ໂອກາດນີ້, ທ່ານປະທານແນວລາວສ້າງຊາດແຂວງ ໄດ້ລາຍງານສະພາບການເຄື່ອນໄຫວວຽກງານ 6 ເດືອນ ຕົ້ນປີ 2021 ໂດຍຫຍໍ້ ເຊິ່ງເນື້ອໃນບາງຕອນວ່າ: ແຂວງບໍລິຄຳໄຊ ປະກອບມີ 7 ເມືອງ, ມີ 284, ມີ 55,716 ຄອບ ຄົວ, ມີ 18 ຊົນເຜົ່າທີ່ດຳລົງຊີວິດຢູ່ຮ່ວມກັນດ້ວຍຄວາມສາມັກຄີປອງດອງ; ໃນນີ້, ທ່ານໄດ້ຍົກໃຫ້ເຫັນກ່ຽວກັບຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ, ປັດຈຸບັນທົ່ວແຂວງມີຄອບຄົວທີ່ ຖືກຮັບ ຮອງເປັນຄອບຄົວສາມັກຄີປອງດອງແລ້ວ 43,331 ຄອບຄົວ ເທົ່າກັບ 89,54%, ບ້ານສາມັກຄີປອງດອງ 263 ເທົ່າກັບ 92,61% ແລະ ເມືອງທີ່ປະກາດຮັບຮອງແລ້ວ 4 ເມືອງ ຄື: ເມືອງທ່າພະບາດ, ປາກຊັນ, ປາກກະດິງ ແລະ ເມືອງ ຄຳ ເກີດ. ສຳລັບແຜນການຕໍ່ໜ້າ ສືບຕໍ່ຊຸກຍູ້ບັນດາຄອບຄົວ, ບ້ານ ທີ່ຍັງບໍ່ທັນໄດ້ຮັບຮອງໃຫ້ມີຄວາມຄືບໜ້າ ແລະ ຄາດ ວ່າຈະໄດ້ຈັດຕັ້ງພິທີ ປະກາດຮັບຮອງເອົາເມືອງບໍລິຄັນ ເປັນເມືອງສາມັກຄີປອງດອງ ຕື່ມອີກໃນທ້າຍປີ 2021.

ໂອກາດນີ້, ທ່ານປະທານສູນກາງແນວລາວສ້າງຊາດ ເປັນກຽດໂອ້ລົມ ເຊິ່ງທ່ານໄດ້ສະແດງຄວາມຍ້ອງຍໍຊົມ ເຊີຍຕໍ່ຜົນງານທີ່ອົງການປົກຄອງແຂວງ ກໍຄືອົງການແນວລາວສ້າງຊາດຍາດມາໄດ້ໃນໄລຍະທີ່ຜ່ານມາ; ໃນນີ້, ມີເນື້ອໃນບາງຕອນທ່ານໄດ້ເນັ້ນວ່າ: ແນວລາວສ້າງຊາດແຂວງ ຕ້ອງໄດ້ສືບຕໍ່ຫັນປ່ຽນໃໝ່ທີ່ແທດເໝາະກັບສະພາບຕົວຈິງ ຂອງທ້ອງຖິ່ນຕົນ ໂດຍເລີ່ມຈາກຂໍ້ຫຍຸ້ງຍາກ-ຄົງຄ້າງ ໃນການເຄື່ອນໄຫວວຽກງານໃນຄວາມຮັບຜິດຊອບຂອງຕົນ ເປັນຕົ້ນ: ການຫັນປ່ຽນດ້ານແນວຄິດ, ທັດສະນະ, ຄວາມຮັບຮູ້ຕໍ່ກັບວຽກງານແນວໂຮມໃນໄລຍະໃໝ່, ການຫັນປ່ຽນດ້ານ ຮູບການ ແລະ ວິທີການປຸກລະດົມຂົນຂວາຍທຸກພາກສ່ວນໃນສັງຄົມ ເຂົ້າຮ່ວມໃນວຽກງານແນວລາວສ້າງຊາດ ໃຫ້ໄດ້ ຮັບຜົນດີ, ການຫັນປ່ຽນດ້ານການປະສານສົມທົບ ຫຼື ຮ່ວມມືກັບອົງການພາຄີ ແລະ ການຫັນປ່ຽນດ້ານກົນໄກໃຫ້ໄດ້ດີ ກວ່າເກົ່າ, ດ້ານງົບປະມານ ໂດຍການສ້າງແຫຼ່ງລາຍຮັບອື່ນ ທີ່ຖືກຕ້ອງຕາມກົດໝາຍ ອີງຕາມກົດໝາຍວ່າດ້ວຍແນວລາວສ້າງຊາດ ມາດຕາ 37 ເພື່ອເຮັດໃຫ້ການເຄື່ອນໄຫວວຽກງານແນວລາວສ້າງຊາດ ມີບາດກ້າວໃໝ່ທີ່ມີການຫັນປ່ຽນ ຕາມມະຕິກອງປະຊຸມໃຫຍ່ຄັ້ງທີ XI ຂອງພັກວາງອອກໃຫ້ປະກົດຜົນເປັນຈິງ.

ພາບ ແລະ ຂ່າວ ໂດຍ: ຈິດຕະພົງ

ບກ ໂດຍ: ສຊ ຈື້ໄຊ