ສູນກາງແນວລາວສ້າງຊາດ

Lao Front For National Development

ທ່ານການນຳສູນກາງແນວລາວສ້າງຊາດເຂົ້າຮ່ວມງານບຸນນໍ່ເປ້ເຈົາຢູ່ແຂວງຊຽງຂວາງ

     ທ່ານ ເຍ່ຍເກີຢ່າ ໜໍຈໍຈົງຕົວ ຮອງປະທານສູນກາງແນວລາວສ້າງຊາດ, ແນວລາວສ້າງຊາດ 4 ແຂວງພາກໃຕ້ (ແຂວງສະຫວັນນະເຂດ, ແຂວງສາລະວານ, ແຂວງຈຳປາສັກ ແລະ ແຂວງອັດຕະປື) ພ້ອມດ້ວຍຄະນະໄດ້ຢ້ຽມຢາມ ແລະ ເຂົ້າຮ່ວມງານບຸນນໍ່ເປ້ເຈົາ ປະຈຳປີ 2023 -2024 ທີ່ແຂວງຊຽງຂວາງ ວັນທີ13 ມັງກອນ 2 2024.
     ໃນພິທີເປີດເປັນກຽດເຂົ້າຮ່ວມຂອງທ່ານ ບຸນຈັນ ສີວົງພັນ ກຳມະການສູນກາງພັກ ເລຂາພັກແຂວງ, ເຈົ້າແຂວງໆຊຽງຂວາງ, ການນຳຂອງແຂວງແຕ່ລະພາກສ່ວນ ພ້ອມດ້ວຍມວນຊົນບັນດາເຜົ່າ ເຂົ້າຮ່ວມ. ທ່ານ ໄຊບຼົ່ງເລົ່າ ປະທານສະມາຄົມກິລາວັນນະຄະດີພື້ນເມືອງແຂວງຊຽງຂວາງໄດ້ກ່າວເປີດພິທີຢ່າງເປັນທາງການ ແລະ ໃຫ້ຮູ້ເຖີງປະຫວັດຄວາມເປັນມາຂອງບຸນນໍ່ເປ້ເຈົາຊົນເຜົ່າມົ້ງ. ພ້ອມກັນນີ້, ທ່ານ ຮອງປະທານສູນການແນວລາວສ້າງຊາດ ໄດ້ມີຄຳເຫັນອວຍພອນ, ໂອ້ລົມຕໍ່ຄະນະຮັບຜິດຊອບ, ມວນຊົນບັນດາຊົນເຜົ່າເຊິ່ງທ່ານກ່າວວ່າ: ງານບຸນນໍ່ເປ້ເປັນງານບຸນປະເພນີໜຶ່ງທີ່ເປັນວັດທະນະທຳອັນດີງາມຂອງຊາດກໍຄືຂອງຊົນເຜົ່າມົ້ງ, ເປັນການສະຫຼຸບຜົນຜະລິດຕະຫຼອດໄລຍະໜຶ່ງປີ, ເປັນການພົບປະ, ຮັດແໜ້ນຄວາມສາມັກຄີປະຊາຊົນລາວບັນດາເຜົ່າ, ຜູ້ຊົງຄຸນວຸດທິແຕ່ລະຊິງຊາວໃຫ້ມີການແລກປ່ຽນຄຳຄິດຄຳເຫັນ, ແລກປ່ຽນດ້ານວັນນະຄະດີປະເພດຕ່າງໆ ຫຼັງຈາກນີ້, ຄະນະໄດ້ຮັບຊົມການສະແດງສິລະປະ, ທ່ຽວຊົມການໂຍນໜາກຄອນ, ທ່ຽວຊົມງົວຊົນງົວ, ມ້າແລ່ນ ແລະ ລາຍການກິດຈະກຳຕ່າງໆຕື່ມອິກ.
     ການເຄື່ອນໄຫວຢ້ຽມຢາມເຂົ້າຮ່ວມເຂົ້າຮ່ວມງານບຸນນໍເປ້ເຈົາຊົນເຜົ່າມົ້ງຢູ່ແຂວງຊຽງຂວາງໃນຄັ້ງນີ້ ທ່ານ ຮອງປະທານສູກາງແນວລາວສ້າງຊາດ, ແນວລາວສ້າງຊາດ 4 ແຂວງພາກໃຕ້ ພ້ອມດ້ວຍຄະນະໄດ້ພົບປະເຮັດວຽກກັບແນວລາວສ້າງຊາດແຂວງຊຽງຂວາງ ພ້ອມທັງມອບເຄື່ອງ, ຄອມພິວເຕີຕັ້ງໂຕະ ແລະ ປຼີນເຕີ ຈຳນວນ 7 ຊຸດມອບໃຫ້ ແນວລາວສ້າງຊາດເມືອງ 7 ເມືອງ ຂອງແຂວງ ລວມມູນຄ່າ 57,443,000 ກີບ ແລະ ທ່ານຮອງປະທານສູນກາງແນວລາວສ້າງຊາດ ໄດ້ນຳພາຄະນະໄປວາງດອກໄມ້ຢູ່ອະນຸສາວະລີ ທ່ານ ພູມີ ວົງວິຈິດ ແລະ ທ່ນ ຕູ້ຢ່າ ໄຊຈູ.
  
info@lfnd.org.la | 021 213754 | (856-21) 453191