ຕອນເຊົ້າຂອງວັນທີ 20 ກັນຍາ 2024 ທີ່ຫ້ອງປະຊຸມຫ້ອງວ່າການແຂວງຜົ້ງສາລີ ໄດ້ຈັດພິທີປະກາດການແຕ່ງຕັ້ງຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງຜົ້ງສາລີ ຜູ້ໃໝ່ ຂຶ້ນຢ່າງເປັນທາງການ ໂດຍໃຫ້ກຽດເຂົ້າຮ່ວມ ຂອງ ສະຫາຍ ປອ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ຜູ້ຊີ້ນຳວຽກງານຮອບດ້ານແຂວງຜົ້ງສາລີ, ມີ ສະຫາຍ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ ເຈົ້າແຂວງໆຜົ້ງສາລີ, ມີບັນດາສະຫາຍໃນຄະນະບໍລິຫານງານພັກແຂວງ, ບັນດາເຈົ້າເມືອງ, ຫົວໜ້າ-ຮອງພະແນກການ, ອົງການທຽບເທົ່າ ແລະ ພະນັກງານຫຼັກແຫຼ່ງພາຍໃນແຂວງ ພ້ອມດ້ວຍພາກສ່ວນທີ່ກ່ຽວຂ້ອງຈາກສູນກາງເຂົ້າຮ່ວມ.

ໃນພິທີດັ່ງກ່າວສະຫາຍເເລຂາພັກແຂວງຜົ້ງສາລີໄດ້ລາຍງານສະພາບການຈັດຕັ້ງປະຕິບັດໄລຍະ 9 ເດືອນຜ່ານ ເປັນຕົ້ນແມ່ນການຊີ້ນໍາ-ນໍາພາຂອງແຂວງ ໃນສະພາບການສາກົນ, ພາກພື້ນມີຄວາມປັ່ນປ່ວນ-ຫຍຸ້ງຍາກ, ຊຶ່ງສົ່ງຜົນສະທ້ອນຕໍ່ການເມືອງ, ເສດຖະກິດ, ສັງຄົມ ແລະ ການປ້ອງກັນຊາດ-ປ້ອງກັນຄວາມສະຫງົບຂອງທຸກປະເທດໃນໂລກ; ຢູ່ພາຍໃນປະເທດ, ກໍ່ຄືພາຍໃນແຂວງ ສືບຕໍ່ພົບກັບບັນຫາຫຍຸ້ງຍາກທາງດ້ານເສດຖະກິດ-ການເງິນ, ເງິນກີບອ່ອນຄ່າ, ອັດຕາແລກປ່ຽນສູງຂຶ້ນ ແລະ ຄ່າຄອງຊີບທີ່ສືບຕໍ່ສູງຂຶ້ນ, ຊຶ່ງສົ່ງຜົນກະທົບຕໍ່ຊີວິດການເປັນຢູ່ ຂອງພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າບໍ່ໜ້ອຍ; ຄຽງຄູ່ກັນນັ້ນ, ພວກສັດຕູ ແລະ ກຸ່ມຄົນບໍ່ຫວັງດີກໍ່ຍັງເຄື່ອນໄຫວດ້ວຍຮູບການຕ່າງໆ ທີ່ເລິກແລບແນບນຽນຂຶ້ນກວ່າເກົ່າ, ໄພພິບັດທາງທໍາມະຊາດ ແລະ ສັງຄົມກໍ່ເກີດຂຶ້ນ; ຊຶ່ງທັງໝົດນັ້ນ, ໄດ້ສົ່ງຜົນກະທົບ ແລະ ເປັນສິ່ງທ້າທາຍຕໍ່ການຊີ້ນໍາ-ນໍາພາຈັດຕັ້ງປະຕິບັດວຽກງານຮອບດ້ານຂອງແຂວງ.  ແຕ່ດ້ວຍຄວາມພະຍາຍາມເອົາໃຈໃສ່ຊີ້ນໍາ-ນໍາພາຂອງຄະນະປະຈໍາພັກແຂວງ ແລະ ອົງການປົກຄອງແຕ່ລະຂັ້ນ ໄດ້ເຮັດໃຫ້ທົ່ວແຂວງສືບຕໍ່ມີຄວາມສະຖຽນລະພາບທາງການເມືອງຢ່າງໜັກແໜ້ນ, ສັງຄົມມີສະຫງົບປອດໄພໂດຍພື້ນຖານ, ປະຊາຊົນໄດ້ທໍາມາຫາກິນປະກອບອາຊີບ, ບ່ອນທີ່ມີເງື່ອນໄຂກໍ່ໄດ້ຜະລິດເປັນສິນຄ້າຕາມນະໂຍບາຍ ແລະ ລະບຽບກົດໝາຍ,  ບັນດາວຽກງານຕ່າງໆທີ່ກໍານົດໄວ້ໃນມະຕິ ແລະ ໃນແຜນການປີ 2024 ໄດ້ຮັບການຊີ້ນໍາຈັດຕັ້ງປະຕິບັດ ແລະ ມີຄວາມຄືບໜ້າຫຼາຍດ້ານ.

ໂອກາດນີ້, ສະຫາຍ ປອ ສິນລະວົງ ຄຸດໄພທູນ ໄດ້ກ່າວວ່າ:

1. ການປະກາດການແຕ່ງຕັ້ງໃນຄັ້ງນີ້ ແມ່ນປະຕິບັດຕາມການຕົກລົງຂອງກອງປະຊຸມຄະນະເລຂາທິການສູນກາງພັກ ໂດຍອີງຕາມຫຼັກການຄຸ້ມຄອງ, ສັບຊ້ອນພະນັກງານນໍາພາ-ຄຸ້ມຄອງຂອງພັກ, ທັງອີງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງຂອງແຂວງຜົ້ງສາລີພວກສະຫາຍ, ຈາກເຫດຜົນທີ່ກ່າວມານັ້ນ ພິທີປະການການຈັດຕັ້ງໃນຄັ້ງນີ້ ແມ່ນສຸດທີ່ມີຄວາມໝາຍສໍາຄັນໃນການແຕ່ງຕັ້ງພະນັກງານຄຸ້ມຄອງ-ນໍາພາ ໃນຕໍາແໜ່ງທີ່ສໍາຄັນຂອງແຂວງ, ທັງເປັນການຍົກລະດັບຂີດຄວາມສາມາດໃນການປະຕິບັດວຽກງານຂອງແຂວງ ໃນວຽກງານຕົວຈິງຢ່າງຮອບດ້ານ. ບັນດາສະຫາຍໄດ້ຮູ້ນຳກັນແລ້ວວ່າ ຊວງໄລຍະເວລານີ້ໄດ້ກ້າວເຂົ້າສູ່ໄລຍະທ້າຍສະໄໝ ຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 05 ປີ ຄັ້ງທີ IX ກໍຄືການປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ ຂອງແຂວງ ທັງເປັນໄລຍະທີ່ພວກສະຫາຍກໍາລັງສຸມໃສ່ກະກຽມກອງປະຊຸມໃຫຍ່ອົງຄະນະພັກເມືອງ, ກອງປະຊຸມໃຫຍ່ອົງຄະນະພັກແຂວງຜົ້ງສາລີ ຄັ້ງທີ XII ຢ່າງຮອບດ້ານ ບົນພື້ນຖານຫຼາຍບັນຫາທີ່ເກີດຂຶ້ນໃນປະເທດເຮົາ. ສະນັ້ນ, ເມື່ອເຫັນໄດ້ເຖິງຄວາມສໍາຄັນໃນການປະຕິບັດໜ້າທີ່ການເມືອງຂອງແຂວງຜົ້ງສາລີ ຄະນະເລຂາທິການສູນກາງພັກ ແລະ ລັດຖະບານ ຈຶ່ງໄດ້ຕົກລົງແຕ່ງຕັ້ງ ສະຫາຍ ປອ ໄຊນະຄອນ ອິນທະວົງ ເປັນ ຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງຜົ້ງສາລີ ເພື່ອມາຊ່ວຍໃນການນໍາພາ-ຊີ້ນໍາວຽກງານພາຍໃນແຂວງພວກສະຫາຍໃຫ້ຮັບປະກັນຜົນສໍາເລັດຢ່າງມີປະສິດທິພາບ.  ສໍາລັບສະຫາຍຮອງເລຂາຄະນະບໍລິຫານງານພັກແຂວງ, ຮອງເຈົ້າແຂວງຜູ້ໃໝ່ ກໍໃຫ້ຖອດຖອນບົດຮຽນ-ຮຽນຮູ້, ເສີມຂະຫຍາຍມູນເຊື້ອ, ຄຸນງາມຄວາມດີ, ມີຄວາມຮັບຜິດຊອບຢ່າງປະດິດສ້າງຕໍ່ໜ້າທີ່ໃນການນໍາພາ-ຊີ້ນໍາວຽກງານຂອງແຂວງໃຫ້ນັບມື້ມີຜົນສໍາເລັດ, ເຮັດໃຫ້ແຂວງຜົ້ງສາລີພັດທະນາກ້າວຂຶ້ນ, ເຮັດໃຫ້ຊີວິດການເປັນຢູ່ຂອງສະມາຊິກພັກ, ພະນັກງານ ແລະ ປະຊາຊົນຊາວແຂວງຜົ້ງສາລີ ໄດ້ຮັບການພັດທະນາດີຂຶ້ນ;
2. ກ່ຽວກັບວຽກງານໄພພິບັດເປັນອີກວຽກໜຶ່ງທີ່ພວກເຮົາຈະຕ້ອງເອົາໃຈໃສ່, ສໍາລັບແຂວງຜົ້ງສາລີພວກເຮົາ ປີນີ້ສ່ວນໃຫຍ່ແມ່ນຖະໜົນຫົນທາງເປ່ເພ, ເຊາະເຈື້ອນ, ຕັດຂາດ, ເຮັດໃຫ້ໄປບໍ່ໄດ້…ຊຶ່ງແນວນັ້ນ, ພວກເຮົາຈະຕ້ອງໄດ້ຟື້ນຟູ, ຊ່ວຍເຫຼືອໃຫ້ຜ່ານພົ້ນໂດຍໄວ, ອັນສໍາຄັນພັກ-ລັດ ຕ້ອງໄດ້ເຮັດໜ້າທີ່ຂອງຕົນ, ສັງຄົມຕ້ອງຊ່ວຍລະດົມໃຫ້ມີເຂົ້າກິນ, ໃຫ້ມີນໍ້າໃຊ້, ໃຫ້ມີບ່ອນຢູ່ອາໄສ… ແລະ ໃນຕໍ່ໜ້າໄພທໍາມະຊາດອາດຈະເກີດຂຶ້ນອີກ ສະນັ້ນ, ພວກເຮົາຈະຕ້ອງມີແຜນວຽກກຽມພ້ອມຮັບມື ແລະ ແກ້ໄຂໃຫ້ທ່ວງທັນ;
3. ກ່ຽວກັບການຕີລາຄາໃນວຽກງານ 1 ປີ ຜ່ານມາ, ສະຫາຍໄດ້ສະແດງຄວາມຊົມເຊີຍ ທີ່ແຂວງໄດ້ສືບຕໍ່ຈັດຕັ້ງປະຕິບັດບັນດາຄາດໝາຍ, ແຜນພັດທະນາ, ມະຕິກອງປະຊຸມໃຫຍ່ຂອງພັກ, ຂອງແຂວງ ເປັນຕົ້ນແມ່ນ 8 ຄາດໝາຍໃຫຍ່ວາງອອກ, ຊຶ່ງເຫັນວ່າບັນລຸໄດ້ໃນຫຼາຍດ້ານ ແລະ ສະຫາຍປະທານ ສນຊ ໄດ້ເນັ້ນຕື່ມວ່າ:

+ ກ່ຽວກັບວຽກງານລວມທົ່ວປະເທດ ສະເໜີໃຫ້ຄະນະພັກແຂວງ ພ້ອມກັບປະຊາຊົນທົ່ວແຂວງຜົ້ງສາລີ ສືບຕໍ່ຈັດຕັ້ງປະຕິບັດມະຕິຂອງກອງປະຊຸມໃຫຍ່ຂອງພັກ, ຂອງແຂວງ, ຊຶ່ງໃນນັ້ນ, ແມ່ນຈັດຕັ້ງປະຕິບັດມະຕິ 8 ຂອງສູນກາງພັກສະໄໝທີ XI ;

+ ສືບຕໍ່ແກ້ໄຂບັນຫາເຄັງຮ້ອນດ້ານເສດຖະກິດ-ການເງິນ ຕາມການຕົກລົງໃນກອງປະຊຸມຄັ້ງທີ 8 ໃຫ້ມີການຫັນປ່ຽນທີ່ດີ;

+ ສືບຕໍ່ຊີ້ນໍາການລົງຮາກຖານຕິດພັນກັບການພັດທະນາຊົນນະບົດ, ແກ້ໄຂຄວາມທຸກຍາກຂອງປະຊາຊົນໃຫ້ເປັນຂະບວນຟົດຟື້ນກວ້າງຂວາງ, ເອົາໃຈໃສ່ປັບປຸງກໍາລັງປະກອບອາວຸດ, ຮັບປະກັນສະຖຽນລະພາບທາງດ້ານການເມືອງ, ຄວາມສະຫງົບ, ຄວາມເປັນລະບຽບຮຽບຮ້ອຍທາງສັງຄົມ, ແກ້ໄຂບັນຫາຢາເສບຕິດ ຢ່າງຕັ້ງໜ້າ;

+ ສືບຕໍ່ຊີ້ນໍາຜັນຂະຫຍາຍມະຕິ 04 ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງ ໃຫ້ເຂົ້າສູ່ລ່ວງເລິກ ເພື່ອກຽມຄວາມພ້ອມທຸກດ້ານກ້າວໄປສູ່ກອງປະຊຸມໃຫຍ່ ຄັ້ງ XII ຂອງພັກ; ຊີ້ນໍາການປັບປຸງລັດຖະທໍາມະນູນ ແລະ ກົດໝາຍທີ່ກ່ຽວຂ້ອງ;

+ ສືບຕໍ່ຊີ້ນໍາການກະກຽມກອງປະຊຸມໃຫຍ່ 3 ຂັ້ນ ໂດຍສະເພາະແມ່ນຂັ້ນຮາກຖານ, ຂັ້ນເມືອງ ແລະ ກະກຽມສະຫຼຸບຖອດຖອນບົດຮຽນ ເພື່ອກ້າວໄປສູ່ກອງປະຊຸມໃຫຍ່ຄັ້ງທີ XII ຂອງອົງຄະນະພັກແຂວງ;

+ ຊີ້ນໍາການກະກຽມດໍາເນີນຊີວິດການເມືອງພາຍໃນສູນກາງ ປີ 2024 ເພື່ອດໍາເນີນການກະກຽມດ້ານບຸກຄະລາກອນຂອງແຂວງ, ກະຊວງ-ອົງການ ແລະ ກອງປະຊຸມໃຫຍ່ ຄັ້ງທີ XII ຂອງພັກ;

+ ສືບຕໍ່ກະກຽມກອງປະຊຸມໃຫຍ່ຂອງອົງຄະນະພັກເມືອງ ໃຫ້ດີທີ່ສຸດ (ການເມືອງ, ບຸກຄະລາກອນ, ກົດລະບຽບ) ປັບປຸງແກ້ໄຂໃຫ້ເກີດຂຶ້ນຕົວຈິງ ແລະ ວຽກງານຂະບວນການໃຫ້ຟົດຟື້ນ ຕາມຄໍາແນະນໍາຂອງຄະນະໂຄສະນາອົບຮົມສູນກາງພັກ;

ໃນໂອກາດດັ່ງກ່າວ ສະຫາຍ ປອ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ຜູ້ຊີ້ນຳວຽກງານຮອບດ້ານຂອງແຂວງຜົ້ງສາລີ ພ້ອມດ້ວຍຄະນະໄດ້ມອບເງິນຊຸກຍູ້ ຈຳນວນ 300 ລ້ານກີບ ເພື່ອນ້ຳໃຊ້ເຂົ້າໃນວຽກງານຕ້ານໄພພິບັດນໍ້າຖ້ວມ ແລະ ສ້ອມແປງຖະໜົນຫົນທາງ.