການນໍາສອງພັກ, ສອງລັດ ເພື່ອແນະນຳຄະນະກຳມະການແນວໂຮມບັນດາແຂວງທີ່ມີຊາຍ ແດນຕິດຈອດກັນຂອງສອງປະເທດຮັບຜິດຊອບຜັນຂະຫຍາຍ ​ແລະ ປະຕິບັດບັນດາເນື້ອໃນດັ່ງກ່າວຢ່າງມີປະສິດທິ ຜົນ; ແຈ້ງຂ່າວໃຫ້ລະບົບແນວໂຮມ ແລະ ບັນດາການຈັດຕັ້ງພາຄີແນວໂຮມຂອງແຕ່ລະປະເທດຮັບຮູ້ ເພື່ອປະສານ ສົມທົບຈັດຕັ້ງປະຕິບັດແຈ້ງການຮ່ວມຂອງແນວໂຮມສອງປະເທດ ກ່ຽວກັບການສ້າງເສັ້ນຊາຍແດນ ລາວ-ຫວຽດ ນາມ ສັນຕິພາບ, ມິດຕະພາບ, ຮ່ວມມື ພ້ອມກັນພັດທະນາ ໄລຍະ 2017-2020.

ພ້ອມກັນນັ້ນ, ໃນໂອກາດເຂົ້າຮ່ວມກອງປະຊຸມສາກົນດັ່ງກ່າວ ສອງອົງການແນວໂຮມ ລາວ-ຫວຽດນາມ ກໍ່ໄດ້ມີກິດຈະກຳ ຮ່ວມກັນ ເຊັ່ນ: ຈັດຕັ້ງການວາງກະຕ່າດອກໄມ້ ແລະ ປູກຕົ້ນໄມ້ຢູ່ອະນຸສອນສະຖານ ປະທານ ໄກສອນ ພົມວິຫານ, ອະນຸ ສອນສະຖານ ປະທານ ສຸພານຸວົງ ທີ່ເມືອງທ່າແຂກ ແລະ ວາງະຕ່າດອກໄມ້ຢູ່ອະນຸສອນສະຖານ ປະທານ ໂຮ່ຈິມິນ ທີ່ບ້ານຊຽງ ຫວາງ ເມືອງໜອງບົກ ແຂວງຄຳມ່ວນ; ຈັດຕັ້ງໃຫ້ຄະນະຜູ້ແທນຂັ້ນສູງ ສູນກາງແນວໂຮມປະເທດຊາດຫວຽດນາມ ຢ້ຽມ ຢາມ ແລະ ມອບເຄື່ອງຊ່ວຍເຫລືອ ໃຫ້ຄອບຄົວປະຊາຊົນຜູ້ທຸກຍາກຢູ່ບ້ານລຽບຕາມຊາຍແດນ ແລະ ສຸກສາລາ ເມືອງບົວລະ ພາ ແຂວງຄຳມ່ວນ; ຈັດຕັ້ງໃຫ້ຄະນະຜູ້ແທນຂັ້ນສູງສູນກາງແນວລາວສ້າງຊາດ ຢ້ຽມຢາມ ແລະ ມອບເຄື່ອງຊ່ວຍເຫລືອ ຄອບຄົວປະຊາຊົນຜູ້ທຸກຍາກ ຢູ່ບ້ານລຽບຕາມຊາຍແດນຂອງແຂວງກວາງບິ່ງ ສສ ຫວຽດນາມ ເພື່ອປະກອບສ່ວນເຂົ້າໃນ ຂະ ບວນການສະເຫລີມສະຫລອງ 02 ວັນປະຫວັດສາດ ການພົວພັນ ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ແລະ ການການຮ່ວມມື ລາວ-ຫວຽດນາມ ຄົບຮອບ 40 ປີ ແລະ ວັນສ້າງຕັ້ງສາຍ ພົວພັນການທູດ ລາວ-ຫວຽດນາມ ຄົບ ຮອບ 55 ປີ; ນະໂອກາດນີ້ ຂໍອວຍພອນໃຫ້ສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມ ມືຮອບດ້ານ ລະ ຫວ່າງ ລາວ-ຫວຽດນາມ ຈົ່ງໝັ້ນຄົງຂະນົງແກ່ນຊົ່ວກາລະນານ.

info@lfnd.org.la | 021 213754 | (856-21) 453191