ສູນກາງແນວລາວສ້າງຊາດ

Lao Front For National Development

ຖະແຫຼ່ງຂ່າວ ຜົນສໍາເລັດກອງປະຊຸມ ແນວໂຮມ 3 ປະເທດ ກໍາປູເຈຍ-ລາວ-ຫວຽດນາມ

ທ່ານ ນາງ ຄຳ​ຈັນ ພົມ​ແສງ​ສະຫວັນ ຮອງ​ປະທານ​ສູນ​ກາງ​ແນວ​ລາວ​ສ້າງຊາດ ​ໄດ້​ຕາງໜ້າ​ຄະນະ​ພັກ-ຄະນະ​ນຳ ສນຊ ຖະ​ແຫຼງ ຂ່າວ ກ່ຽວກັບຜົນສໍາເລັດກອງປະຊຸມ 3 ແນວໂຮມ ກໍາປູເຈຍ-ລາວ-ຫວຽດນາມ ຄັ້ງ​ທີ III ວ່າ:

ກອງປະຊຸມທີ່ມີຄວາມໝາຍສໍາຄັນນີ້, 3 ຝ່າຍມີຄວາມປິຕິຊົມຊື່ນເປັນຢ່າງຍິ່ງທີ່ໄດ້ພ້ອມກັນຕີລາ ຄາປະເມີນຜົນການຈັດ ຕັ້ງປະຕິບັດບົດບັນທຶກຊ່ວຍຈໍາໂຄງການຮ່ວມມື ລະຫວ່າງ ແນວລາວສ້າງຊາດ, ແນວໂຮມປະເທດຊາດ ຫວຽດນາມ ແລະ ແນວໂຮມສາມັກຄີພັດທະນາມາຕຸພູມ ກໍາປູເຈຍ ທີ່ໄດ້ລົງນາມໃນວັນທີ 18/12/2013 ທີ່ນະຄອນຫຼວງວຽງຈັນ ແຫ່ງສາ ທາລະນະລັດ ປະຊາທິປະໄຕ ປະຊາຊົນລາວ ເຊິ່ງທັງສາມຝ່າຍໄດ້ສົນທະນາແລກປ່ຽນບັນດາ​ບົດຮຽນ ແລະ ເປັນເອກະພາບ ກັນ ເພື່ອສືບຕໍ່ເສີມຂະຫຍາຍບັນດາໝາກຜົນທີໄດ້ຮັບໃນ 3 ປີ ຜ່ານມາ ແລະ ສືບຕໍ່ເພີມທະວີການຮ່ວມມືໂດຍມີ 6 ເນື້ອ ໃນຕົ້ນຕໍທີ່ສໍາຄັນຄື: ໜຶ່ງ: ສືບຕໍ່ຜັນຂະຫຍາຍກ່ຽວກັບການໂຄສະນາ, ສຶກສາອົບຮົມໃຫ້ທຸກຊັ້ນຄົນ, ພິເສດຕໍ່ກັບຄົນ ລຸ້ນໜຸ່ມສືບທອດໃຫ້ ມີຄວາມຮັບຮູ້ເຂົ້າໃຈຢ່າງເລິກເຊິງກ່ຽວກັບມູນເຊື້ອປະຫວັດສາດ ສາຍພົວພັນ ລະຫວ່າງ ລາວ- ຫວຽດນາມ ແລະ ກໍາປູເຈຍ ເພື່ອການພັດທະນາລວມຂອງສາມປະເທດ ແລະ ເພື່ອຜົນປະໂຫຍດຂອງປະຊາຊົນແຕ່ລະປະ ເທດ. ສອງ: ເພີ່ມທະວີເປີດກວ້າງການພົບປະແລກປ່ຽນມິດຕະພາບລະຫວ່າງແນວໂຮມ, ບັນດາອົງການພາຄີຂອງແນວ ໂຮມ ແລະ ປະຊາຊົນສາມປະເທດ. ສາມ: ຈັດຕັ້ງເຄື່ອນໄຫວສະເຫຼີມສະຫຼອງບັນດາວັນປະຫວັດສາດສໍາຄັນທີໃຫຍ່ຂອງ 3 ປະເທດ ເປັນຕົ້ນໃນປີ 2017, ການສະເຫຼີມສະຫຼອງວັນສ້າງຕັ້ງສາຍພົວພັນການທູດ ລະຫວ່າງ 2 ປະເທດ ລາວ-ຫວຽດ ນາມ ຄົບຮອບ 55 ປີ, ວັນເຊັນສົນທິສັນຍາມິດຕະພາບ-ການຮ່ວມມື ລາວ-ຫວຽດນາມ ຄົບຮອບ 40 ປີ (18/7/1977- 18/7/2017). ສີ່: ສືບຕໍ່ເພີ່ມທະວີການແລກປ່ຽນຄະນະຜູ້ແທນຂັ້ນສູງໄປມາຢ້ຽມຢາມສັນຖະວະໄມຕີ ແລະ ແລກປ່ຽນຄະ ນະວິຊາການຮ່ວມກັນ. ຫ້າ: ປະສານງານກັນ ເພື່ອປະກອບສ່ວນສ້າງປະຊາຄົມອາຊຽນຫັນໄປສູ່ປະຊາຊົນ, ສ້າງຄວາມເປັນ ມິດຕະພາບ, ທໍາຄວາມເຂົ້າໃຈເຊິ່ງກັນ ແລະ ກັນ ລະຫວ່າງ ປະຊາຊົນບັນດາປະເທດແນໃສ່ປະກອບສ່ວນປົກປັກຮັກສາສັນ ຕິພາບ, ຄວາມໝັ້ນຄົງໃນພາກພື້ນສາກົນ. ຫົກ: ໃນປີ2020 ແນວໂຮມສາມັກຄີພັດທະນາມາຕຸພູມ ກໍາປູເຈຍ ຈະເປັນ ເຈົ້າພາບຈັດກອງປະຊຸມ 3 ປະທານແນວໂຮມ ເພື່ອສະຫຼຸບການຈັດຕັ້ງປະຕິບັດບົດບັນທຶກຊ່ວຍຈໍາ ໂຄງການຮ່ວມມື ໄລຍະ ປີ 2017-2020.

ກອງ​ປະຊຸມ​ດັ່ງກ່າວ, ມີທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສູນກາງແນວ ລາວສ້າງຊາດ, ທ່ານ ເຈິ່ນແທ່ງເມິ້ນ ກໍາມະການສູນກາງພັກ ປະທານສູນກາງແນວໂຮມປະເທດຊາດ ຫວຽດນາມ ແລະ ສົມເດັດ ອັກຄະມະຫາໂປເຢຍ ຈັກກຣີ ເຮັງຊໍາຣິນ ປະທານສະພາແຫ່ງຊາດ ປະທານແນວໂຮມສາມັກຄີພັດທະນາມາຕຸພູມ ກໍາປູເຈຍ ພ້ອມ​ດ້ວຍ​ຄະນະ​ຜູ້​ແທນ​ຂັ້ນ​ສູງ​ທັງສາມ​ຝ່າຍ​ເຂົ້າ​ຮ່ວມ ທີ່ນະຄອນຫຼວງຮ່າໂນ້ຍ ສສ ຫວຽດນາມ, ໃນວັນທີ 25 ມິຖຸນາ 2017.

​ໂອກາດ​ນີ້ ທ່ານ ນາງ​ ຄຳ​ຈັນ ພົມ​ແສງ​ສະຫວັນ ​ໄດ້​ກ່າວ​ຕື່ມວ່າ: ເພື່ອຜັນຂະຫຍາຍເປັນອັນລະອຽດກ່ຽວກັບວຽກງານດັ່ງ ກ່າວ, ແນວລາວສ້າງຊາດ ແລະ ແນວໂຮມປະເທດຊາດ ຫວຽດນາມ ຈະໄດ້ພ້ອມກັນຈັດຕັ້ງກອງປະຊຸມສາກົນ ເພື່ອເສີມ ສ້າງສາຍແດນສັນຕິພາບ, ມິດຕະພາບ ຄັ້ງທີ 6 ລະຫວ່າງ 10 ແຂວງຂອງ ລາວ ແລະ ຫວຽດນາມ ທີ່ມີຊາຍແດນຕິດ ຈອດກັນ ​ເຊິ່ງຈະໄດ້ຈັດຂຶ້ນໃນກາງ​ເດືອນກໍລະກົດ 2017 ນີ້, ທີ່ແຂວງກວາງບິງ ສສ ຫວຽດນາມ.

info@lfnd.org.la | 021 213754 | (856-21) 453191